سالتاناتتى جيىنعا وبلىس اكىمى نۇرالحان كوشەروۆ, وبلىستىق ارداگەرلەر كەڭەسىنىڭ توراعاسى جەڭىسبەك ماۋلەنقۇلوۆ, ەڭبەك ارداگەرى جارقىنبەك قۇلبايىمبەتوۆ, وبلىستىق پوليتسيا دەپارتامەنتىنىڭ باسشىسى مۇرات قابدەنوۆ جانە زيالى قاۋىم وكىلدەرى قاتىستى. قاتىسۋشىلار تۇركىستانداعى اباي ەسكەرتكىشىنە گۇل شوقتارىن قويىپ, حاكىمنىڭ رۋحىنا تاعزىم ەتتى.
وبلىس اكىمى نۇرالحان كوشەروۆ جينالعانداردى مەرەكەمەن قۇتتىقتاپ, ابايدىڭ ونەگەلى ءومىرى مەن شىعارماشىلىق مۇراسىنىڭ ەل ءۇشىن ماڭىزىن اتاپ ءوتتى.
– بىرنەشە جىل بۇرىن مەملەكەت باسشىسىنىڭ قولداۋىمەن 10 تامىز – «اباي كۇنى» بولىپ بەكىتىلدى. بۇل – دانىشپان اقىننىڭ رۋحىنا تاعزىم ەتىپ, ەڭبەكتەرىن ناسيحاتتايتىن كۇن. ال بيىل ۇلى ويشىلدىڭ 180 جىلدىق مەرەيتويى ەل كولەمىندە اتالىپ وتۋدە. وسى مەرەكە قۇرمەتىنە تۇركىستان وبلىسى اتىنان اباي وڭىرىنە كورمە ورتالىعىنىڭ قۇرىلىسىن تارتۋ ەتەمىز. ء«بىرىندى قازاق ءبىرىڭ دوس, كورمەسەڭ – ءىستىڭ ءبارى بوس» دەپ ەلدى بىرلىككە شاقىرعان اقىن وسيەتىنە ادال بولۋ – ءبارىمىزدىڭ مىندەتىمىز. ابايدىڭ شىعارماشىلىعىن ناسيحاتتاۋ باعىتىنداعى جۇمىستار تۇراقتى جالعاسادى, – دەدى ءوڭىر باسشىسى.
جەڭىسبەك ماۋلەنقۇلوۆ ءوز سوزىندە ابايدىڭ قازاق ادەبيەتى مەن رۋحانياتىنداعى ايرىقشا ورنىن اتاپ ءوتىپ, جاستارعا ارناعان تاعىلىمدى ويلارىمەن ءبولىستى.
ءىس-شارادا اقىننىڭ ولەڭدەرى وقىلىپ, اندەرى شىرقالدى. زيالى قاۋىم وكىلدەرى پىكىر ءبىلدىرىپ, وبلىستىق كىتاپحانالار ۇيىمداستىرعان كىتاپ كورمەسى كوپشىلىك نازارىنا ۇسىنىلدى.
ايتا كەتەيىك, تۇركىستان وڭىرىندە ابايدىڭ 180 جىلدىعىنا ارنالعان ون كۇندىك اياسىندا رۋحاني كەشتەر, كورمەلەر, بايقاۋلار, اۋىل شارۋاشىلىعى ونىمدەرىنىڭ جارمەڭكەلەرى مەن مادەنيەت كۇندەرى ءوتتى. قازىرگى تاڭدا وبلىستا 1 اۋىلدىق وكرۋگ, 4 ەلدى مەكەن, 110 كوشە, 15 مەكتەپ اباي ەسىمىمەن اتالادى. سونداي-اق ۇلى اقىن قۇرمەتىنە 9 ەسكەرتكىش پەن 11 بيۋست ورناتىلعان.
