سۋرەت: instagram.com/amanat.partiyasy
قالالىق جول-كولىك ينفراقۇرىلىمىن جاڭعىرتۋ جوباسى اياسىندا مومىنوۆ كوشەسىندە سالىنىپ جاتقان ءتورت جولاقتى وتكەلدە جاياۋ جۇرگىنشىلەرگە ارنالعان جول جانە باعدارشامدار ورناتىلادى. قۇرىلىس وتكەن جىلى قاراشادا باستالدى, قازىرگى تاڭدا نىساننىڭ 50 پايىزى دايىن. مەردىگەر ۇيىمنىڭ مالىمەتىنشە, جۇمىس جوسپارعا سايكەس ءجۇرىپ جاتىر.
– جول وتكەل «Amanat» پارتياسىنىڭ سايلاۋالدى باعدارلاماسى اياسىندا سالىنىپ جاتىر. بۇل – سايلاۋشىلارعا بەرگەن ناقتى ۋادەلەرىمىزدىڭ ءبىرى. مەن وسى جوبانىڭ باعدارلاماعا ەنۋىنە باستاماشى بولىپ, قارجى بولىنۋىنە ىقپال ەتتىم. قازىر نىساننىڭ قۇرىلىسى ءساتتى ىسكە اسۋدا, ونى جەكە باقىلاۋىمدا ۇستايمىن, – دەدى ب.ناجمەتدين ۇلى.
سونىمەن قاتار تىلەنشين كوشەسىندە وسىعان ۇقساس جول وتكەلى سالىنىپ جاتىر, ونىڭ دايىندىعى – 20 پايىز. ەكى نىسان دا 2026 جىلدىڭ اياعىنا دەيىن پايدالانۋعا بەرىلەدى.
ال ءماجىلىس دەپۋتاتى, «Amanat» پارتياسى فراكتسياسىنىڭ مۇشەسى سامات مۇساباەۆ جاڭاوزەن قالاسىنا باردى. مۇندا دەپۋتات گاز وڭدەۋ زاۋىتىنىڭ قۇرىلىس بارىسىن باقىلادى. اتالعان جوعارى تەحنولوگيالىق نىسان پارتيانىڭ سايلاۋالدى باعدارلاماسى اياسىندا بوي كوتەرىپ جاتىر. جوبا قۇنى 216,8 ملرد تەڭگەنى قۇرايدى. جاڭا نىساننىڭ قۋاتى جىلىنا 900 ميلليون تەكشە مەتر تابيعي جانە ىلەسپە گاز وندىرۋگە قاۋقارلى. بۇل – ەلىمىز ءۇشىن اسا ماڭىزدى ستراتەگيالىق نىسان. سوندىقتان جوبانى 2027 جىلعا دەيىن ىسكە قوسۋ كوزدەلىپ وتىر.
– جاڭاوزەن قالاسىندا جۇمىس ىستەپ تۇرعان ەسكى «قازاق گاز وڭدەۋ زاۋىتى» سوناۋ 1973 جىلى اشىلعان ەدى. ءوندىرىس قۋاتىن ارتتىرۋ ماقساتىمەن سالىنىپ جاتقان جاڭا زاۋىت سۇيىتىلعان گاز تاپشىلىعىن جويادى. نىسان قۇرىلىسى تالاپقا ساي سالىنىپ, بەلگىلەنگەن مەرزىمدە اياقتالۋعا ءتيىس, – دەدى دەپۋتات س.مۇساباەۆ.
«Respublica» پارتياسىنان سايلانعان ءماجىلىس دەپۋتاتى ەكاتەرينا سمولياكوۆا جۇمىس ساپارىمەن شىعىس قازاقستان وبلىسىندا ءجۇر. ساپار بارىسىندا ول ىشكى ءتۋريزمنىڭ جاي-كۇيىن زەرتتەپ, جەرگىلىكتى كاسىپكەرلەرمەن, تۇرعىندارمەن كەزدەستى.
ەكاتەرينا سمولياكوۆا قاتونقاراعاي مەن ۇلكەن نارىن اۋداندارىنا جانە بۇقتىرما سۋ قويماسىنىڭ جاعالاۋىنا باردى. سونداي-اق وبلىستىق كاسىپكەرلەر پالاتاسىنىڭ تۋريزم كەڭەسىمەن سالانىڭ وزەكتى ماسەلەلەرىن تالقىلادى. اتاپ ايتقاندا, باس جوسپاردىڭ بولماۋى, جارىقتىڭ ءجيى ءوشۋى, ينتەرنەت پەن بايلانىس ساپاسىنىڭ تومەندىگى, ينفراقۇرىلىمنىڭ السىزدىگى جانە تابيعاتقا ۇقىپتى قاراۋ مادەنيەتىنىڭ جەتكىلىكسىزدىگى. بۇل فاكتورلار تابيعي جانە ەكونوميكالىق الەۋەتى زور وڭىردە ءتۋريزمنىڭ دامۋىن تەجەپ وتىرعانى انىق.
– كاسىپكەرلەر ينۆەستيتسيا سالۋعا دايىن, تۋريستەر كەلگىسى كەلەدى. بىراق قاي جەردە قۇرىلىس جۇرگىزۋگە بولاتىنى, قانداي نىساندار جوسپارلانعانى بەلگىسىز. جارىق جوق, ينتەرنەت ناشار. بۇل – ءوڭىردى ىلگەرىلەتۋدىڭ ماڭىزدى قۇرالى. مەملەكەت تاراپىنان باعدارلامالار مەن قولداۋ شارالارى بولعانىمەن, شقو-نىڭ تۋريزم الەۋەتى ءالى تولىق جۇزەگە اسىرىلماعان, – دەدى دەپۋتات.
ءماجىلىس دەپۋتاتى, جسدپ فراكتسياسىنىڭ مۇشەسى نۇرلان اۋەسباەۆ قوستاناي وبلىسىنا جۇمىس ساپارى بارىسىندا «بيلىك. حالىق. ىنتىماق» اتتى ايماقتىق كونفەرەنتسياعا قاتىستى. ءىس-شارادا قاتىسۋشىلار كوپپاتەرلى تۇرعىن ءۇيدى باسقارۋ جانە م ۇلىك يەلەرى بىرلەستىكتەرىنىڭ (ميب) قىزمەتىن ۇيىمداستىرۋ ماسەلەلەرىنە ايرىقشا نازار اۋداردى. «مەنىڭ ءۇيىم» قوستاناي وبلىستىق قاۋىمداستىعىنىڭ توراعا مىندەتىن اتقارۋشى سايلاۋ اسىلباەۆ وسى سالاداعى پروبلەمالاردىڭ ءالى دە وزەكتى ءارى وتكىر كۇيىندە تۇرعانىن ايتتى.
– قوستاناي وبلىسىنداعى كوپقاباتتى ۇيلەردىڭ جارتىسىنان استامى ءالى كۇنگە دەيىن باسقارۋ نىسانىن ايقىنداماعان. سونىڭ سالدارىنان اۋلالار اباتتاندىرىلماي, جوندەۋ جۇمىستارى سوزىلىپ كەلەدى, ال تۇرعىندار ءوز قارجىسىنىڭ قايدا جۇمسالىپ جاتقانىن بىلمەيدى. م ۇلىك يەلەرى بىرلەستىكتەرى مەن قاراپايىم تۇرعىندارعا ساۋاتتى كەڭەس, جۇيەلى باقىلاۋ جانە تۇراقتى قولداۋ قاجەت. ءبىز دەپۋتاتتارمەن, جەرگىلىكتى بيلىك ورگاندارىمەن بىرلەسە وتىرىپ, بۇل سالادا ءتارتىپ ورناتۋعا دايىنبىز. ەگەر تۇرعىندار ناقتى ناتيجەنى كورسە, ميب-كە دە, كوندومينيۋمدارعا دا دەگەن سەنىم ارتا تۇسەر ەدى, – دەدى ول.
بۇدان بولەك نۇرلان اۋەسباەۆ «اۋەجاي» شاعىن اۋدانىنىڭ باستاپقى پارتيا ۇيىمى بەلسەندىلەرىمەن جۇزدەستى. كەزدەسۋ بارىسىندا ۇيىمنىڭ ستراتەگيالىق مىندەتتەرى, الداعى جوسپارلارى جانە تۇرعىنداردى قوعامدىق باستامالارعا كەڭىنەن تارتۋ تەتىكتەرى ءسوز بولدى.
