ساپار بارىسىندا دەپۋتات بۇقتىرما سۋ قويماسىنىڭ جاعالاۋىن ارالاپ, وبلىستىق كاسىپكەرلەر پالاتاسىنىڭ تۋريزم كەڭەسىمەن كەزدەسىپ, سالاداعى قوردالانعان ماسەلەلەردى تالقىلادى. ولاردىڭ قاتارىندا ءوڭىردى دامىتۋعا ارنالعان باس جوسپاردىڭ جوقتىعى, ەلەكتر قۋاتىنىڭ ءجيى اجىراۋى, ينتەرنەت پەن بايلانىس ساپاسىنىڭ تومەندىگى, ينفراقۇرىلىمنىڭ السىزدىگى جانە تابيعاتتى ايالاۋ مادەنيەتىنىڭ جەتكىلىكسىزدىگى بار. بۇل تۇيتكىلدەر تابيعي بايلىعى مول ايماقتاعى ءتۋريزمنىڭ وركەندەۋىنە ەلەۋلى كەدەرگى كەلتىرىپ وتىر.
«كاسىپكەرلەر ينۆەستيتسيا قۇيۋعا ءازىر, تۋريستەر كەلۋگە ىنتالى. بىراق قاي جەردە قانداي قۇرىلىس جۇرگىزىلەتىنى, قانداي نىساندار جوسپارلانعانى بەلگىسىز. جارىق ءجيى سونەدى, ينتەرنەت ساپاسى ناشار. ماسەلەن, ۇلكەن نارىنداعى ۆيزيت-ورتالىقتا تۋريستەر ارنايى ىزدەيتىن جەرگىلىكتى بال, پانتوكرين, قايىڭ قابىعىنان نەمەسە سازدان جاسالعان بۇيىمدار مۇلدە جوق. ال التايعا كەلگەن قوناق ساپاردان ەستەلىك, سىيلىقسىز كەتكىسى كەلمەيدى. مۇنداي ونىمدەر – ءوڭىردى تانىتۋدىڭ ماڭىزدى قۇرالى», دەدى دەپۋتات.
ەكاتەرينا سمولياكوۆانىڭ ايتۋىنشا, مەملەكەت تاراپىنان ءتۇرلى باعدارلامالار مەن قولداۋ شارالارى قاراستىرىلعانىمەن, شىعىس قازاقستاننىڭ تۋريزم الەۋەتى تولىق پايدالانىلماي وتىر. سوڭعى ءتورت جىلدا ەلىمىزدىڭ ىشكى جالپى ونىمىندەگى ءتۋريزمنىڭ ۇلەسى 3,7%-دان 3,2%-عا تومەندەگەن. بۇل كورسەتكىش – الەمدىك ورتاشا دەڭگەيدەن ءۇش ەسەدەي از, سونداي-اق كليماتى ۇقساس كورشى مەملەكەتتەردەن دە ارتتا قالىپ كەلەدى.
«دۇنيەجۇزىندە تۋريزم – جۇمىس ورىندارىنىڭ 10 پايىزى, ەكسپورتتىڭ 30 پايىزى, ينۆەستيتسيانىڭ 7 پايىزى. بىزدە دە تابيعي جانە مادەني بايلىق جەتكىلىكتى. تەك جۇيەلى قادامدار مەن ساپالى سەرپىلىس قاجەت», دەپ تۇيىندەدى حالىق قالاۋلىسى.
بۇعان دەيىن دەپۋتات ماڭعىستاۋ جانە الماتى وبلىستارىنداعى تۋريستىك ايماقتاردى ارالاپ, ينفراقۇرىلىم, قىزمەت كورسەتۋ ساپاسى, ەكولوگيا جانە ءتۋريزمدى ىلگەرىلەتۋ ماسەلەلەرىن كوتەرگەن ەدى. شىعىستاعى جۇمىس ساپارى دا جالعاسىپ, الداعى كۇندەرى تۇرعىندار مەن كاسىپكەرلەردىڭ ۇسىنىستارى تىڭدالادى. جينالعان پىكىرلەر مەن ۇسىنىستار پارلامەنتتە تالقىلاۋعا ۇسىنىلماق.
