ماڭعىستاۋ وبلىسى اكىمى ءباسپاسوز قىزمەتىنىڭ حابارلاۋىنشا, جاڭا نىسان 75 مىڭ تۇرعىنعا ارنالعان «Semey Smart City» شاعىن اۋدانىندا بوي كوتەرەدى. ەتنومادەني بىرلەستىكتەر مەن قوعامدىق ۇيىمداردىڭ باسىن قوساتىن 3 قاباتتى كوپفۋنكتسيونالدى مادەني كەشەن بىرنەشە بلوكتان تۇرادى. كىتاپحانا, قولدانبالى ونەر مۇراجايى, فوتوزەرتحانا, كوركەمونەر جانە قالپىنا كەلتىرۋ شەبەرحانالارى, كينوزال, كونفەرەنتسيا زالدارى قاراستىرىلادى.
اباي وبلىسىنىڭ اكىمى بەرىك ءۋالي عيماراتتىڭ ىرگەتاسىن قالاۋ راسىمىندە مەملەكەت باسشىسى قاسىم-جومارت توقاەۆتىڭ باستاماسىن العاش بولىپ قولداعان ماڭعىستاۋ وبلىسىنىڭ حالقىنا العىسىن جەتكىزدى.
– «ابايعا قۇرمەت» اكتسياسى اياسىندا ماڭعىستاۋلىقتاردىڭ وڭىرىمىزگە سىيلىعى رەتىندە دوستىق ءۇيىنىڭ ىرگەتاسى قالاندى. دوستىق ءۇيى رامىزدىك ءمانى وتە زور, ەكى ءوڭىردىڭ جالپىۇلتتىق تۇتاستىعىن بىلدىرمەكشى. بۇگىنگى ءىس-شارا ەلىمىزدىڭ قوس قيىرىنىڭ بىرلىگى مەن ۇلتتىق بىرەگەيلىگىنىڭ جارقىن كورىنىسى دەپ بىلەمىن. ماڭعىستاۋ مەن اباي وبلىسى باتىس پەن شىعىس شەكارادا جاتقان شالعاي ايماق بولسا دا, نيەتى ورتاق, تىلەۋى ءبىر ەكەنىن بۇكىل الاش جۇرتىنا كورسەتتى. ماڭعىستاۋ وبلىسى ازاماتتارىنىڭ ەلدىڭ سالەمىن الىپ, اباي تويىنىڭ ۇستىندە قۇرىلىستى باستاۋى ۇلكەن قۇرمەتكە لايىق, – دەدى بەرىك ءۋالي.
ماڭعىستاۋ وبلىسى دەلەگاتسياسىنىڭ اتىنان مەملەكەتتىك قىزمەت سالاسىنىڭ ارداگەرى, ماڭعىستاۋ وبلىسىنىڭ قۇرمەتتى ازاماتى د.سەيباعىتوۆ, قوعامدىق كەلىسىم ورتالىعى-وبلىستىق ءۇيىنىڭ ديرەكتورى ن.شاروۆا مەن اباي وبلىسى قازاقستان حالقى اسسامبلەياسى عىلىمي ساراپتامالىق توبىنىڭ توراعاسى ا.بازەنوۆ ماڭعىستاۋ جۇرتشىلىعىنا ءوڭىر تۇرعىندارى اتىنان العىس ايتتى.
وسى ساتتە اقتاۋ قالاسىندا اباي قۇنانباي ۇلىنىڭ ەسكەرتكىشىنە گۇل شوقتارىن قويۋ ءراسىمى ءوتتى.
قاتىسۋشىلار اقىن شىعارماشىلىعىنان ولەڭدەر وقىپ, ۇلى ويشىلدىڭ قازاق ادەبيەتى مەن رۋحانياتىنا قوسقان ايرىقشا ۇلەسىن ەسكە الىپ, اقىن شىعارمالارىنىڭ قۇندىلىعىن اتاپ ءوتتى.
ماڭعىستاۋ وبلىسى
