ءىس-شارا اباي قۇنانباي ۇلىنىڭ شىعارماشىلىق مۇراسىن ناسيحاتتاپ, جاس ۇرپاقتى رۋحاني-مادەني تاربيەگە باۋلۋعا باعىتتالدى. اقىننىڭ ونەگەلى ءومىرى مەن تەرەڭ وي-تولعامدارى كەڭىنەن قامتىلعان كەشتى قر مەملەكەتتىك ورتالىق مۋزەيى ديرەكتورىنىڭ مىندەتىن اتقارۋشى سەرجان ساروۆ اشىپ, اباي مۇراسى ۇرپاق تاربيەسىندەگى سارقىلماس قازىنا ەكەنىن اتادى.
«داۋىرلەردى جىكتەگەن دانىشپاننىڭ تويى تۋرالى مەملەكەت باسشىسى قاسىم-جومارت توقاەۆ قازاقستان حالقىنا ارناعان جاڭاجىلدىق قۇتتىقتاۋىندا: " ۇلى ابايدىڭ 180 جىلدىق مەرەيتويىن لايىقتى اتاپ ءوتۋىمىز كەرەك" دەپ تاپسىرما بەرگەن بولاتىن. وسىعان وراي ەلىمىزدە عىلىمي كونفەرەنتسيالار, ادەبي بايقاۋلار, مادەني ءىس-شارالار ۇيىمداستىرىلىپ جاتىر. بۇل – ابايدىڭ اماناتىنا ادالدىقتىڭ, رۋحاني ساباقتاستىقتىڭ ايقىن بەلگىسى. بۇگىنگى كەش – سونىڭ جارقىن ۇلگىسى», – دەدى سەرجان ساروۆ.
كەش بارىسىندا اباي اتىنداعى قازاق ۇلتتىق وپەرا جانە بالەت تەاترىنىڭ ارتىستەرى ت. كۇزەمباەۆ, س. ماقسات, د. ديليارا, ب. قاناعاتوۆ, ا. بەكزات, م. ەرلانوۆا, م. ساماتوۆ جانە ش. نۇرعالي ۇلىنىڭ ورىنداۋىنداعى اندەر مەن ساحنالىق قويىلىمدار كورەرمەنگە رۋحاني اسەر سىيلاپ, اباي الەمىنە تەرەڭ بويلاۋعا مۇمكىندىك بەردى.
سونىمەن قاتار كەش اياسىندا اباي قۇنانباي ۇلىنىڭ 180 جىلدىق مەرەيتويىنا ارنالعان قالالىق بايقاۋدىڭ جەڭىمپازدارى ۇسىنعان كورمە كوپشىلىك نازارىنا ۇسىنىلدى. كورمەدە وقۋشىلاردىڭ ۇلى اقىن شىعارماشىلىعىنا ارنالعان سۋرەتتەرى مەن قولدانبالى ونەر تۋىندىلارى قويىلدى. ءاربىر تۋىندى — اباي تۇلعاسىنا دەگەن تەرەڭ قۇرمەت پەن شابىتتىڭ كورىنىسى بولدى.
مەملەكەتتىك ورتالىق مۋزەي باستاماشى بولعان تاعىلىمدى شارا - ۇلى اباي مۇراسىنىڭ ماڭگىلىك ەكەندىگىن تاعى ءبىر مارتە دالەلدەپ, ونىڭ رۋحاني-ادامگەرشىلىك وسيەتتەرىنىڭ بۇگىنگى ۇرپاق ءۇشىن ماڭىزىن ايقىنداي ءتۇستى.
