بۇل دەرەكتەر تۇركىستاندا وتكەن «الەۋمەتتىك جاۋاپكەرشىلىك پەن قوعامدىق بەلسەندىلىك: ازاماتتىق قوعامنىڭ قوزعاۋشى كۇشى» اتتى حII وڭىرلىك ازاماتتىق فورۋمدا ايتىلدى. «تۇركىستان وبلىسىنىڭ ازاماتتىق اليانسى» زاڭدى تۇلعالار قاۋىمداستىعى نىسانىنداعى بىرلەستىك تۋرالى «ەلگە ەتكەن ەڭبەك» اتتى كىتاپتىڭ تۇساۋكەسەرى ءوتىپ, ارنايى بەينەروليك كورسەتىلدى. كەلەلى باسقوسۋعا قىزىلوردا, جامبىل, قوستاناي, شىمكەنت, ۇلىتاۋ, قاراعاندى, اقتوبە جانە تاعى باسقا وبلىستاردان دەلەگاتسيا وكىلدەرى قاتىستى. ازاماتتىق قوعام وكىلدەرىنىڭ باسىن قوسقان فورۋمدا ءسوز سويلەگەن وبلىس اكىمىنىڭ ورىنباسارى ەرتاي التاەۆ بۇل شارا پرەزيدەنت قاسىم-جومارت توقاەۆتىڭ باستاماسىمەن جۇزەگە اسىپ جاتقان «حالىق ۇنىنە قۇلاق اساتىن مەملەكەت» تۇجىرىمداماسىنىڭ ناقتى كورىنىسى ەكەنىن اتاپ ءوتتى.
– مەملەكەت باسشىسىنىڭ قولداۋىمەن جىل سايىن ۇكىمەتتىك ەمەس ۇيىمدارعا مەملەكەتتىك قولداۋ قارجىسىنىڭ كولەمى ارتا تۇسۋدە. اتقارۋشى بيلىك پەن تۇتاس ەلدىڭ, ۇكىمەتتىك ەمەس ۇيىمداردىڭ بىرلەسكەن جۇمىسى ارقىلى وبلىس ەكونوميكاسى جوعارى قارقىنمەن دامىپ كەلەدى. تۇركىستان وبلىسى قىسقا مەرزىمدى ەكونوميكالىق ينديكاتور بويىنشا ەكى اي قاتارىنان ۇزدىك كورسەتكىش كورسەتۋدە. بيىلعى جىلدىڭ 6 ايىنىڭ قورىتىندىسىمەن ءوسىم 118%-دى قۇراپ, رەسپۋبليكا كولەمىندە كوشباسشىلىقتى ساقتاپ قالدى. ونەركاسىپ ءونىم كولەمى 723,3 ملرد تەڭگەنى قۇراپ, 13,5%-عا ارتتى. وبلىس ەكونوميكاسىنىڭ نەگىزگى سالاسى بولىپ سانالاتىن اۋىل شارۋاشىلىعىندا ءونىم كولەمى 253,9 ملرد تەڭگەنى قۇراپ, ءوسىم 104,7% دەڭگەيىندە ورىن الدى. وندىرىلگەن ءونىم بويىنشا رەسپۋبليكادا كوشباسشىمىز, – دەدى ەرتاي كەنجەبەك ۇلى.
سونداي-اق جيىندا مادەنيەت جانە اقپارات ۆيتسە-ءمينيسترى ايزادا قۇرمانوۆا, «قازاقستاننىڭ ازاماتتىق اليانسى» زاڭدى تۇلعالار قاۋىمداستىعىنىڭ پرەزيدەنتى بانۋ نۇرعازيەۆا, «قازاقستان حالقىنا» قوعامدىق قورىنىڭ باسقارما ءتورايىمى ءلاززات شىڭعىسباەۆا, تۇركىستان وبلىسىنىڭ قۇرمەتتى ازاماتى جامالبەك شارىپبەكوۆ بايانداما جاساپ, ازاماتتىق قوعامدى دامىتۋداعى ورنى مەن ماڭىزىن قالىپتاستىرۋ باعىتىنداعى وي-پىكىر, ۇسىنىستارىن ورتاعا سالدى.
فورۋم بارىسىندا ازاماتتىق قوعامنىڭ مەملەكەتتىك باسقارۋ جۇيەسىندەگى الار ورنى مەن ورتاق ماقساتتارعا نەگىزدەلگەن جوبالار ايتىلىپ, جوسپارلار پىسىقتالدى. سونداي-اق وبلىستا مەملەكەتتىك ساياساتتى ناسيحاتتاۋ, ەلدىڭ ىنتىماعى مەن بىرلىگىن ساقتاۋعا ۇلەس قوسىپ جۇرگەن ۇكىمەتتىك ەمەس ۇيىم وكىلدەرى ماراپاتتالدى.
تۇركىستان وبلىسى
