بۇل شەشىم وقۋ ورنىنىڭ اكادەميالىق جانە عىلىمي دەربەستىگىن كەڭەيتۋگە, قوسىمشا رەسۋرستار مەن ۇزدىك عالىمداردى تارتۋعا, حالىقارالىق ءبىلىم بەرۋ كەڭىستىگىندەگى پوزيتسياسىن نىعايتۋعا مۇمكىندىك بەرەدى. سونداي-اق يننوۆاتسيالىق باعدارلامالاردى ەنگىزۋ, وزىق عىلىمي زەرتتەۋلەر جۇرگىزۋ جانە باسەكەگە قابىلەتتى ماماندار دايارلاۋ باعىتىندا جاڭا مۇمكىندىكتەر اشادى.
ەندى وقۋ ورنىنىڭ اتاۋى – اكادەميك ە.ا. بوكەتوۆ اتىنداعى قاراعاندى ۇلتتىق زەرتتەۋ ۋنيۆەرسيتەتى. ول ەلىمىزدەگى ۇلتتىق مارتەبەگە يە بولعان 18-ءشى ۋنيۆەرسيتەت اتاندى.
قاراعاندى وبلىسىنىڭ اكىمى ەرماعانبەت بولەكپاەۆ جوعارى وقۋ ورنى ۇجىمىن ايتۋلى وقيعامەن قۇتتىقتادى.
– ءبىزدىڭ ۋنيۆەرسيتەت وسىنداي مارتەبەگە يە بولعان ەلدەگى ون سەگىزىنشى وقۋ ورنى بولدى. بۇل – جەتىستىكتەردىڭ جوعارى باعالانۋى عانا ەمەس, سونىمەن بىرگە عىلىم, ءبىلىم جانە كاسىبي ءوسىم ءۇشىن جاڭا كوكجيەكتەر. ۋنيۆەرسيتەت ۇجىمىن جانە ستۋدەنتتەرىن وسى ماڭىزدى وقيعامەن شىن جۇرەكتەن قۇتتىقتايمىن, – دەدى ول.
جاڭا مارتەبە ۋنيۆەرسيتەتتىڭ وتاندىق عىلىم مەن ءبىلىمنىڭ دامۋىنا قوسقان ايرىقشا ۇلەسىنىڭ مويىندالۋى بولىپ وتىر.
اتالعان وقۋ ورنىنىڭ تاريحى 1938 جىلدان باستاۋ الادى. ول كەزدە پەداگوگيكالىق ينستيتۋت رەتىندە اشىلعان بولاتىن. 1972 جىلى ۋنيۆەرسيتەت مارتەبەسى بەرىلدى. سول كەزدە قازاقستاندا تەك ەكى ۋنيۆەرسيتەت – قازمۋ مەن قارمۋ عانا بولدى, قالعان جوعارى وقۋ ورىندارى ينستيتۋت ساناتىندا ەدى.
وتكەن جىلى ۋنيۆەرسيتەت زەرتتەۋ ۋنيۆەرسيتەتى مارتەبەسىن العان ەدى.
