ءبىلىم مەن تاربيەنىڭ قاتار ورىلگەن كەڭ ورىسىندە ءار بالانىڭ بويىنداعى تالانت پەن قابىلەتتى دەر كەزىندە بايقاپ, دۇرىس باعىتقا جەتەلەۋ – ۇستازدىڭ دا, قوعامنىڭ دا باستى مىندەتى. وسى جولدا ۇيىرمە جۇمىستارى – وقۋشىنىڭ ىشكى الەۋەتىن اشىپ, ونى بولاشاققا سەنىممەن جەتەلەيتىنىن ەرەكشە اتاپ وتكەن ءجون.
بىلتىر قاراشا ايىندا شىمكەنت قالاسىنداعى №140 جالپى ورتا ءبىلىم بەرەتىن مەكتەپ ءوز جۇمىسىن رەسمي تۇردە باستادى. سالتاناتتى اشىلۋ راسىمىنە قالا اكىمدىگى وكىلدەرى, ۇستازدار قاۋىمى, اتا-انالار مەن وقۋشىلار قاتىستى. جاڭا مەكتەپتىڭ اشىلۋى – ءبىلىم ساپاسىن ارتتىرۋعا باعىتتالعان ماڭىزدى قادام. زاماناۋي تالاپتارعا ساي جابدىقتالعان وقۋ كابينەتتەرى, زەرتحانالار مەن شىعارماشىلىق الاڭدار وقۋشىلاردىڭ جان-جاقتى دامۋىنا مۇمكىندىك بەرەدى.
ءبىزدىڭ №140 جالپى ورتا ءبىلىم بەرەتىن مەكتەپ بازاسىندا جۇمىس ىستەيتىن ۇيىرمەلەر وقۋشىلاردىڭ قىزىعۋشىلىعى مەن بەيىمدىلىكتەرىن ەسكەرە وتىرىپ ۇيىمداستىرىلدى. ۇيىرمەگە قاتىسۋشىلار جىل بويى ءتۇرلى تاقىرىپتاردا جوبالار جاساپ, بايقاۋلار مەن ءتۇرلى سپورتتىق جارىستارعا قاتىسىپ, جوعارى ناتيجەلەرگە قول جەتكىزدى.
اتاپ ايتقاندا, فۋتبول, باسكەتبول, توعىزقۇمالاق, شاحمات, بەس اسىق, ۇستەل تەننيسى, ۆولەيبول سەكىلدى سپورت تۇرلەرىنەن ۇيىرمەلەر اشىلىپ, وعان مەكتەپتىڭ 296 وقۋشىسى تۇراقتى تۇردە قاتىسىپ كەلەدى. ساباقتار اپتاسىنا ءبىر رەت وتكىزىلىپ, دەنەشىنىقتىرۋ-ساۋىقتىرۋ جۇمىستارىنىڭ كەشەندى تۇردە ۇيىمداستىرىلۋىنا, وقۋشىلاردىڭ دەنساۋلىعىن نىعايتۋعا, سالاماتتى ءومىر سالتىن قالىپتاستىرۋعا باعىتتالدى.
وقۋشىلاردىڭ تانىمدىق بەلسەندىلىگىن ارتتىرۋ, شىعارماشىلىق قابىلەتىن دامىتۋ, وزدىگىنەن ەڭبەك ەتۋ داعدىلارىن قالىپتاستىرۋ, ىسكەرلىگىن جەتىلدىرۋ – قوسىمشا ءبىلىم بەرۋ ۇدەرىسىنىڭ باستى ماقساتى. وسى باعىتتا بيىل 9 قاڭتاردا وتكەن №2 پەداگوگيكالىق كەڭەستىڭ شەشىمى نەگىزىندە مەكتەپتە بىرقاتار جاڭا ۇيىرمە ءوز جۇمىسىن باستادى. قاڭتار ايىنان باستاپ مەكتەبىمىزدە سپورتتىق, شىعارماشىلىق جانە عىلىمي تەحنيكالىق باعىتىنداعى ۇيىرمەلەر جۇمىس ىستەيدى. بۇگىندە مەكتەپتە جالپى 23 ۇيىرمە جۇمىس ىستەيدى. ولارعا 1-11-سىنىپ ارالىعىنداعى 505 وقۋشى قامتىلىپ, ءوز قابىلەتتەرىن شىڭداپ كەلەدى.
دەنە تاربيەسى – جاس ۇرپاقتىڭ دەنساۋلىعىن نىعايتىپ, جىگەرىن شىڭدايتىن, رۋحاني جانە تۇلعالىق دامۋىنا اسەر ەتەتىن ماڭىزدى باعىتتىڭ ءبىرى. سپورت – تەك كۇش-قۋاتتى عانا ەمەس, تارتىپتىلىك پەن تاباندىلىقتى تالاپ ەتەتىن ءومىر سالتى. وسى ماقساتتا مەكتەپ جانىندا جۇمىس ىستەيتىن سپورت ۇيىرمەسى جىل بويىنا ناتيجەلى ءارى جۇيەلى جۇمىس جۇرگىزىپ, وقۋشىلاردىڭ سپورتقا دەگەن قىزىعۋشىلىعىن ارتتىرىپ, ولاردىڭ شەبەرلىگىن جەتىلدىرۋگە ۇلەس قوستى.
بىلتىر قاراشا جانە جەلتوقسان ايلارىندا مەكتەپىشىلىك فۋتبول جانە ۆولەيبول جارىستارى ءوتتى. «سپورت – ءبىزدىڭ سەنىمدى سەرىگىمىز» اتتى بۇل سايىستار وقۋشىلاردىڭ سپورتقا دەگەن قىزىعۋشىلىعىن وياتىپ, كوماندالىق رۋحتى نىعايتتى. جارىس ناتيجەسىندە ۇزدىك ويىنشىلار مەن كوماندالار انىقتالىپ, جۇلدەلى ورىندار مەن ماداقتامالار تابىستالدى.
بيىلعى ءساۋىر ايىندا شىمكەنت قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىندە «NIS PhM Shymkent CHESS OPEN CUP 2025» اتتى شاحمات ءتۋرنيرى ءوتتى. بۇل بەدەلدى جارىسقا №140 مەكتەپتىڭ نامىسىن قورعاعان دارىندى شاحماتشىلار – مەرەي ەرسەيت, فەرۋزا ۋرال, ايسۇلتان توقتامىس قاتىسىپ, جوعارى دەڭگەيدە ونەر كورسەتتى. سونداي-اق 1 مامىر – قازاقستان حالىقتارىنىڭ بىرلىگى كۇنى مەرەكەسىنە وراي, №118 كوكبۇلاق جالپى ورتا ءبىلىم بەرەتىن مەكتەبىندە فۋتبولدان جارىس ۇيىمداستىرىلدى. بۇل سايىس ء«بىرتۇتاس تاربيە» باعدارلاماسى اياسىندا ءوتتى. وسىندا №140 مەكتەپتىڭ 7-8-سىنىپ وقۋشىلارى تارتىستى ويىن كورسەتىپ, جۇلدەلى ءىى ورىندى يەلەندى. كوماندا جەتەكشىسى اسحات ۇمبەتباەۆ پەن جاس فۋتبولشىلار ماداقتامالارمەن ماراپاتتالدى.
سپورت – تەك دەنساۋلىق كەپىلى عانا ەمەس, تاربيە مەن رۋحاني دامۋدىڭ ماڭىزدى قۇرالى. №140 مەكتەپ ۇجىمى الداعى ۋاقىتتا دا سپورتتىق باعىتتاعى جۇمىستاردى جانداندىرىپ, وقۋشىلاردىڭ قابىلەتىن شىڭداۋعا كۇش سالماق. سونىمەن قاتار وسى جىلعى 4 ناۋرىزدا شىمكەنت قالاسىندا ۇلتتىق مەكتەپ ليگاسىنىڭ قالالىق كەزەڭىنىڭ اشىلۋ سالتاناتى مەكتەبىمىزدە ءوتتى. بۇل دوداعا №55 مەكتەپتەن توعىزقۇمالاق جانە باسكەتبول, فۋتبول ۇيىرمەلەرىنىڭ مۇشەلەرى قاتىستى.توعىزقۇمالاق ۇيىرمەسى – ۇلتتىق ويىنىمىزدى دارىپتەپ, باسەكەلەستىك رۋحتى وياتتى. باسكەتبول ۇيىرمەسىنىڭ كومانداسى اۋداندىق كەزەڭدە 1-ورىن يەلەنىپ, قالالىق جارىسقا جولداما الدى. فۋتبول ۇيىرمەسى وقۋشىلارى اباي اۋدانى بويىنشا 2-ورىن يەلەندى.
فۋتبول جانە ۆولەيبول ۇيىرمەلەرى دە وقۋشىلاردىڭ دەنەشىنىقتىرۋ مەن كوماندالىق رۋحىن قالىپتاستىرۋدا ماڭىزدى ءرول اتقاردى. ۆولەيبول ۇيىرمەسىنىڭ جەتەكشىسى ءالىبي دۇيسەبەكوۆ وقۋشىلاردىڭ شەبەرلىگىن ارتتىرۋ ماقساتىندا مەكتەپىشىلىك جاتتىعۋلارمەن قاتار, №54 جالپى ورتا ءبىلىم بەرەتىن مەكتەپ وقۋشىلارىمەن جولداستىق كەزدەسۋلەر ۇيىمداستىردى. بۇل – سپورت ارقىلى دوستىق پەن ىنتىماقتاستىقتى نىعايتۋدىڭ تاماشا ۇلگىسى.
سپورتتىق ۇيىرمەلەر – جاسوسپىرىمدەردىڭ دەنساۋلىعىن نىعايتىپ قانا قويماي, ولاردىڭ بويىنا تاباندىلىق, توزىمدىلىك, ءوزارا سىيلاستىق جانە جەڭىسكە دەگەن جىگەرلى رۋح قالىپتاستىراتىن تاربيە وشاعى. مەكتەپتە جۇرگىزىلىپ وتىرعان سپورتتىق ۇيىرمەلەر مەن جارىستار وقۋشىلاردىڭ ۇلكەن جەتىستىكتەرگە جەتۋىنە باستار العاشقى قادامداردىڭ ءبىرى.
قازىرگى ءبىلىم مەن تاربيە جۇيەسىندە وقۋشىلاردىڭ شىعارماشىلىق قابىلەتىن دامىتۋدىڭ, ولاردىڭ ونەرگە دەگەن قىزىعۋشىلىعىن ارتتىرۋدىڭ ءبىر جولى – دراما ۇيىرمەسى. دراما ونەرى – تەك ساحنادا ويناۋ عانا ەمەس, ول – بالانىڭ جان دۇنيەسىن بايىتىپ, ءسوز ساپتاۋىن, ساحنا ءتىلى مەن مادەنيەتىن قالىپتاستىراتىن ماڭىزدى سالا. دراما ۇيىرمەسى بيىلعى وقۋ جىلىندا دا جەمىستى ەڭبەك ەتىپ, وقۋشىلاردىڭ ونەرگە دەگەن ىنتاسىن ارتتىرىپ, ولاردىڭ شىعارماشىلىق قابىلەتتەرىن دامىتتى.
جىل بويىندا ۇيىرمە مۇشەلەرى مىناداي باعىتتاردا جۇمىس اتقاردى: ءبىرىنشى, ساحنا مادەنيەتى مەن اكتەرلىك شەبەرلىكتى ۇيرەنۋ, ەكىنشى, داۋىس ىرعاعى, ميميكا جانە پانتوميميكا جاتتىعۋلارىن ورىنداۋ, ءۇشىنشى, كلاسسيكالىق جانە زاماناۋي شىعارمالاردان ۇزىندىلەر دايىنداۋ, ءتورتىنشى, مەكتەپىشىلىك جانە اۋداندىق مادەني ءىس-شارالارعا بەلسەنە قاتىسۋ.
بيىلعى اقپان ايىندا №140 جالپى ورتا ءبىلىم بەرەتىن مەكتەبى مەن №2 بالالار ساز مەكتەبى اراسىندا ءوزارا ىنتىماقتاستىق تۋرالى كەلىسىمشارت جاسالىپ, وقۋشىلاردىڭ شىعارماشىلىق جانە سپورتتىق قابىلەتتەرىن دامىتۋعا باعىتتالعان جاڭا مۇمكىندىكتەر اشىلدى. كەلىسىمشارت نەگىزىندە اشىلعان دومبىرا جانە ءداستۇرلى ءان ۇيىرمەلەرىنە 70-كە جۋىق وقۋشى قاتىسىپ, ۇلتتىق ونەردىڭ قىر-سىرىن مەڭگەرىپ وتىر.
دومبىرا — قازاق حالقىنىڭ رۋحاني قازىناسى, ۇلتتىق بولمىستىڭ ءرامىزى. ەل تاريحى مەن حالىقتىڭ مۇڭىن, قۋانىشىن كۇيمەن جەتكىزەتىن بۇل اسپاپتى جاس ۇرپاققا ۇيرەتۋ — ۇلت تاربيەسىنىڭ اجىراماس بولىگى. وسى ورايدا مەكتەپ جانىنان قۇرىلعان دومبىرا ۇيىرمەسى وقۋشىلارعا ۇلتتىق مۋزىكالىق مۇرانى ۇيرەتىپ قانا قويماي, ولاردىڭ ونەرگە دەگەن قىزىعۋشىلىعىن ارتتىرۋدا ماڭىزدى ءرول اتقارىپ كەلەدى.
دومبىرا ۇيىرمەسىنىڭ قاتىسۋشىلارى جىل بويى مەكتەپىشىلىك جانە قالالىق مادەني ءىس-شارالارعا بەلسەنە قاتىسىپ, ونەرلەرىمەن كوپشىلىكتىڭ ىقىلاسىنا بولەندى. بۇل ۇيىرمەلەر – ۇلتتىق مۇرانى دارىپتەۋدىڭ جانە جاس بۋىنعا رۋحاني تاربيە بەرۋدىڭ جارقىن ۇلگىسى.
مەكتەپ پەن ساز مەكتەبى اراسىنداعى سەرىكتەستىك – وقۋشىلاردىڭ جان-جاقتى دامۋىنا, ونەر مەن سپورتتى قاتار ۇشتاستىرۋىنا مۇمكىندىك بەرەتىن ماڭىزدى باستاما. الداعى ۋاقىتتا بۇل باعىتتاعى جۇمىستار ودان ءارى جالعاسىن تابادى.
بۇگىنگى زامان — ءبىلىم مەن لوگيكانىڭ, وي مەن ءسوزدىڭ باسەكەگە تۇسكەن زامانى. وقۋشىلاردىڭ سىني ويلاۋ قابىلەتىن دامىتىپ, ءوز كوزقاراسىن ەركىن بىلدىرۋگە, ناقتى دالەلدەرمەن قورعاۋعا ۇيرەتەتىن ءتيىمدى قۇرالداردىڭ ءبىرى – پىكىرسايىس (دەبات) ۇيىرمەسى. بۇل ۇيىرمە وقۋشىلاردىڭ ءبىلىم دەڭگەيىن ارتتىرىپ قانا قويماي, ولاردىڭ كوشباسشىلىق, زەرتتەۋ, ساۋاتتى سويلەۋ جانە كوماندادا جۇمىس ىستەۋ داعدىلارىن قالىپتاستىرادى.
مەكتەپ جانىنان قۇرىلعان پاندىك دەبات ۇيىرمەسى 2024–2025 وقۋ جىلىندا بەلسەندى جۇمىس ىستەدى. ۇيىرمە جۇمىسى ايىنا 2 رەت وتكىزىلىپ, ءار ءپان بويىنشا (مىسالى, تاريح, گەوگرافيا, ادەبيەت, بيولوگيا, ت.ب.) ءتۇرلى تاقىرىپتاردا دەبات فورماتىنداعى كەزدەسۋلەر ۇيىمداستىرىلدى. جىل بويى وتكەن دەباتتاردىڭ تاقىرىپتارى زاماناۋي ماسەلەلەر مەن وقۋ باعدارلاماسىنا ساي سۇراقتاردى قامتىدى. بۇل تاقىرىپتار وقۋشىلاردىڭ تەك پاندىك ءبىلىمىن عانا ەمەس, سونىمەن قاتار ولاردىڭ ويلاۋ مادەنيەتىن, لوگيكالىق جانە سىني كوزقاراسىن دامىتۋعا ىقپال ەتتى.
«ۇيىرمەدەن – ۇلكەن جەتىستىككە» دەگەن ۇستانىم – ءبىزدىڭ وقۋشىلارىمىزدىڭ شىنايى ومىرلىك تاجىريبەسى. سەبەبى ۇيىرمەدە العان ءبىلىم, داعدى جانە تاربيە – ەرتەڭگى كۇندە ولاردىڭ كاسىبي جولىنا, تۇلعالىق دامۋىنا جانە ازاماتتىق قالىپتاسۋىنا مىقتى ىرگەتاس بولماق. جاس ۇرپاقتىڭ قاناتىن كەڭگە جايىپ, ارمان بيىگىنە ۇمتىلۋىنا جول اشاتىن وسىنداي شىعارماشىلىق پەن ىزدەنىس الاڭى ءاردايىم ءوز جەمىسىن بەرە بەرەتىنى ءسوزسىز.
ايكۇمىس كارىباەۆا,
№140 جالپى ورتا ءبىلىم بەرەتىن مەكتەپ ديرەكتورى
شىمكەنت
