ينفوگرافيكانى جاساعان – امانگەلدى قياس, «ەQ»
ساۋدانىڭ تسيفرلىق ايناسى
قولدانىسقا جاڭادان ەنگىزىلىپ جاتقان «ساۋدانىڭ تسيفرلىق ايناسى» مودەلى وندىرۋشىدەن تۇتىنۋشىعا دەيىنگى تاۋار قوزعالىسىن تولىق تسيفرلاندىرادى. بۇل مودەل تاۋاردىڭ كود بەرۋ مەن اكەلۋدەن باستاپ دۇكەندەگى ساتىلىم مەن تۇتىنۋشىعا جەتكىزىلۋىنە دەيىنگى بارلىق كەزەڭدى تىركەپ تۇرادى. وسىلايشا, تاۋاردىڭ تۇتاس تسيكلىن قامتيتىن تولىق تسيفرلىق ەكوجۇيە قۇرىلادى.
«بيىل تاۋار مەن جۇمىستىڭ, سونداي-اق كورسەتىلەتىن قىزمەتتىڭ جالپى كلاسسيفيكاتورىن جۇرگىزۋ ءتارتىبى مەن ۇلتتىق تاۋارلار كاتالوگى ۇعىمىن جانە مىندەتتى تۇردە قولدانۋدى كوزدەيتىن قاجەتتى زاڭنامالىق نورمالار قابىلداندى», دەدى ساۋدا جانە ينتەگراتسيا ءمينيسترى ارمان شاققاليەۆ.
جاڭا ەرەجە مەن ءتارتىپتى تاپتىشتەگەن مينيستر, مەملەكەتتىك اپپاراتتى ۆەدومستۆوارالىق ۇيلەستىرۋدى كۇشەيتۋ مەن قاعاز تۇرىندەگى «جالعان سەرتيفيكات» ماسەلەسىن شەشۋ كەرەك ەكەنىن ايتتى. مۇنىمەن بىرگە, تەحنيكالىق رەتتەۋدىڭ اقپاراتتىق جۇيەسىندەگى «كەدەن» اقپاراتتىق جۇيەسىن, ىشكى ىستەر, عىلىم, ەڭبەك مينيسترلىكتەرىنىڭ جۇيەلەرىمەن, مەملەكەتتىك ساتىپ الۋلار پاسپورتىن, ماركەتپلەيستەر مەن ەۋرازيالىق ەكونوميكالىق وداقتىڭ تىزىلىمىمەن ينتەگراتسيالاناتىنىنا توقتالدى.
«مەملەكەت باسشىسى ەكونوميكانىڭ بارلىق سالاسىن تسيفرلىق ترانسفورماتسيالاۋ مىندەتىن قويدى. كورىپ وتىرعانىمىزداي, ساۋدا سالاسىندا جۇيەلى جۇمىس ءجۇرىپ جاتىر. تاۋارلاردى تولىق قاداعالاۋ جانە سايكەستەندىرۋ اياسىندا تاۋارلاردىڭ ۇلتتىق كاتالوگى ەنگىزىلۋدە. بۇل تاۋارلاردى وندىرۋدەن نەمەسە اكەلۋدەن باستاپ, كوتەرمە جانە بولشەك ساۋدادا وتكىزۋگە دەيىنگى بارلىق كەزەڭدە ولاردى جىكتەۋگە نەگىز بولادى. «استانا-1» جانە «ەلەكتروندىق شوت-فاكتۋرالار» اقپاراتتىق جۇيەلەرىنىڭ ينتەگراتسياسى قامتاماسىز ەتىلدى», دەدى ۇكىمەت باسشىسى.
الايدا تاۋارلاردى تسيفرلىق قاداعالاۋدىڭ قولدانىستاعى جۇيەسى ونىمدەردىڭ شەكتەۋلى ساناتتارىن عانا قامتيدى جانە ءار جەردە بولەك-بولەك ورنالاسقان انىقتامالىقتار مەن دەرەكتەر فورماتىنا سۇيەنەدى. وسىعان بايلانىستى قارجى جانە ساۋدا مينيسترلىكتەرى باسقا دا مەملەكەتتىك ورگاندارمەن بىرلەسىپ, تاۋارلاردىڭ ۇلتتىق كاتالوگىن بارلىق سالادا ەنگىزۋ جۇمىسىن كۇشەيتۋى قاجەت.
«بيزنەستى وسىعان بەلسەندى تۇردە اتسالىسۋعا شاقىرامىن. تەحنيكالىق رەتتەۋ – ماڭىزدى ماسەلە. كاسىپكەرلەر سەرتيفيكاتتاۋ راسىمدەرىنىڭ اشىق بولماۋى مەن قاعاز قۇجاتتاردىڭ قايتالاناتىنىن ايتىپ جاتىر. بۇل ماسەلەلەردى سەرتيفيكاتتاۋ, اككرەديتتەۋ جانە ستاندارتتاۋ تەتىگىن جاڭعىرتۋعا باعىتتالعان ە-ترمك تەحنيكالىق رەتتەۋ جۇيەسى شەشۋگە ءتيىس. وسىعان بايلانىستى ساۋدا, قارجى, تسيفرلاندىرۋ مينيسترلىكتەرى جىل سوڭىنا دەيىن ە-ترمك جۇيەسىن سالالىق مەملەكەتتىك ورگانداردىڭ اقپاراتتىق جۇيەسىمەن تولىق ينتەگراتسيالاۋى كەرەك», دەدى و.بەكتەنوۆ.
ۇكىمەت باسشىسىنىڭ ايتۋىنشا, ساۋدا مينيسترلىگى تاراپىنان تاڭبالاۋدىڭ ماڭىزدىلىعى مەن وڭ اسەرى تۋرالى كاسىپكەرلەرگە ءتيىستى ءتۇسىندىرۋ جۇمىسى جۇرگىزىلمەگەن.
«سوندىقتان اقپاراتتىق-ءتۇسىندىرۋ ناۋقانىن كۇشەيتىپ, تاڭبالاۋعا جاتاتىن تاۋارلار تىزبەسىن كەڭەيتۋدى جالعاستىرۋ كەرەك. سونداي-اق اگروماركەتپلەيس پەن قاداعالاۋ جۇيەسىن ىسكە قوسۋ جونىندەگى باستامالاردىڭ ماڭىزدىلىعىن اتاپ وتكىم كەلەدى. ولار اۋىلدىق ەلدى مەكەندەردە ەكونوميكالىق بەلسەندىلىكتىڭ وسۋىنە ىقپال ەتەدى. سىرتقى ساۋدا قىزمەتى اياسىندا تاۋارلاردى اكەلۋ ۇدەرىستەرىن اۆتوماتتاندىرۋ, مامىلەلەردىڭ اشىقتىعى مەن سەرتيفيكاتتاۋ ماسەلەلەرىندە بيزنەسكە كومەك كورسەتۋ قاجەت. ساۋدا مينيسترلىگىنە «قازپوشتامەن» بىرلەسىپ, جىل سوڭىنا دەيىن ۆ2ۆ ەلەكتروندىق ساۋدا الاڭىنىڭ قاناتقاقتى جوباسىن ىسكە قوسۋدى تاپسىرامىن. وسى ماسەلەلەردىڭ بارلىعى يكەمدى ۆەدومستۆوارالىق ءوزارا ءىس-قيمىلدى جانە بيزنەسپەن تۇراقتى اشىق ديالوگ جۇرگىزۋدى تالاپ ەتەدى», دەدى پرەمەر-مينيستر.
دەنساۋلىق سالاسىندا جاڭا جوسپار بەكىتىلدى
2029 جىلعا دەيىنگى ۇلتتىق دامۋ جوسپارىندا انا مەن بالا ءولىمىن تومەندەتۋ بويىنشا كەشەندى شارالار قابىلداۋعا ەرەكشە باسىمدىق بەرىلىپ وتىر. وسىعان بايلانىستى دەنساۋلىق ساقتاۋ مينيسترلىگى 2030 جىلعا دەيىن انا مەن بالا دەنساۋلىعىن ساقتاۋ قىزمەتىن دامىتۋ جوسپارىن بەكىتىپتى. بۇل تۋرالى ۇكىمەت وتىرىسىنداعى بايانداماسىندا سالا باسشىسى اقمارال ءالنازاروۆا ايتتى.
«قابىلدانعان شارالار انا مەن بالا ءولىمى كورسەتكىشتەرىن تومەندەتۋگە مۇمكىندىك بەردى. ارينە, بۇل – مەديتسينا قىزمەتكەرلەرى ەڭبەگىنىڭ ناتيجەسى. اۋىلدىق جەرلەرگە بىلىكتى كادرلاردى تارتۋ مەن ولاردى ورنىقتىرۋ بولاشاق انالار مەن بالالار ءۇشىن قولجەتىمدى مەديتسينالىق كومەك الۋعا جاعداي جاسايدى. سونىمەن قاتار اكۋشەر, گينەكولوگ, نەوناتولوگ, پەدياتر مەن رەانيماتولوگتەردى جەتەكشى وتاندىق جانە شەتەلدىك ورتالىقتاردا تۇراقتى وقىتۋ مەن قايتا دايارلاۋ جۇمىستارىن ودان ءارى جالعاستىرۋ قاجەت. ءبىز دامىعان ەلدەردىڭ كورسەتكىشتەرىنە جاقىنداۋ ءۇشىن بوسانۋ كەزىندەگى كۇردەلى ءارى قاۋىپتى جاعدايلاردىڭ الدىن الۋ بويىنشا جۇمىستى كۇشەيتۋىمىز قاجەت. دەنساۋلىق ساقتاۋ جۇيەسىن دۇرىس ۇيىمداستىرعان جاعدايدا, كوزدەگەن ماقساتقا قول جەتكىزۋگە بولادى. كەيىنگى جىلدارى انا مەن بالا ءولىمىن 6 ەسەدەن استام تومەندەتە الدىق», دەدى و.بەكتەنوۆ.
ۇكىمەت باسشىسى ازاماتتاردىڭ ساپالى ءارى قولجەتىمدى مەديتسينالىق كومەك الۋىن قامتاماسىز ەتۋ ءۇشىن اتقارىلاتىن ماڭىزدى شارالاردى اتاپ ءوتىپ, ناقتى تاپسىرما بەردى.
