ەلباسى نۇرسۇلتان نازارباەۆ مەملەكەت باسشىسىنىڭ كانديداتۋراسىن قولداۋ ءۇشىن قۇرىلعان رەسپۋبليكالىق قوعامدىق شتابتىڭ جۇمىسىمەن تانىستى, دەپ حابارلادى پرەزيدەنتتىڭ ءباسپاسوز قىزمەتى.
شتابقا كەلگەن نۇرسۇلتان نازارباەۆ ۇگىت جانە سەنىمدى وكىلدەرمەن جۇمىس جونىندەگى ورتالىقتىڭ جانە احۋالدىق ورتالىقتىڭ قىزمەتىمەن تانىستى.
وڭىرلىك قوعامدىق شتابتار باسشىلارىمەن جانە مۇشەلەرىمەن بەينە-ءماسليحات رەجىمىندە ۇيىمداستىرىلعان كەڭەستى اشقان مەملەكەت باسشىسى الدا اۋقىمدى جۇمىس كۇتىپ تۇرعانىن ايتتى.
– سەنىمدى وكىلدەردىڭ, قوعامدىق شتاب مۇشەلەرىنىڭ 60 پايىزعا جۋىعى وتكەن سايلاۋعا قاتىسىپ, جاقسى تاجىريبە جيناقتاعان. سونىمەن قاتار, مۇندا جاڭا سەنىمدى وكىلدەر دە بار. بۇل بىزدە ۇرپاق ساباقتاستىعى بار ەكەنىن كورسەتەدى. مەن سايلاۋالدى ناۋقانىنا ءبىرىنشى رەت قاتىسىپ وتىرعانداردىڭ بارىنە ءىلتيپاتىمدى بىلدىرەمىن. بۇگىندە رەسپۋبليكالىق جەلىلىك كەستە جاسالدى, وڭىرلىك شتابتاردىڭ ناقتى ءىس-قيمىل جوسپارلارى بار, – دەدى قازاقستان پرەزيدەنتى.
مەملەكەت باسشىسى بارلىق وبلىستىق قوعامدىق شتابتاردىڭ ۇگىت ناۋقانىنا دايىندىعى تۋرالى ەسەپتەرىن تىڭدادى.
نۇرسۇلتان نازارباەۆ رەسپۋبليكانى ءارى قاراي دامىتۋ جولدارى «قازاقستان-2050» ستراتەگياسىندا ايقىندالعانىنا, وندا الەمدەگى ەڭ دامىعان 30 ەلدىڭ قاتارىنا كىرۋ ماقساتى قويىلعانىنا نازار اۋداردى. جاھاندىق ەكونوميكاداعى داعدارىس قۇبىلىستارىن ەڭسەرۋ ءۇشىن «نۇرلى جول» باعدارلاماسى قابىلدانىپ, جۇزەگە اسىرىلىپ جاتىر. وسىعان بايلانىستى قازاقستان پرەزيدەنتى ەل حالقىنىڭ ءومىر ءسۇرۋ دەڭگەيى مەن ساپاسىن ارتتىرۋ ءۇشىن باسىمدىعى بار مەملەكەتتىك باعدارلامالاردى جۇزەگە اسىرۋدىڭ ماڭىزدىلىعىن اتاپ ءوتتى.
سونىمەن قاتار, قازاقستان پرەزيدەنتى «نۇر وتان» پارتياسىنىڭ XVI سەزىندە بەلگىلەنگەن بەس حالىقتىق رەفورمانى ءىسكە اسىرۋ ايرىقشا ماڭىزعا يە ەكەنىن اتاپ ءوتتى. بۇلار كاسىبي جانە اۆتونومدى مەملەكەتتىك اپپاراتتى قالىپتاستىرۋعا, زاڭ ۇستەمدىگىن ارتاراپتاندىرۋعا نەگىزدەلگەن يندۋستريالىق جانە ەكونوميكالىق ءوسىمدى قامتاماسىز ەتۋگە, بولاشاعى ءبىرتۇتاس ۇلتتى, سونداي-اق, ترانسپارەنتتى جانە ەسەپ بەرۋشى مەملەكەتتى ورنىقتىرۋعا باعىتتالعان.
مەملەكەت باسشىسى اتالعان شارالاردىڭ ءبارىن قوعامدا تۇتاستىق, بىرلىك جانە ءوزارا سەنىم بولعان جاعدايدا عانا جۇزەگە اسىرۋ مۇمكىن ەكەنىن اتاپ كورسەتتى.
قوعامدىق شتاب باسشىسى م.قۇل-مۇحاممەد كەڭەس بارىسىندا مەملەكەت باسشىسىنا ەلەكتوراتتىق ناۋقان مىندەتتەرىن جۇزەگە اسىرۋ ءۇشىن ەلدى رەسپۋبليكالىق, وبلىستىق, قالالىق جانە اۋداندىق دەڭگەيدە ءتۇگەل قامتيتىن شتابتار جۇيەسى قۇرىلعانىن باياندادى. ورتالىق شتاب قۇرامىنا 161 ادام كىرەدى. ولاردىڭ قاتارىندا حالىقتىڭ ءتۇرلى توپتارىنا وكىلدىك ەتەتىن ەلگە سىيلى ءارى بەدەلدى ادامدار قامتىلعان. نۇرسۇلتان نازارباەۆتىڭ سەنىمدى وكىلدەرى تىزىمىندە بارلىعى 29 مىڭ ادام بار. سونىمەن قاتار, 50 مىڭنان استام بەلسەندى ازامات قولداۋ كورسەتۋگە تىلەك ءبىلدىردى.
ءىس-شارا بارىسىندا تاۋ-كەن ءوندىرۋ جانە تاۋ-كەن مەتاللۋرگيالىق كاسىپورىندارى رەسپۋبليكالىق قاۋىمداستىعى» زاڭدى تۇلعالار بىرلەستىگىنىڭ اتقارۋشى ديرەكتورى ن.رادوستوۆەتس, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ە.سىدىقوۆ, پارلامەنت ءماجىلىسىنىڭ دەپۋتاتى, «قازاقستان تۇتىنۋشىلارىنىڭ ۇلتتىق ليگاسى» زاڭدى تۇلعالار بىرلەستىگىنىڭ ءتورايىمى س.رومانوۆسكايا, «اتامەكەن» ۇلتتىق كاسىپكەرلەر پالاتاسى باسقارماسىنىڭ ءتوراعاسى ا.مىرزاحمەتوۆ ءسوز سويلەدى.
* * *
قوعامدىق شتابتار ەلەكتورالدى كەزەڭ قارساڭىندا كانديداتتى قولداۋ ءۇشىن قول جيناۋ جۇمىسىن تابىستى اياقتادى. ەلدىڭ بارلىق وڭىرىنەن 560 مىڭنان استام قول جينالدى.
ۇگىت جۇمىستارى بارلىق وبلىس ورتالىقتارىندا, 87 قالادا, 176 اۋداندا, 6841 اۋىل مەن كەنتتە جۇرگىزىلەدى. رەسپۋبليكالىق قوعامدىق شتاب وكىلدەرى حالىقپەن كەزدەسۋ ءۇشىن ەلدىڭ بارلىق ءوڭىرىن ارالاپ شىعادى. بۇل رەتتە, ەڭبەك ۇجىمدارىمەن جۇمىس جۇرگىزۋگە ايرىقشا دەن قويىلاتىن بولادى.
سۋرەتتەردى تۇسىرگەندەر
س.بوندارەنكو, ب.وتارباەۆ.
