بۇل ورايدا وبلىس اكىمى نۇرالحان كوشەروۆ ەكولوگياعا جاۋاپتى قۇزىرلى ورگان باسشىلارىنا, اۋدان, قالا اكىمدەرى مەن باسقارما باسشىسىنا زاڭسىزدىقتاردى جويۋدى, زاڭ تالابىن ساقتاماعان جەر قويناۋىن پايدالانۋشى كاسىپكەرلەردىڭ ليتسەنزياسىن قايتارىپ الۋدى تاپسىردى. بۇگىندە وبلىس كولەمىندە جۇمىسى توقتاتىلعان جانە پايدالانىلماي تۇرعان كەن ورىندارىن مەملەكەت مەنشىگىنە قايتارۋ جۇمىستارى جۇرگىزىلىپ كەلەدى. جىل باسىنان بەرى 17 جەر قويناۋىن پايدالانۋشىنىڭ 35 مىڭ گەكتار جەرى مەملەكەت بالانسىنا قايتارىلدى.
ونەركاسىپ جانە يندۋستريالدى-يننوۆاتسيالىق دامۋ باسقارماسى باسشىسىنىڭ مىندەتىن اتقارۋشى قانات شونباسوۆتىڭ ايتۋىنشا, ارىس, كەنتاۋ قالالارى, وتىرار, ورداباسى, كەلەس, ساۋران اۋداندارى اۋماعىندا زاڭسىز جەر قويناۋىن پايدالانۋ فاكتىلەرى تولاستاماي تۇر. ماسەلەن, كەنتاۋ قالاسى, حانتاعى اۋىلدىق وكرۋگى ماڭىندا زاڭسىز باريت قازىلعانى انىقتالىپ, زاڭدى بۇزعان تۇلعالار جاۋاپقا تارتىلدى. سونداي-اق كەلەس اۋدانى, كەلەس وزەنى جاعاسىن زاڭسىز قازىپ, جايىلىم جەرگە ونىمدەرىن جيناقتاپ, ساتىلىمعا شىعارۋ جۇمىستارى تىركەلگەن. جالپى وبلىس اۋماعىندا اۋىر جۇك كولىكتەرىنىڭ شامادان تىس جۇك تاسىمالداۋ, زاڭسىز قۇم قازۋ, قازبا ونىمدەرىن ساۋدالاۋ, پايدالى قازبالاردى ءوندىرۋ فاكتىلەر انىقتالىپ, ءتيىستى شارا كورىلۋدە.
