سالتاناتتى ءىس-شارا اقىن ەسكەرتكىشىنە گۇل شوقتارىن قويۋ راسىمىمەن باستالدى. وعان اتىراۋ وبلىسى اكىمىنىڭ ورىنباسارى قايرات نۇرتاەۆ, حالىق كومپوزيتورى ءىليا جاقانوۆ, وبلىستىق ارداگەرلەر كەڭەسىنىڭ توراعاسى مۇرات وتەشوۆ, زيالى قاۋىم مەن قوعامدىق ۇيىم وكىلدەرى, سونداي-اق قالا تۇرعىندارى قاتىستى.
گۇل شوقتارىن قويۋ, اتىراۋ, اباي قۇنانباي ۇلى, 180 جىلدىعى , سۋرەت - Zakon.kz جاڭالىق 10.08.2025 14:29
الاڭدا جۇرتشىلىق نازارىنا ارنايى ازىرلەنگەن "اباي اۋىلى" ەتنوگرافيالىق كومپوزيتسياسى ۇسىنىلدى. ءتورت تاقىرىپتىق كيىز ۇيدە اقىن ءومىرىنىڭ نەگىزگى كەزەڭدەرى – بالالىق شاعى, ءبىلىم مەن ىزدەنىس جىلدارى, قوعامدىق قىزمەتى جانە رۋحاني كەمەلدەنۋى بەينەلەندى. قوناقتار ۇلتتىق قولونەر كورمەسىن تاماشالاپ, قازاقتىڭ ءداستۇرلى ويىندارى مەن سپورتتىق جارىستارىنا قاتىستى.
مەرەكەلىك ءىس-شارا "اباي بەينەسى" اتتى تەاترلاندىرىلعان قويىلىممەن جالعاستى. وندا اكتەرلەر ۇلى ويشىلدىڭ ءار كەزەڭدەگى پوەتيكالىق مونولوگتارىن ساحنالادى. كورەرمەندەر ابايدىڭ ماڭگىلىك ءمانىن جوعالتپاعان ولەڭدەرىن تىڭداپ, ونىڭ اندەرىن بەلگىلى ايماق ونەرپازدارى مەن ەتنومادەني بىرلەستىك وكىلدەرىنىڭ ورىنداۋىندا تىڭدادى.
كەلەلى جيىنعا قاتىسۋشى وبلىس اكىمىنىڭ ورىنباسارى قايرات نۇرتاەۆ اباي مۇراسىن ۇلتتىڭ رۋحاني ىرگەتاسى دەپ اتاپ, ونىڭ وي-تولعامدارى مەن وسيەتتەرىنىڭ قازاقستاندىق ءار بۋىنعا ونەگە ءارى شابىت سىيلايتىنىن ايتتى. ال حالىق كومپوزيتورى ءىليا جاقانوۆ ۇلى اقىن شىعارماشىلىعىنىڭ ۇرپاقتار اراسىنداعى التىن كوپىر بولىپ, ونەر شەبەرلەرىن جاڭا تۋىندىلار جاساۋعا جىگەرلەندىرەتىنىن جەتكىزدى.