كەيىنگى جىلدارى ينتەرنەت-الاياقتىق تەك جاھاندىق پروبلەما عانا ەمەس, ۇلتتىق قاۋىپسىزدىككە تونگەن ەلەۋلى قاتەرگە اينالدى. تەحنولوگيانىڭ قارقىندى دامۋى, تسيفرلىق بايلانىس قۇرالدارىنىڭ كەڭىنەن تارالۋى الاياقتاردىڭ دا ايلا-امالدارىنىڭ كوبەيۋىنە سەپ بولىپ وتىر.
بۇگىندە كەلتىرىلگەن زالال كولەمى 6 ملرد. تەڭگەدەن اسادى. ونىڭ تەك 26%-ى عانا وتەلدى. وعان قوسا كيبەرالاياقتىق قۇپيا دەرەكتەردىڭ زاڭسىز تارالۋىنا ىقپال ەتۋدە. وسىعان بايلانىستى باس پروكۋراتۋرادا كيبەرالاياقتىققا قارسى ءىس-قيمىل ماسەلەلەرى جونىندەگى ۆەدومستۆوارالىق كەڭەس ءوتتى.
جيىنعا ۇلتتىق بانك, قارجى نارىعىن رەتتەۋ جانە دامىتۋ اگەنتتىگى, ىشكى ىستەر مينيسترلىگى, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى, ساۋدا جانە ينتەگراتسيا مينيسترلىگى, مادەنيەت جانە اقپارات مينيسترلىگى, سونداي-اق «استانا» حالىقارالىق قارجى ورتالىعىنىڭ وكىلدەرى قاتىستى. ولار ينتەرنەت-الاياقتىقتىڭ ءوسۋ سەبەپتەرى, جەكە دەرەكتەردىڭ زاڭسىز تارالۋى, SIM-كارتالاردىڭ كولەڭكەلى اينالىمى جانە SIP-تەلەفونيانى پايدالانۋ ماسەلەسىن جان-جاقتى تالقىلادى.
كەڭەستە جابىرلەنۋشىلەردىڭ قۇقىعىن قورعاۋ بويىنشا جۇمىس بەلسەندى جۇرگىزىلىپ جاتقانى ايتىلدى. ياعني بۇگىندە الاياقتىق جولمەن رەسىمدەلگەن نەسيەلەردىڭ تولەمىن توقتاتۋ جانە دروپپەرلەردەن نەگىزسىز الىنعان قاراجاتتى ءوندىرىپ الۋ شارالارى قولعا الىنعان. ماسەلەن, الاياقتارعا وزدەرىنىڭ تولەم قۇرالدارىن بەرگەن 217 دروپپەر قىلمىستىق جاۋاپتىلىققا تارتىلدى. 61 كيبەرقىلمىستىق توپ اشكەرەلەنىپ, جالپى سوماسى 2,9 ميلليارد تەڭگەدەن اساتىن كۇدىكتى ترانزاكتسيالار بۇعاتتالعان.
قاتىسۋشىلار قازىرگى قالىپتاسقان احۋالعا جان-جاقتى تالداۋ جۇرگىزىپ, ناقتى ءىس-شارالاردى بەلگىلەدى جانە ولاردى ىسكە اسىرۋعا جاۋاپتى مەملەكەتتىك ورگانداردى ايقىندادى.
سونىمەن قاتار, وسى جىلدىڭ اقپان ايىندا ينتەرنەت-الاياقتىققا قارسى ءىس-قيمىل ماسەلەلەرى بويىنشا وتكەن ب.اسىلوۆ توراعالىق ەتكەن «زاڭدىلىقتى, قۇقىقتىق ءتارتىپ پەن قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ» كەڭەسىنىڭ شەشىمدەرىنىڭ ورىندالۋ بارىسىنا ەرەكشە نازار اۋدارىلدى. ءار باعىت بويىنشا ۋاكىلەتتى ورگانداردىڭ ەسەبى تىڭدالدى.
ايتا كەتەيىك بيىل قىركۇيەكتەن باستاپ قىلمىستىق كودەكسكە ەنگىزىلگەن 232-1-باپ كۇشىنە ەنەدى. وندا ءوز تولەم قۇرالدارىن ماتەريالدىق سىياقى ءۇشىن ءۇشىنشى تۇلعالارعا زاڭسىز بەرگەن دروپپەرلەردىڭ قىلمىستىق جاۋاپتىلىعى كوزدەلگەن. بۇل قۇقىق بۇزۋشىلىق ءۇشىن تەك قارجىلىق شەكتەۋلەر عانا ەمەس, 7 جىلعا دەيىنگى مەرزىمگە باس بوستاندىعىنان ايىرۋ جازاسى دا قاراستىرىلعان.
