فوتولار: primeminister.kz
ولجاس بەكتەنوۆ قىرعىز رەسپۋبليكاسىمەن مەملەكەتتىك شەكاراداعى «قورداي» جانە «قاراسۋ» اۆتوكولىك وتكىزۋ بەكەتتەرىندە بولىپ, وتكىزۋ پۋنكتتەرىنىڭ ينفراقۇرىلىمىمەن, پروبلەمالارىمەن جانە ودان ءارى دامىتۋ جوسپارلارىمەن تانىستى.
كولىك ءمينيسترى نۇرلان ساۋرانباەۆ پەن قر ۇقك شەكارا قىزمەتى ديرەكتورىنىڭ ورىنباسارىنىڭ ۋاقىتشا مىندەتىن اتقارۋشى ۇلان ابيكوۆ وتكىزۋ بەكەتتەرىندەگى جاعداي تۋرالى باياندادى. ودان بولەك, پرەمەر-ءمينيستردىڭ تاپسىرماسى بويىنشا جۇرگىزىلگەن جۇمىس بابىنداعى تەكسەرۋلەردىڭ قورىتىندىسى تۋرالى ەسەپتەر تىڭدالدى.
ەاەو ەلدەرىمەن شەكارادا 39 اۆتوكولىك وتكىزۋ پۋنكتى ورنالاسقان. ولاردىڭ ەكەۋىندە جوندەۋ جۇمىستارى تولىعىمەن اياقتالدى. جاڭعىرتۋ ون پۋنكتتە, ونىڭ ىشىندە قازاقستان–رەسەي شەكاراسىندا باستالدى. رەكونسترۋكتسيالاۋ جۇمىستارىمەن باسقا دا وتكىزۋ پۋنكتتەرى قامتىلادى.
«قورداي» ءاوب-تە بۇعان دەيىن جۇرگىزىلگەن رەكونسترۋكتسيا ناتيجەسىندە قوزعالىس جولاقتارىنىڭ سانى 4-تەن 8-گە, تولقۇجاتتىق قاداعالاۋ كابينالارىنىڭ سانى 20-دان 40-قا دەيىن ارتتى. وتكىزۋ قابىلەتى جولاۋشىلار اعىنى بويىنشا 4 ەسەگە, اۆتوكولىك بويىنشا 2,7 ەسەگە ءوستى.
«قاراسۋ» پۋنكتى بويىنشا جاڭعىرتۋ جۇمىستارى باستالدى, بۇل وتكىزۋ قابىلەتىن تاۋلىگىنە 700-دەن 2 مىڭنان استام كولىك قۇرالىنا دەيىن ارتتىرۋعا مۇمكىندىك بەرەدى. سونداي-اق جۇك اعىنى مەن كولىك قوزعالىسىن جاقسارتۋ ءۇشىن دە جاعدايلار جاسالماق. جوبا شەكارانىڭ وتكىزۋ ينفراقۇرىلىمىن قازىرگى زامانعى تالاپتارعا ساي ۇلعايتۋعا باعىتتالعان.
پرەمەر-مينيستر شەكارا نىساندارى ترانسشەكارالىق ىنتىماقتاستىقتى دامىتۋدا ماڭىزدى ءرول اتقاراتىنىن جانە حالىقارالىق اۆتوموبيل جانە جولاۋشىلار قاتىناسىن قامتاماسىز ەتەتىنىن اتاپ ءوتتى. ولارعا رەكونسترۋكتسيا جۇرگىزۋ مەملەكەت باسشىسىنىڭ باقىلاۋىندا تۇر.
ولجاس بەكتەنوۆ جوندەۋ جۇمىستارىنىڭ ساپالى ءارى ۋاقتىلى ورىندالۋىن قامتاماسىز ەتۋدى, سونداي-اق راسىمدەۋ جۇمىستارىن جەدەلدەتۋ بويىنشا تسيفرلىق تەحنولوگيالاردى ەنگىزۋدى جانداندىرۋدى تاپسىردى. سونداي-اق ازاماتتار مەن سىرتقى ەكونوميكالىق قىزمەتكە قاتىسۋشىلار ءۇشىن قاۋىپسىزدىكتى قامتاماسىز ەتۋ جانە جايلىلىقتى ارتتىرۋ ماقساتىندا جاعداي جاساۋ جونىندە بىرقاتار تاپسىرما بەرىلدى.
ساپار بارىسىندا «باتىس ەۋروپا – باتىس قىتاي» حالىقارالىق ءدالىزىنىڭ قۇرامىندا تاۋارلاردى ساقتاۋ, وڭدەۋ, شوعىرلاندىرۋ جانە وتكىزۋدىڭ نەگىزگى ورتالىعىنا اينالاتىن يندۋستريالىق-ساۋدا-لوگيستيكالىق كەشەن سالۋ جوباسىن جۇزەگە اسىرۋ تۋرالى باياندالدى. ولجاس بەكتەنوۆ قۇرىلىس جۇمىستارىنىڭ مەرزىمى سوزىلىپ كەتۋىنە بايلانىستى سىن ايتىپ, قىسقا مەرزىمدە ءتيىستى شارالار قابىلداۋدى جانە جۇمىس ساپاسى مەن قارقىنىن قاداعالاۋدى كۇشەيتۋدى تاپسىردى.
