سۋرەتتى تۇسىرگەن – ەرلان ومار, «EQ»
ءۇش اۋىسىمدا وقىتۋ مەن مەكتەپ ورىندارىنىڭ تاپشىلىعىن جويۋ ماقساتىندا مەملەكەت باسشىسى قاسىم-جومارت توقاەۆتىڭ باستاماسىمەن وبلىستا 26 «كەلەشەك مەكتەپتەرى» قۇرىلىسى كوزدەلىپ, وتكەن جىلى وسى ۇلتتىق جوبا اياسىندا 11 100 ورىندىق 10 مەكتەپتىڭ (جامبىل اۋدانى ۇزىناعاش, تالعار اۋداندارىندا جاڭالىق اۋىلى, قارعالى اۋىلى, قاراساي اۋدانى دولان, قوشمامبەت, كوكوزەك, ەلتاي, كەمەرتوعان اۋىلدارى, قاسكەلەن قالاسى, ەڭبەك اۋىلى, الاتاۋ قالاسى) جانە 3 275 ورىندىق 3 جەكەمەنشىك مەكتەپتىڭ قۇرىلىسى اياقتالىپ, پايدالانۋعا بەرىلدى («وتەمۇراتوۆ قورى» ارقىلى ەڭبەكشىقازاق اۋدانىنداعى ەسىك قالاسى مەن شەلەك اۋىلىندا 900 ورىندىق 2 مەكتەپ, «مەنىڭ مەكتەبىم» جشس ەسىك قالاسىندا 1 475 ورىندىق 1 مەكتەپ قۇرىلىسى).
ال الدىڭعى جىلى وڭىردە 14 400 ورىندىق 14 مەكتەپ سالىندى.
ناتيجەسىندە, ءۇش اۋىسىمدا وقيتىن مەكتەپ سانى 52-دەن 30-عا دەيىن ازايدى (جامبىل اۋدانىندا – 3, ىلە – 17, ەڭبەكشىقازاق – 1, تالعار – 6, قاراساي – 2, الاتاۋ قالاسى – 2). قالعان 17 مەكتەپتىڭ قۇرىلىسى جۇرگىزىلىپ جاتىر.
«كەلەشەك مەكتەپتەرى» – جاي عانا قۇرىلىس ەمەس, ەل ءۇشىن ماڭىزى زور وزگەرىستەردىڭ باستاۋى, بولاشاققا جاسالعان نىق قادام.
«كەلەشەك مەكتەپتەرى» – مەملەكەت باسشىسى قاسىم-جومارت توقاەۆتىڭ باستاماسىمەن قولعا الىنعان ۇلتتىق اۋقىمداعى جوبا. ونىڭ باستى ماقساتى – اپاتتى جاعدايداعى مەكتەپتەردىڭ, ءۇش اۋىسىمدا وقىتۋدىڭ جانە وقۋشى ورىندارىنىڭ تاپشىلىعى ماسەلەسىن شەشۋ.
بۇگىنگى كۇنى ەڭبەكشىقازاق اۋدانى اششىساي اۋىلىندا «كەلەشەك مەكتەپتەر» باعدارلاماسىمەن 3,4 گەكتار اۋماققا 600 ورىندىق مەكتەپتىڭ قۇرىلىسى جۇرگىزىلىپ جاتىر. قۇرىلىس جۇمىستارى «Exclusive construction» (قۇرىلىسشى – تبس) جشس ەنشىسىندە.
«اۋىلداعى ش.ءۋاليحانوۆ اتىنداعى ورتا مەكتەپ 1977 جىلى سالىنعان. ەسكى مەكتەپ ەدى. وسىعان بايلانىستى جاڭا مەكتەپ قۇرىلىسى بىلتىرعى جىلدىڭ مامىر ايىندا باستالدى. الداعى وقۋ جىلىندا قولدانىسقا بەرىلەدى دەپ كۇتىلىپ وتىر. ەندى, مىنە, بالالار جايلى دا جارىق مەكتەپتە وقيتىن بولدى. بۇگىنگى كۇنى مەكتەپ قۇرىلىسىنىڭ جۇمىسى 85 پايىزعا اياقتالدى», – دەيدى مەكتەپ ديرەكتورى جانار مالىكقىزى.
اششىساي اۋىلىندا بيىل 583 وقۋشى مەكتەپكە بارادى.
الماتى وبلىسى
