اباي وبلىسى اكىمدىگى, وبلىستىق جاستار ساياساتى ماسەلەلەرى جونىندەگى باسقارماسى جانە سەمەي قالاسى اكىمدىگىنىڭ قولداۋىمەن وتكەن اقىل-وي دوداسىنا ەلىمىزدىڭ 10 وڭىرىنەن 1 080 ادام قاتىستى. اتاپ ايتقاندا, استانا, الماتى, شىمكەنت قالالارى, شىعىس قازاقستان, پاۆلودار, جامبىل, تۇركىستان, اقمولا, اتىراۋ, اباي وبلىستارىنان 180 كوماندا ءوزارا باق سىناستى. بۇل كورسەتكىش قازاقستان رەكوردتار كىتابىنا (كينەس) «ەڭ اۋقىمدى ينتەللەكتۋالدى سايىس» رەتىندە تىركەۋگە ۇسىنىلدى.
«اباي ارەنا» كوپفۋنكتسيونالدى مادەني-سپورت كەشەنىندە وتكەن زياتكەرلىك سايىستىڭ اشىلۋىنا وبلىس اكىمىنىڭ ورىنباسارى مەيىرلان راحانوۆ قاتىسىپ, ويىنشىلارعا ساتتىلىك تىلەدى.
– ايتۋلى ءىس-شاراعا ەلىمىزدىڭ تۇكپىر-تۇكپىرىنەن ويىنشىلاردىڭ قاتىسۋى – ەلىمىزدەگى ينتەللەكتۋالدى ويىندار تاريحىنداعى ەرەكشە وقيعا. «اباي QUIZ» – تەك ءبىلىم سايىسى عانا ەمەس, جاس بۋىننىڭ ۇلتتىق تانىمىن, وي-ءورىسىن كەڭەيتەتىن, ينتەللەكتۋالدى الەۋەتىن ارتتىراتىن بىرەگەي جانە ءداستۇرلى الاڭعا اينالاتىنىنا سەنەمىز, – دەدى ول.
زياتكەرلىك سايىس 7 كەزەڭنەن تۇردى. ءار كەزەڭدە اباي مۇراسى مەن ءار ءتۇرلى سالاعا بايلانىستى تاقىرىپتار قامتىلدى. ويىن بارىسىندا قاتىسۋشىلار وي ۇشقىرلىعى مەن لوگيكالىق تاپقىرلىعىن ساراپقا سالدى.
– بۇگىندە ويناي وتىرىپ ويلاي بىلەتىن ورتا قالىپتاسىپ كەلەدى. ول – زاماناۋي ءارى كرەاتيۆتى ويلايتىندار. قازىر ەلىمىزدە قازاقشا كۋيز كوپشىلىككە تانىلا باستادى. مىسالى, استانا, الماتى, وسكەمەن, اتىراۋ, اقتاۋ, قاراعاندى, سەمەي سەكىلدى قالالاردا جاقسى دامىعان. دەيتۇرعانمەن, ۇلكەن قالالاردا كۋيزدەردىڭ كوبى ورىس تىلىندە وتەدى. قازاق تىلىندە وتەتىن كۋيز ساناۋلى, ءالى دە از. وسى رەتتە, وتاندىق كۋيز تاريحىندا مۇنداي كوپ ويىنشى قاتىسقان سايىس ءبىرىنشى مارتە بولىپ وتىر. مۇنىڭ اباي تويىندا ۇيىمداستىرىلۋىنىڭ دا رامىزدىك ءمانى بار, – دەيدى كۋيزدىڭ اۆتورى ءارى جۇرگىزۋشىسى مەرەي ەرمۇحانوۆ.
وسىنداي كرەاتيۆتى ورتالاردا قازاقتىلدى قاتىسۋشىلار كوپتەپ توبە كورسەتە باستاۋىنا ۇلەس قوسىپ جۇرگەن وسكەمەندىك ارىپتەسىمىز دارىن نۇرساپاروۆتىڭ ايتۋىنشا, «اباي QUIZ» ويىنىنىڭ ۇيىمداستىرىلۋ دەڭگەيى جوعارى.
– تالاي كۋيز ويىندارىن ۇيىمداستىرۋشى-اۆتور ءارى ويىنشى رەتىندە مۇنداي مىڭ ادام قاتىسقان ۇلكەن سايىستى العاش كورۋىم. ۇيىمداستىرۋ دەڭگەيى جوعارى. ورىندار دا ەرەكشە ورنالاستىرىلعان. العاش «اباي ارەنا» مادەني-سپورت كەشەنىنە كىرىپ كەلگەندە, زالعا لىق تولعان ويىنشىلاردى كورىپ قايران قالدىق. اتموسفەرا ەرەكشە بولدى. ءبىز دە شىعىستان مىقتى كوماندالارىمىزدى اكەلدىك. 180 كوماندا قاتىسقان وي جارىسىندا ۇزدىك وندىققا «Tas Talqan» كوماندامىز ەندى. مىسالى, ءبىزدىڭ شىعىس قازاقستان وڭىرىندە ءار كۋيزدە 50 كوماندا قاتىسادى. الدا بۇل رەكوردتى جاڭارتامىز دەگەن ويدامىز, – دەيدى ول.
ايتۋلى سايىستا «Brainstorm» كومانداسى (استانا) – ءى ورىن (1 000 000 تگ), «الماتى ميكس» كومانداسى (الماتى) – ءىى ورىن (800 000 تگ), «تۇراقسىز تىركەستەر» (سەمەي) كومانداسى ءىىى ورىندى (600 000 تگ) يەلەندى. ال جۇلدەلى IV–V ورىن (400 000 تگ), VI–X ورىندارعا (200 000 تگ) «A team», «بورت №1», «جەبە» (پاۆلودار), «Quiz on AIR», «Tas Talqan» (وسكەمەن), «ىعاي مەن سىعاي», «كىرپى شەشەن» (سەمەي) تابان تىرەدى. جالپى جۇلدە قورى – 4 700 000 تەڭگە. سونىمەن قاتار ۇزدىك كوماندالارعا «ۇزدىك ستۋدەنتتىك كوماندا», «ۇزدىك ۇجىم», «ۇزدىك اۋدان كومانداسى», «ەڭ كرەاتيۆتى كوماندا», «ۇزدىك وبراز», «ۇزدىك تالپىنىس», «قارا ءسوز جۇلدەسى» دەگەن ارنايى اتالىمدار تاعايىندالىپ, ولارعا دا اقشالاي سىيلىق تابىس ەتىلدى.
– اباي ەلىندە قازاقشا زياتكەرلىك ويىن ءبىرشاما دامىپ كەلەدى. ال بۇل جولعى «اباي QUIZ» رەسپۋبليكالىق زياتكەرلىك سايىسى – اباي تويىنداعى ەرەكشە تاريحي ساتتەردىڭ ءبىرى بولدى دەپ بىلەمىز. سايىسقا باقىلاۋشى ءارى قازىلىق جاساۋعا 30-دان استام مامان جانە 60 ۆولونتەر اتسالىستى. ويىندى تاماشالاۋعا 300-دەن استام كورەرمەن كەلىپ, جالپى 1500-گە جۋىق ادام قاتىستى. اباي وبلىسىنىڭ ءار اۋدانىنان, جوعارى وقۋ ورىندارىنان, مەكتەپتەردەن, مەكەمەلەردەن كوماندالار جيىلدى. سايىسقا قاتىسقان بارشا ويىنشىلارعا, اسىرەسە, ەلىمىزدىڭ تۇكپىر-تۇكپىرىنەن كەلگەن قوناقتارعا وبلىس اتىنان العىس بىلدىرەمىز, – دەدى ۇيىمداستىرۋشىلار اتىنان قۋانىش مولداقاشەۆ.
«اباي QUIZ» زياتكەرلىك ويىنى جەتى نەگىزگى كەزەڭنەن تۇرادى, ولاردىڭ ارقايسىسى اباي مۇراسىن, ۇلتتىق تاريح پەن ادەبيەتتى, لوگيكالىق ويلاۋدى تالاپ ەتەدى. ويىن بارىسىندا ارنايى كونتسەرتتىك باعدارلامالار مەن مۋزىكالىق ۇزىندىلەر كورسەتىلدى. سونىمەن بىرگە قوناق كوماندالار ءۇشىن سەمەي قالاسىنىڭ تاريحي-مادەني ورىندارىنا ەكسكۋرسيا جاسالىپ, كەشكى اس جانە مادەني باعدارلاما ۇيىمداستىرىلدى.
اباي وبلىسى
