وقيعا ساعات 07:30 شاماسىندا الماتى – ەكاتەرينبۋرگ باعىتى بويىنشا, قاراعاندى قالاسىنان بالقاشقا قاراي ءبىر شاقىرىم جەردە تىركەلگەن.
پوليتسيانىڭ مالىمەتىنشە, موتوتسيكل جۇرگىزۋشىسى الدىنداعى Kia Sportage كولىگىمەن سوقتىعىسقان. كولىك پاترۋل قىزمەتىنە تيەسىلى ارنايى اۆتوكولىك بولعانى تۋرالى بەيرەسمي اقپارات تارادى, الايدا بۇل ازىرگە رەسمي تۇردە ناقتىلانبادى.
«جول-كولىك وقيعاسى سالدارىنان 42 جاستاعى موتوتسيكل جۇرگىزۋشىسى وقيعا ورنىندا قازا تاپتى. اتالعان دەرەك بويىنشا قر قىلمىستىق كودەكسىنىڭ 345-بابى (كولىك قۇرالدارىن جۇرگىزۋشى ادامداردىڭ جول قوزعالىسى نەمەسە كولىك قۇرالدارىن پايدالانۋ قاعيدالارىن بۇزۋى) بويىنشا سوتقا دەيىنگى تەرگەپ-تەكسەرۋ باستالدى. ءتيىستى ساراپتامالار تاعايىندالدى», – دەلىنگەن قاراعاندى وبلىستىق پوليتسيا دەپارتامەنتى تاراتقان حابارلامادا.
سوڭعى كەزدەرى موتوتسيكل جۇرگىزۋشىلەرى اراسىندا جول اپاتىنا ءتۇسۋ جيىلەگەن.
