ابايدىڭ تۋعان كۇنى – 10 تامىز ەلىمىزدە كەڭىنەن تويلانىپ جاتىر. ايماق بويىنشا جىل بويى ۇلى ويشىلعا ارنالعان شامامەن 300 ءىس-شارا وتكىزىلەدى. بارلىق شارالار ابايدىڭ شىعارماشىلىعى مەن يدەيالارىن ساقتاۋ جانە ناسيحاتتاۋعا باعىتتالعان.
اقىننىڭ مەرەيتوي كۇنى قاراعاندىدا اباي ەسكەرتكىشىنە گۇل شوقتارى قويىلدى. سالتاناتتى راسىمگە وبلىس اكىمى ەرماعانبەت بولەكپاەۆ, قازاقستان حالقى اسسامبلەياسىنىڭ, مادەنيەت, عىلىم جانە قوعام وكىلدەرى قاتىستى.
– بۇل مەن ءۇشىن ۇلكەن مەرەكە. مەن ابايدى وتە جاقسى كورەمىن: ءار ولەڭى, ءار ءسوزى جۇرەگىمە جەتەدى. ۇستەلىمدە ونىڭ كىتابى جاتادى, جانە مەن ابايدى وقىعان سايىن, ول ءبىز تۋرالى, بىزگە ارناپ جازعانداي اسەر الامىن. بىزدە ابايداي ۇلى تۇلعالاردىڭ بولعانىنا قۋانامىن ءارى ماقتانامىن, – دەدى اكادەميالىق ماسەلەلەر جونىندەگى پرورەكتور, ابىلقاس ساعىنوۆ اتىنداعى تەحنيكالىق ۋنيۆەرسيتەتتىڭ وكىلى بەكبولات نۇسىپبەكوۆ.
ەسكەرتكىش جانىندا ۇلى اقىننىڭ جىرلارى وقىلىپ, قازىرگى تىڭدارماننىڭ جۇرەگىنە جەتتى.
مەرەيتوي قارساڭىندا وبلىستا اقىننىڭ ءومىرى مەن مۇراسىنا ارنالعان كورمەلەر, دوڭگەلەك ۇستەلدەر, عىلىمي-تاجىريبەلىك كونفەرەنتسيالار, جىر ءمۇشايرالارى, ايتىستار مەن تەاترلاندىرىلعان قويىلىمدار ۇيىمداستىرىلدى. بۇل تەك وتكەندى ەسكە الۋ عانا ەمەس, اباي باستاعان رۋحاني ديالوگتى جالعاستىرۋدىڭ كورىنىسى بولدى.
مەرەكەلىك ءىس-شارالار وبلىستىڭ بارلىق اۋماعىن قامتيدى. بۇگىندە قاراعاندى وبلىسىندا اباي ەسىمى قالاعا, اۋدانعا, ەكى اۋىلدىق وكرۋگكە, 80-نەن استام كوشەگە, 9 مەكتەپكە بەرىلگەن. سونداي-اق قاراعاندىدا, شاحتينسكىدە جانە اباي قالاسىندا ءۇش ەسكەرتكىشى بار.
اباي ۇرپاققا پوەزيالىق جانە مۋزىكالىق مۇرادان بولەك, تەرەڭ فيلوسوفيا قالدىردى. ونىڭ «قارا سوزدەرى» بۇگىن دە وزەكتىلىگىن جوعالتپاي, بىلىمگە, ادىلدىككە جانە رۋحاني جەتىلۋگە ۇندەيدى.
– بۇگىن ءبىز اباي ەسكەرتكىشىنە گۇل قويۋ راسىمىنە قاتىستىق. مۇندا تۇرىپ, بۇل وقيعانىڭ ماڭىزىن تەرەڭ سەزىندىك. اباي قۇنانباي ۇلى – ۇلى ادام, ونىڭ ەسىمى مەن مۇراسى قازىر دە حالىق جادىندا, – دەدى قاراعاندى كووپەراتيۆتىك كوللەدجىنىڭ ستۋدەنتتەرى دارينا ۋۆاليەۆا مەن كاميلا تومەنباەۆا.
