مەرەكە س.قوجامقۇلوۆ اتىنداعى جەزقازعان قازاق مۋزىكالىق دراما تەاتر ارتىستەرىنىڭ تەاترلاندىرىلعان قويىلىمىمەن باستالىپ, كورەرمەندەرگە ۇلى اقىننىڭ ءومىرى مەن مۇراسى جايلى تاعىلىمدى كورىنىس كورسەتىلدى. ارنايى دايىندالعان الاڭدا ابايدىڭ كىتاپتارى, سۋرەتتەرى جانە شىعارماشىلىق مۇراسىنا قاتىستى كورمەلىك ەكسپوزيتسيالار كوپشىلىك نازارىنا ۇسىنىلدى.
وبلىس اكىمىنىڭ ورىنباسارى زينا اقىلبەكوۆا قۇتتىقتاۋ سوزىندە ابايدىڭ حالىق رۋحانياتىنداعى ايرىقشا ورنىن اتاپ ءوتىپ, ونىڭ وسيەت-ونەگەسى ءار ۇرپاققا جول كورسەتەتىن شامشىراق ەكەنىن جەتكىزدى. سونداي-اق, ۇلىتاۋ وبلىستىق ارداگەرلەر كەڭەسى توراعاسىنىڭ ورىنباسارى, ابايتانۋشى بەكبولات ەسەنوۆ جينالعاندارعا جۇرەكجاردى لەبىزىن ءبىلدىردى.
سالتاناتتى جيىن اياسىندا «اباي-دانا, اباي-دارا» اتتى اقىندار ءمۇشايراسىنىڭ جەڭىمپازدارى ماراپاتتالدى. باس جۇلدەنى اباي اتىنداعى مامانداندىرىلعان مەكتەپ-ينتەرناتتىڭ ۇستازى جانات ابدىعوجين يەلەندى. جۇلدەگەرلەر ساحنادا ءوز ولەڭدەرىن وقىپ, كوپشىلىك قوشەمەتىنە بولەندى.
زيالى قاۋىم وكىلدەرى مەن تۇرعىندار اباي ەسكەرتكىشىنە گۇل شوقتارىن قويىپ, ۇلى ويشىلدىڭ رۋحىنا تاعزىم ەتتى. حاكىم ابايدىڭ تۋعان كۇنى قارساڭىندا ەسكەرتكىش ماڭىندا اقىننىڭ اندەرى شىرقالىپ, ولەڭدەرى وقىلدى.
وسىعان دەيىن «اباي كەرۋەنى» ادەبي ساپارى 4 تامىزدا جەزقازعان قالاسىندا باستالىپ, ۇلىتاۋ, جاڭاارقا اۋداندارى, قاراجال, ساتباەۆ قالالارى جانە جايرەم كەنتىندە جالعاسىن تاپتى. جوبا ماقساتى – ابايدىڭ شىعارماشىلىق مۇراسىن كەڭىنەن ناسيحاتتاپ, ۇلتتىڭ رۋحاني قۇندىلىقتارىن دارىپتەۋ.
ۇلىتاۋ وبلىسى
