سۋرەت: dknews.kz
الەمنىڭ تۇكپىر-تۇكپىرىنەن كەلگەن مىڭداعان اسىل تۇقىمدى يت باق سىناعان اۋقىمدى ءىس-شارادا قازاقى تازىلاردىڭ ماڭدايى جارقىراپ, قانجىعامىزعا بەس بىردەي جۇلدە بايلاندى.
راس, ونەر تىلىمەن ايتقاندا, حەلسينكيدەگى الەمدىك پرەمەرامىز تازىنىڭ تەكتى تۇقىمىن مويىنداتىپ قانا قويماي, ۇلتتىق قۇندىلىعىمىزدىڭ حالىقارالىق دەڭگەيگە شىعۋىنا جول اشىپ وتىر. بۇل ءسۇيىنشى جاڭالىققا مەملەكەت
باسشىسى قاسىم-جومارت توقاەۆ تا ريزاشىلىعىن ءبىلدىرىپ, قازاقى تازى تۇقىمىن حالىقارالىق دەڭگەيدە ۇلتتىق برەند ءارى قازاق مادەنيەتىنىڭ اجىراماس بولىگى رەتىندە ناسيحاتتاۋدىڭ ماڭىزدىلىعىن اتاپ ءوتىپ, قازاقستان كينولوگتەر وداعىنا قۇتتىقتاۋ جەدەلحاتىن جولدادى.
جالپى, ىقىلىم زاماننان بەرى «قۇماي تازى قۋعانىن الادى» دەپ سيدام ءبىتىمدى, كەڭ ومىراۋلى, دوڭەس جوندى, سوپاق باس سۇيرىكتەي تازىنى جەتى قازىنانىڭ ءبىرى ساناپ, ۇلتتىق مادەنيەتىمىزدىڭ اجىراماس بولشەگىنە اينالدىرعان حالىقپىز. سودان بولار بۋرابايدا وتكەن ۇلتتىق قۇرىلتايدىڭ ءتورتىنشى وتىرىسىندا مەملەكەت باسشىسى قاسىم-جومارت توقاەۆتىڭ: «قازاقى تازىنى زەرتتەۋ جانە حالىقارالىق دەڭگەيدە ناسيحاتتاۋ جۇمىستارى جالعاسۋعا ءتيىس. بۇل باعىتتا قازاقستان كينولوگتەرى, عالىمدارى مەن ماماندارى تىعىز جۇمىس ىستەپ, قازاقى تازىنىڭ الەمدىك بەدەلىن ارتتىرۋعا ۇلەس قوسۋى قاجەت», دەۋى سول اتادان بالاعا ميراس بولىپ كەلە جاتقان ۇلتتىق قۇندىلىقتىڭ ماڭىزىن ءتىپتى ارتتىردى.
پرەزيدەنتتىڭ وسى ءبىر تاپسىرماسىنان كەيىن يت جۇگىرتىپ, قۇس سالىپ, اڭ اۋلاپ سەرۋەن قۇرۋ قانىنا سىڭگەن حالقىمىز قازاقى تازىعا ەرەكشە كوڭىل بولە باستادى. ماسەلەن, بىلتىر حالىقارالىق كينولوگيالىق فەدەراتسيانىڭ (FCI) باس كوميتەتى قارنى اش بولسا دا, اشتىعىن بىلدىرمەيتىن دەگدار تازىمىزدى رەسمي مويىنداپ, حالىقارالىق دەڭگەيدە اسىل تۇقىمدى يتتەر تىزىمىنە قوستى. قازاقستان كينولوگتەر وداعىنىڭ پرەزيدەنتى باۋىرجان سەرىكقالي حەلسينكيدەگى «World Dog Show-2025» دۇنيەجۇزىلىك يتتەر كورمەسىندەگى جەتىستىك وسى ءبىر يگى جاڭالىقتىڭ جالعاسى ەكەنىن ايتادى.
قوش, سونىمەن الەمنىڭ نەبىر اسىل تۇقىمدى يتتەرى دوداعا تۇسكەن ايدىك كورمەدە تەمىرلان اتتى تازىمىز كوپتىڭ كوڭىلىن جاۋلاپ, «الەمنىڭ جاس چەمپيونى» اتاعىن جەڭىپ الدى. ال لاشىن مەن ارۋ اتتى قوس تازى الەم جانە فينليانديانىڭ چەمپيوندارى اتانسا, كوكسەرەك پەن پانا «الەمنىڭ ۆيتسە-چەمپيوندارى» بولىپ ولجاعا كەنەلدى.
«فينليانديانىڭ استاناسى حەلسينكي قالاسىنان نەگىزىنەن ءۇش جەتىستىكپەن ورالدىق. ونىڭ العاشقىسى – قازاقستان تۇڭعىش رەت حالىقارالىق كينولوگيالىق فەدەراتسياسىنىڭ باس اسسامبلەياسىنا تولىققاندى داۋىس بەرۋگە قۇقىلى مۇشە بولىپ قابىلداندى. ەكىنشى جەتىستىگىمىز – دۇنيە جۇزىنەن 25 مىڭ يت قاتىسقان كورمەگە سەگىز تازىنى اپارىپ, ونىڭ بەسەۋى جۇلدەگە لايىق دەپ تانىلدى. كورمەگە العاش رەت قاتىسىپ, بىردەن مۇنداي جەتىستىككە جەتكەن ەل جوق. ءۇشىنشى ولجامىز – حالىقارالىق كينولوگيالىق فەدەراتسيانىڭ (FCI) باس كوميتەتى اسىل تۇقىمدى يت رەتىندە مويىنداعان تازىنىڭ رەسمي تانىستىرىلىمىنىڭ جوعارى دەڭگەيدە ءوتۋى بولدى», دەيدى قازاقستان كينولوگتەر وداعىنىڭ پرەزيدەنتى ب.سەرىكقالي.
ء«بىز حەلسينكيگە رينگتە وزىندىك قاسيەتتەرىن تانىتا الاتىن تاجىريبەلى تازىلاردى تاڭداپ اپاردىق. ەل ىشىندەگى ءتۇرلى سايىستان توپ جارعان, ارنايى كوميسسيانىڭ ىرىكتەۋىنەن وتكەن, ەۋرووداقتىڭ قاتاڭ ۆەتەرينارلىق تالاپتارىنا ساي تازىلاردى حالىقارالىق قاۋىمداستىققا تانىستىرۋدا جاڭاشا قادام جاساي الدىق. وسىلايشا, جەتى قازىنامىزدىڭ ءبىرى سانالاتىن تازى الەم نازارىنا ىلىگىپ وتىر», دەدى باۋىرجان سەرىكقالي.
تازى – قازاق حالقىنىڭ ماقتانىشى ءھام ەڭ قۇندى جادىگەرى. بۇگىنگى تاڭدا بۇل ءسوزدى اۋىزبەن عانا ايتىپ قويماي, ناقتى قادامدارمەن دالەلدەي باستادىق. مىسالى, مۇنى 3 قىركۇيەكتى «قازاقى يت تۇقىمدارى كۇنى» دەپ جاريالاعانىمىزدان دا بايقاۋعا بولادى. ءتىپتى قازىر تازى حالىقارالىق ديپلوماتيادا وزىندىك ورنى بار جادىگەر سانالا باستادى. وتكەن جىلدارى مەملەكەت باسشىسى قازاق ەلىنە كەلگەن فرانتسيا پرەزيدەنتى ەممانيۋەل ماكرونعا قازاقى تازىنىڭ ەكى كۇشىگىن تارتۋ ەتكەنى, كەيىن پاريجگە بارعان ساپارىندا فرانتسۋز باسشىسى سول تازىلاردى ماقتان ەتەتىنىن ايتقانى وسىنىڭ ايعاعى بولسا كەرەك.
قالاي دەسەك تە, تازالىعىمەن باسىن تىك, كەۋدەسىن كەرە تورگە وزعان اسىل تەكتى تازى تۇقىمى فينليانديانىڭ استاناسى حەلسينكيدە الەم نازارىنا ءىلىندى. ول نازار جۇمىر جەر بەتىندەگى ەلدەردىڭ قازاق ەلىنە دەگەن كوزقاراسىنا دا وڭ ىقپال ەتەرىنە سەنىم مول.
رۋسلان جەلدىباي,
پرەزيدەنت كەڭەسشىسى – ءباسپاسوز حاتشىسى:
پرەزيدەنت تازى مەن توبەتتى ۇلتتىق برەند رەتىندە كەڭىنەن ناسيحاتتاۋ جونىندە تاپسىرما بەردى.
مەملەكەت باسشىسى قاسىم-جومارت توقاەۆ «World Dog Show-2025» دۇنيەجۇزىلىك كورمەسىنە قاتىسىپ, حالىقارالىق ارەنادا لايىقتى باعاسىن العان قازاقى تازىنى ۇلتتىق برەند, مادەنيەتىمىزدىڭ اجىراماس بولشەگى رەتىندە حالىقارالىق دەڭگەيدە تولىق تانىتۋ ورتاق مىندەت ەكەنىنە نازار اۋداردى.
اتاپ ايتقاندا, تازى تۇقىمىن دامىتۋ جانە بىرەگەي قاسيەتتەرىن ساقتاۋ, جۇيەلى عىلىمي زەرتتەۋ جۇمىستارىن جۇرگىزۋ, حالىقارالىق كورمەلەرگە تۇراقتى قاتىسۋ سياقتى باعىتتاردان تۇراتىن بۇل ىسكە قازاقستان كينولوگتەر وداعىمەن قاتار مەملەكەتتىك ورگاندار دا بەلسەندى اتسالىسۋعا ءتيىس.
پرەزيدەنت ءىس باسقارماسى, ەكولوگيا جانە تابيعي رەسۋرستار, عىلىم جانە جوعارى ءبىلىم, اۋىل شارۋاشىلىعى, سىرتقى ىستەر مينيسترلىكتەرى جانە باسقا دا قۇزىرلى ورگاندار, سونداي-اق جەرگىلىكتى اكىمدىكتەر بىرلەسكەن جۇيەلى جوسپار اياسىندا ءتيىستى ۇيىمداستىرۋ شارالارىن قولعا الۋى كەرەك.
قاسىم-جومارت توقاەۆ توبەت تۇقىمىن دا ەرەكشە قامقورلىققا الىپ, مەملەكەتتىك ورگانداردىڭ قولداۋىمەن ءدال وسى اۋقىمدا جۇمىس اتقارۋ مىندەتىن جۇكتەدى.
اتالعان ماسەلە پرەزيدەنت اكىمشىلىگىنىڭ ۇدايى باقىلاۋىندا بولادى.
