اتىراۋ وبلىستىق توتەنشە جاعدايلار دەپارتامەنتى باستىعىنىڭ ورىنباسارى راتبەك دەمەۋبەرگەننىڭ ايتۋىنا قاراعاندا, وزەن-كولدەردەگى قاۋىپسىزدىك شاراسى كۇشەيتىلگەن.
«بيىل شومىلۋ ماۋسىمىنا دايىندىق ەرتە باستالدى. جاۋاپتى قۇرىلىمدار تۇرعىندار اراسىندا كەڭ اۋقىمدى ءتۇسىندىرۋ جۇمىسىن جۇرگىزدى. قازىر جايىق وزەنىنىڭ جاعالاۋىندا شومىلۋعا رۇقسات ەتىلگەن «ماليبۋ» جاعاجايى اشىلدى. اتالعان جاعاجاي اتىراۋ قالاسىندا ورنالاسقان. ال 45 جاعاجاي ۋاقىتشا جابىق تۇر. وعان بىلتىرعى تاسقىننان كەيىن سۋ ارناسىنىڭ وزگەرىپ, جاعالاۋ ينفراقۇرىلىمىنىڭ جارامسىز كۇيگە تۇسكەنى سەبەپ بولدى», دەيدى ر.دەمەۋبەرگەن.
جازعى شومىلۋ ماۋسىمى باستالعالى بەرى 5 ادام سۋعا باتىپ كەتكەن. بۇل – بىلتىر سۋ ايدىندارىندا كوز جۇمعاندار سانىنان 17 پايىزعا از.
«توتەنشە جاعدايلار دەپارتامەنتىنىڭ قىزمەتكەرلەرى شومىلۋ ماۋسىمى باستالعالى 3600-دەن استام رەيد جۇرگىزدى. سۋعا ءتۇسۋ تالابىن بۇزعان 83 ادامعا اكىمشىلىك قۇقىق بۇزۋشىلىق تۋرالى كودەكسىنىڭ 412-بابىمەن حاتتاما تولتىرىلىپ, 1,1 ملن تەڭگەدەن استام ايىپپۇل سالىندى. سۋ ايدىندارىنان 6 ادام قۇتقارىلدى. ونىڭ بىرەۋى – بالا», دەپ ءمالىم ەتتى راتبەك دەمەۋبەرگەن.
