الەم نازارىن اۋدارعان اۋقىمدى شاراعا ەلىمىزدىڭ دەلەگاتسياسى قاتال تالاپتان وتكىزىلىپ, حالىقارالىق شاراعا قاتىستىرۋعا مەيلىنشە ۇيرەتىلگەن 8 تازى تۇقىمىن اپاردى. جەر ءجۇزىنىڭ ءار قيىرىنان جەتكىزىلگەن 25 مىڭ يت تۇقىمىنىڭ اراسىنا قازاق تازىسى دا دەربەس يت تۇقىمى رەتىندە ەندى.
قازاقى قۇماي تازىلار العاش رەت كورمەگە قاتىسقانىنا قاراماستان, قانجىعاسى مايلاندى. بيىلعى الەمنىڭ ەڭ جاس چەمپيونى اتالىمى تەمىرلان اتتى تازىعا بۇيىرسا, لاشىن مەن ارۋ دا الەم چەمپيونى اتاعىن الدى. كوكسەرەك پەن پاناعا كۇمىس جۇلدە ءتيدى. بۇدان سىرت لاشىن مەن ارۋ تازىلارعا فينليانديا چەمپيونى دەگەن دە ماراپات بەرىلدى.
جاھاندىق كورمەدە ەلىمىزدىڭ دەلەگاتسياسى ات بايلاعان ورداسى تاماشالاۋشىلاردىڭ نازارىن اۋدارىپ, سۇيىسپەنشىلىگىنە بولەندى. ۇلتتىق ناقىشتا جابدىقتالعان پاۆيلونعا كەلۋشىلەردىڭ شوعىرى قالىڭ بولدى. كەلۋشىلەرگە قازاقستان كينولوگتار وداعىنىڭ وكىلدەرى تازى تۇقىمىنىڭ بەكزادا بولمىسى مەن شىعۋ تاريحىن بايانداپ, ماعلۇمات بەردى. قازاق حالقى تازى ءيتتى ەر جىگىتىتڭ سەرىگى, جەتى قازىنان ءبىرى دەپ سانايتىنىن ايتتى.
مەملەكەت باسشىسىنىڭ تاپسىرماسىمەن قازاقى تازىنى ساقتاۋ مەن دارىپتەۋ 2022 جىلدان بەرى پرەزيدەنت ءىس باسقارماسىنىڭ جەتەكشىلىگىمەن جۇرگىزىلىپ كەلەدى. ءۇش جىل ىشىندە قازاقستان كينولوگتارى وداعىمەن بىرلەسىپ, وسى باعىتتا بىرقاتار اۋقىمدى جۇمىس اتقارىلدى. 2023 جىلى تامىز ايىندا قازاقستان كينولوگتارى وداعى FCI-دىڭ تولىققۇقىلى مۇشەلىگىنە ءوتىپ, ۇلتتىق يت تۇقىمدارىن حالىقارالىق ارەنادا تانىستىرۋ قۇقىنا يە بولدى. ال بىلتىرعى مامىردا استانادا وتكەن مونوتۇقىمدى يتتەر كورمەسى كەزىندە FCI كوميسسياسى 100 تازىنى زەرتتەدى. سونىمەن قاتار بىلتىر 3 قىركۇيەكتە امستەردامدا «قازاقى تازى» تۇقىمىن ادەپكى تانۋ تۋرالى شەشىم شىعىپ, قازاقستانعا ونىڭ تولىققاندى يەسى دەگەن مارتەبە بەرىلدى.
تازى تۇقىمىن دامىتۋ, حالىقارالىق سايىستارعا بەلسەندى تۇردە قاتىستىرۋ سىندى شارتتار ورىندالعان جاعدايدا 2034 جىلعا قاراي ونى تولىقتاي تانۋ تۋرالى شەشىم شىعۋعا ءتيىس. «World Dog Show 2025» كورمەسىنە قاتىسىپ, حەلسينكيدە تازىلاردى رەسمي تۇردە جۇرت نازارىنا ۇسىنۋ – وسى باعىتتاعى ماڭىزدى قادامداردىڭ ءبىرى.
