سۋرەت: instagram.com/mfa_kz
«ROX Group» – 1996 جىلى نەگىزى قالانعان ۆەتنامداعى ەڭ ءىرى جەكەمەنشىك كوپسالالى حولدينگتەردىڭ ءبىرى. كومپانيا ەنەرگەتيكا, دەۆەلوپمەنت, قارجى, ينفراقۇرىلىم جانە قوناقۇي بيزنەسى سالالارىنا ينۆەستيتسيا سالادى. توپتىڭ پورتفەلىندە 12 ەلدە 100-دەن استام ينۆەستيتسيالىق نىسان بار, ال شەتەلدىك ينۆەستيتسيالاردىڭ جالپى كولەمى 3 ميلليارد اقش دوللارىنان اسادى.
حالىقارالىق اۋقىمداعى كوشباسشى جوبالارىنىڭ قاتارىندا – قۋاتتىلىعى 1900 مۆت بولاتىن كۇن ەلەكتر ستانساسى جانە بىشكەكتەگى اۋقىمدى ۋربانيستىك كلاستەردى قامتيتىن مەگاجوبا بار.
ال ەلىمىزدە «ROX Group» كومپانياسى جاڭارتىلاتىن ەنەرگيا كوزدەرى سالاسىندا, ونىڭ ىشىندە ءىرى ەنەرگەتيكالىق نىساندار سالۋ جوبالارىن ىسكە اسىرۋعا قىزىعۋشىلىق ءبىلدىردى. سونىمەن قاتار كومپانيا ونەركاسىپتىك جانە تۋريستىك ينفراقۇرىلىمدى دامىتۋ جوبالارىنا قاتىسۋ مۇمكىندىگىن قاراستىرىپ, بانك جانە قارجى سەكتورىنا دا قىزىعۋشىلىق تانىتىپ وتىر.
كەزدەسۋ بارىسىندا ءا.قۋانتىروۆ ەلىمىزدىڭ ستراتەگيالىق ارىپتەستىككە جانە ەلدە ۇزاقمەرزىمدى قاتىسۋعا باعىتتالعان ينۆەستورلاردى تارتۋعا مۇددەلى ەكەنىن اتاپ ءوتتى.
– ماقساتىمىز – تەك ينۆەستيتسيالىق اعىنداردى ارتتىرۋ ەمەس, ساپالى, تەحنولوگيالىق جانە ورنىقتى جوبالاردى تارتۋ. ءبىز «ROX Group» سياقتى كومپانيالار باستامالارىن قازاقستاندا سەنىمدى تۇردە جۇزەگە اسىرا الاتىنداي جاعداي جاساۋعا ۇمتىلامىز. بۇل جوبالار ەل ەكونوميكاسىنا ناقتى اسەر ەتۋگە ءتيىس, – دەدى سىرتقى ىستەر ءمينيسترىنىڭ ورىنباسارى.
ءوز كەزەگىندە لە ان دىك قازاقستاننىڭ گەوگرافيالىق ورنالاسۋى, ساياسي تۇراقتىلىعى جانە ينۆەستيتسيالىق تارتىمدىلىعىنىڭ ەرەكشە ۇيلەسىمىنە يە ەكەنىن ايتتى. ونىڭ سوزىنشە «ROX Group» ەلىمىزدەگى ىسكەرلىك احۋالدى جانە ۇكىمەتتىڭ ينۆەستورلاردى قولداۋعا باعىتتالعان ءىس-شارالارىن جوعارى باعالايدى. سونداي-اق ول ەلىمىزدە ەنەرگەتيكا, لوگيستيكا جانە قارجىلىق قىزمەتتەر سياقتى سالالاردا ۇلكەن الەۋەتكە يە ەكەنىن جانە كومپانيانىڭ وڭىرلىك ستراتەگياسىندا نەگىزگى بۋىنعا اينالا الاتىنىن جەتكىزدى.
تاراپتار سىندارلى ديالوگتى جالعاستىرۋعا جانە ىنتىماقتاستىقتىڭ ناقتى باعىتتارىن بىرلەسىپ پىسىقتاۋعا دايىن ەكەندەرىن ءبىلدىردى. ەلىمىز تاراپىنان ينۆەستيتسيالىق مۇمكىندىكتەردى زەردەلەۋگە, جوبالاردى سۇيەمەلدەۋگە, سالالىق مەملەكەتتىك ورگاندارمەن جانە دامۋ ينستيتۋتتارىمەن ءوزارا ءىس-قيمىل جاساۋعا جان-جاقتى قولداۋ كورسەتىلەتىنى راستالدى.
