بۇلار — استانا قالاسىنداعى كەڭەس وداعىنىڭ باتىرى, حالىق قاھارمانى, ارميا گەنەرالى ساعادات نۇرماعامبەتوۆ اتىنداعى اسكەري كوللەدج, شىمكەنت قالاسىنداعى سابىر راحىموۆ اتىنداعى اسكەري كوللەدج, اقمولا وبلىسىنىڭ ششۋچينسك قالاسىنداعى شوقان ءۋاليحانوۆ اتىنداعى اسكەري كوللەدج, قاراعاندى قالاسىنداعى تالعات بيگەلدينوۆ اتىنداعى اسكەري كوللەدج جانە الماتى قالاسىنداعى باۋىرجان مومىش ۇلى اتىنداعى اسكەري-سپورت كوللەدجى.
وندا 9 سىنىپ بازاسىندا وقۋ مەرزىمى 2 جىل 10 اي. دەنساۋلىق جاعدايى بويىنشا جارامدى ۇمىتكەرلەر كوللەدجگە 1-5 تامىز ارالىعىندا قۇجاتتاردى تاپسىرۋ ءۇشىن كەلەدى. قابىلداۋ 5-20 تامىز ارالىعىندا جۇزەگە اسىرىلادى.
وسى كەزەڭدە ءوتىنىش بەرۋشىلەر كاسىبي-پسيحولوگيالىق ىرىكتەۋدەن, تۇپكىلىكتى مەديتسينالىق كۋالاندىرۋدان, نورماتيۆتەر بويىنشا دەنە دايىندىعىن تەكسەرۋدەن وتەدى. سوڭعى كەزەڭ كونكۋرستىق ىرىكتەۋ مەن قابىلداۋدى قامتيدى.
اتتەستاتتىڭ ورتاشا بالى كەمىندە 3 بولاتىن ءبىلىمى تۋرالى قۇجاتى بار, ەمحانادا مەديتسينالىق تەكسەرۋدەن وتكەن وقۋعا تۇسۋشىلەر وقۋ ورنىنا 30 شىلدەگە دەيىن كەلەدى.
شوقان ءۋاليحانوۆ اتىنداعى اسكەري كوللەدجى 11 سىنىپ بازاسىندا كاسىبي سەرجانتتار دايىندايدى. بۇل جاعدايدا وقۋ ءبىر جىل 10 ايعا سوزىلادى.
كونكۋرستان تىس قابىلداۋ قۇقىعىن اسكەري قىزمەت مىندەتتەرىن اتقارۋ كەزىندە قازا تاپقان نەمەسە مۇگەدەكتىك العان, قىزمەت وتكەرۋ كەزىندە حابار-وشارسىز كەتكەن اسكەري قىزمەتشىلەردىڭ بالالارى, «التىن بەلگى» بەلگىسىمەن ماراپاتتالعان كانديداتتار, سوڭعى ءۇش جىلداعى حالىقارالىق وليمپيادالارعا, كونكۋرستارعا قاتىسۋشىلار جانە سپورتتىق جارىستاردىڭ جەڭىمپازدارى پايدالانادى.
— اسكەري كوللەدجگە قابىلداۋ كونكۋرسىن وتكىزۋ كەزىندە كورسەتكىشتەر بىردەي بولعان جاعدايدا جەتىم بالالار مەن اتا-اناسىنىڭ قامقورلىعىنسىز قالعان بالالاردىڭ, اسكەري دايارلىق جونىندەگى قوسىمشا باعدارلامالارى بار ءبىلىم بەرۋ ۇيىمدارىنىڭ تۇلەكتەرىنە باسىمدىق بەرىلەدى. «دەنە شىنىقتىرۋ جانە اسكەري ىستەگى سپورت» ماماندىعى بويىنشا اسكەري-سپورت كوللەدجىنە وقۋعا ءتۇسۋ كەزىندە سپورت شەبەرى, سپورت شەبەرىنە كانديدات سپورتتىق اتاقتارى, سوڭعى ءۇش جىلدا وليمپيادالار مەن سپارتاكيادالاردىڭ چەمپيونى اتانعان جاستارعا ارتىقشىلىق بەرىلەدى, — دەلىنگەن حابارلامادا.
قابىلداۋ كەزەڭىندە تالاپكەرلەر وقۋ ورنىنىڭ اۋماعىنا ورنالاسادى جانە تاماقپەن قامتاماسىز ەتىلەدى. اسكەري كوللەدجگە قابىلدانعاندار وقۋعا 29 تامىزعا دەيىن كەلەدى.
