جىل سايىن تامىزدىڭ ەكىنشى جەكسەنبىسىنە تۇسپا-تۇس كەلەتىن كاسىبي مەرەكەنى قوستانايلىق قۇرىلىسشىلار بيىل ەرتەرەك اتاپ ءوتتى. سالتاناتتى جيىننىڭ شىمىلدىعىن وبلىستىق فيلارمونيانىڭ سيمفونيالىق وركەسترى اشتى. ىلە ساحناعا كوتەرىلگەن وبلىس اكىمىنىڭ ورىنباسارى قۇرىلىسشىلاردى اتاۋلى كۇندەرىمەن قۇتتىقتاپ, وڭىردە قۇرىلىس سالاسىنىڭ قارقىنى جوعارى ەكەنىن ايتتى.
«وبلىستا كەيىنگى ەكى جىل ىشىندە قۇرىلىس كولەمى ەكى ەسە ۇلعايدى. جىل باسىنان بەرگى ءوسىم كولەمى 56%-عا جەتتى. بۇگىندە بۇكىل ەل يگىلىگىن كورىپ وتىرعان ءزاۋلىم ۇيلەر, زاماناۋي مەكتەپتەر, ءىرى زاۋىتتار, تەپ-تەگىس كەڭ جولدار – وسىنىڭ ءبارى سىزدەردىڭ ەرەن ەڭبەكتەرىڭىزدىڭ ايعاعى. سىزدەر مەملەكەت باسشىسى قاسىم-جومارت توقاەۆتىڭ «قولجەتىمدى باسپانا قاراپايىم حالىقتىڭ ارمانىنا ەمەس, ءومىر شىندىعىنا اينالۋعا ءتيىس» دەگەن تۇجىرىمداماسىن باسشىلىققا الا وتىرىپ, وبلىس تۇرعىندارىنىڭ ءومىر ءسۇرۋ ساپاسىن ارتتىرۋعا ۇلكەن ۇلەس قوسىپ كەلەسىزدەر. وڭىردە كەيىنگى ەكى جىلدىڭ ىشىندە عانا 2 ملن شارشى مەتردەن استام باسپانا بوي كوتەردى. 2025 جىلى تاعى 500 مىڭ شارشى مەتر تۇرعىن ءۇي سالۋ جوسپاردا بار. ونىڭ 262 شارشى مەترى سالىنىپ ءبىتىپ, حالىق يگىلىگىنە بەرىلىپ جاتىر», دەدى اكىم ورىنباسارى.
بەرىك تاڭجارىقوۆ وڭىردە قۇرىلىس ماتەريالدارىن شىعاراتىن جەرگىلىكتى كاسىپورىنداردىڭ ءوندىرىس كولەمى وسكەنىن تىلگە تيەك ەتتى. ايتۋىنشا, قۇرىلىس كومپانيالارى ەڭ الدىمەن, ءوز ونىمدەرىمىزدى پايدالانۋعا تىرىسادى. وسىنىڭ ناتيجەسىندە, جىل باسىنان بەرى قۇرىلىس ماتەريالدارى ءوندىرىسىنىڭ كولەمى 23 ملرد تەڭگەدەن اسقان.
وبلىس اكىمىنىڭ ورىنباسارى قۇتتىقتاۋ سوزىنەن كەيىن تاس قالاۋشى, سىلاقشى, ارلەۋشى, كونسترۋكتور, مونتاج جاساۋشى, دانەكەرلەۋشى, ەكسكاۆاتور, كران باسقارۋشى, جۇك كولىگىن جۇرگىزۋشى, ارداگەر قۇرىلىسشىلار, قوستانايداعى قۇرىلىس كوللەدجىنىڭ ۇستازدارىنا «ەرەن ەڭبەگى ءۇشىن» مەدالىن, «قۇرمەتتى قۇرىلىسشى» توسبەلگىسىن, وبلىس اكىمىنىڭ العىسحاتتارىن تابىس ەتتى.
كاسىبي مەرەكە قارساڭىندا ماراپاتقا يە بولعانداردىڭ دەنى – قاتارداعى قۇرىلىسشىلار. سونىڭ ءبىرى – «قۇرمەتتى قۇرىلىسشى» توسبەلگىسىن العان «بك ستروي» قۇرىلىس كومپانياسىنىڭ مامانى مارال ەشمۇحامەتوۆ. شيرەك عاسىرعا جۋىق ۋاقىت قۇرىلىس سالاسىندا ەڭبەك ەتىپ جۇرگەن تاجىريبەلى تاس قالاۋشى بۇگىندە كومپانيانىڭ ءبىر بريگاداسىنا جەتەكشىلىك ەتەدى.
ء«بىز كەلگەندە ءدال وسى تۇرعان جەر ەشتەڭەسى جوق, تاقىر دالا بولىپ جاتاتىن ەدى. قازىر بۇل جەرلەردى «التىن ارمان», «يۋبيلەينىي», «بەرەكە» دەپ اتالاتىن ساۋلەتى مەن ءسانى جاراسقان, تىرشىلىگى قايناعان ۇلكەن شاعىن اۋداندار باستى. قازىر بريگادامىزدا 20 شاقتى ادام بار. ءبىر جىلدا ءبىر ءۇي تۇرعىزامىز. كەيىنگى جىلدارى قۇرىلىسشىنىڭ جاعدايى ەداۋىر جاقساردى. ايلىعىمىز جوعارى, سىياقى, ەڭبەك دەمالىسى بەرىلەدى. ءۇش بالام بار. مىناۋ اسەم ۇيلەردى ءبىزدىڭ اكەمىز تۇرعىزدى دەپ ولار دا مەنى اجەپتاۋىر ماقتان تۇتادى», دەيدى تاس قالاۋشى.
ماراپاتتاۋ راسىمىنەن كەيىن كوپشىلىك قۇرىلىسشىلار كۇنىنە ارنالعان مەرەكەلىك كونتسەرتتى تاماشالادى.
قوستاناي وبلىسى
