فوتو: ءماجىلىستىڭ ءباسپاسوز قىزمەتى
جالپى اۋماعى 9 مىڭ شارشى مەتردى قۇرايتىن جانە قۇنى 3,2 ملرد تەڭگە بولاتىن جاڭا ورتالىقتا تۇرعىن بولمەلەر, جەكە جانە توپتىق وڭالتۋ ساباقتارىنا ارنالعان كابينەتتەر, ەمدىك دەنە شىنىقتىرۋ زالى, پسيحولوگ, پسيحياتر, نەۆرولوگ, لوگوپەد كابينەتتەرى, فيزيوتەراپيا بلوگى جانە اسحانا قاراستىرىلعان. سونىمەن قاتار مۇندا 3 پەن 18 جاس ارالىعىنداعى تىرەك-قيمىل اپپاراتى بۇزىلعان 50 بالاعا قىزمەت كورسەتىلىپ, جارتىلاي ستاتسيوناردا كۇندىزگى بولىمگە وسى اۋماققا جاقىن اۋدانداردان 30 بالا قابىلداناتىن بولادى.
ەرلان ابديەۆ عيمارات ءىشىن ارالاپ كورىپ, الەۋمەتتىك-تۇرمىستىق ورتاعا بەيىمدەۋ, سۋرەت سالۋ, سەنسورلىق جابدىقتار, كومپيۋتەرلىك سىنىپ, كىتاپحانا, ەمدىك-دەنە شىنىقتىرۋ, اكۆابولمە, مونتەسسوري بولمەلەرى مەن اكت جانە سپورت زالدارى, اسحانانىڭ جابدىقتالۋ جاعدايىمەن تانىستى. مۇندا يپپوتەراپيا ادىسىمەن ەمدەۋدە وڭتۇستىك كورەيادان مەحانيكالىق ات جابدىعى الىنعان. ەلەكتروندى جابدىق ءار ەكى مينۋت سايىن ءتۇرلى جاتتىعۋ فورمالارىنا ەنەدى. جالپى يپپوتەراپيانىڭ 10 ءتۇرلى ءادىسى قولدانىلادى.
وڭالتۋ ورتالىعى قازاقستان رەسپۋبليكاسى كونستيتۋتسياسىنىڭ 30 جىلدىعى مەرەكەسى قارساڭىندا اشىلادى.
ء«بىز «كەدەرگىسىز ورتا» تۋرالى ايتقاندا, بۇل ابستراكتىلى ۇعىم ەمەس, ادامداردىڭ ءومىرىن ءدال قازىر وزگەرتەتىن ناقتى شەشىمدەر ەكەنىن ءتۇسىنۋىمىز قاجەت. وراڭعايداعى وڭالتۋ ورتالىقتارى – «AMANAT» پارتياسىنىڭ سايلاۋالدى ۋادەلەرىنىڭ ءىس جۇزىندە ورىندالىپ جاتقانىنىڭ ايقىن دالەلى. ەرەكشە كۇتىمدى قاجەت ەتەتىن بالالاردىڭ اتا-انالارى ءۇشىن بۇل – پەرزەنتىنىڭ كاسىبي كومەك الىپ, تولىققاندى ومىرگە قادام باسۋىنا دەگەن سەنىم. ەرەسەكتەر ءۇشىن – قوعامنان شەت قالماي, بەلسەندى ءومىر سۇرۋىنە مۇمكىندىك بەرەتىن قولداۋ. الداعى ۋاقىتتا دا مۇمكىندىگى شەكتەۋلى ازاماتتاردىڭ قۇقىقتارىن قورعاۋدى جالعاستىرىپ, قابىلداناتىن ءاربىر زاڭ مەن باعدارلامادا ولاردىڭ مۇددەسى مەن قاجەتتىلىگىنىڭ ەسكەرىلۋىن قامتاماسىز ەتەمىز», دەدى ەرلان ابديەۆ.
بۇل باعىتتاعى جۇمىس جۇيەلى تۇردە جۇرگىزىلىپ جاتىر. بۇگىندە «AMANAT» پارتياسىنىڭ سايلاۋالدى باعدارلاماسىن جۇزەگە اسىرۋ بويىنشا ەلىمىزدە ەرەكشە ءبىلىم بەرۋدى قاجەت ەتەتىن 16,9 مىڭ بالانى قامتيتىن 1,8 مىڭ ينكليۋزيا كابينەتى, سونداي-اق 5,5 مىڭ بالانى قامتيتىن 688 بەيىمدەلگەن سپورت سەكتسياسى جۇمىس ىستەيدى. پارتيا سونداي-اق جۇمىس ورىندارىنا كۆوتالاردىڭ ورىندالۋىن جانە ينفراقۇرىلىمنىڭ قولجەتىمدىلىگىن ارتتىرۋدى تالاپ ەتەدى.
ايتا كەتەيىك, وتكەن جىلى ماجىلىستە مۇمكىندىگى شەكتەۋلى ادامداردىڭ قۇقىقتارى مەن مۇددەلەرىن قورعاۋ باعىتىندا ەلەۋلى جۇمىس اتقارىلعان. جيىرماعا جۋىق دەپۋتاتتى بىرىكتىرەتىن «ينكليۋزيۆتى پارلامەنت» توبى بارلىق زاڭ جوباسىن وسى ساناتتاعى ازاماتتاردىڭ قۇقىقتارى مەن مۇددەلەرىن ەسكەرە وتىرىپ قاراستىرادى. دەپۋتاتتاردىڭ باستاماسىمەن تۇرعىن ءۇي زاڭناماسىنا I جانە II توپتاعى مۇگەدەكتىگى بار ازاماتتارعا, سونداي-اق مۇگەدەك بالالارى بار وتباسىلارعا باسپانانى ءبىرىنشى كەزەكتە الۋ قۇقىعىن بەكىتەتىن نورمالار ەنگىزىلدى. حالىق قالاۋلىلارىنىڭ قولداۋىمەن جوعارى وقۋ ورىندارىنا مۇمكىندىگى شەكتەۋلى ازاماتتاردى قابىلداۋ كۆوتاسى 1 پايىزدان 2 پايىزعا دەيىن ۇلعايتىلعان.
