پرەمەر-مينيستر ءوز سوزىندە كولىك-لوگيستيكا سەكتورىنىڭ ەل ەكونوميكاسىن دامىتۋداعى باستى ءرولىن اتاپ ءوتتى.
«مەملەكەت باسشىسى قاسىم-جومارت توقاەۆ الدىمىزعا كولىك سەكتورىنىڭ الەۋەتىن ارتتىرىپ, قازاقستاندى سەنىمدى ترانزيتتىك حاب رەتىندە دامىتۋ مىندەتىن قويدى. بۇل ورايدا جولاۋشىلار مەن جۇك تاسىمالىن قاۋىپسىز ءارى ۇزدىكسىز قامتاماسىز ەتىپ وتىرعان كولىك قىزمەتكەرلەرىنىڭ قاجىرلى ەڭبەگى قاشاندا ماڭىزدى. وتاندىق كولىك سالاسى بيىلعى 6 ايدىڭ قورىتىندىسى بويىنشا 22,7% دەڭگەيىندە قارقىندى ءوسىم كورسەتتى. مۇنىڭ بارلىعىندا وزدەرىڭىز سياقتى سالا ماماندارى مەن ارداگەرلەرىنىڭ ماڭداي تەرى, ادال ەڭبەگى جاتىر», دەپ اتاپ ءوتتى و.بەكتەنوۆ.
پرەزيدەنتتىڭ تاپسىرماسى اياسىندا جۇزەگە اسىپ جاتقان ينفراقۇرىلىمدى جاڭعىرتۋ, تسيفرلاندىرۋ مەن ەلىمىزدىڭ ترانزيتتىك الەۋەتىن ارتتىرۋ بويىنشا اۋقىمدى شارالار اتاپ ءوتىلدى. قازىر 13 مىڭ شاقىرىم اۆتوجول جوندەلىپ, 1,3 مىڭ شاقىرىمنان استام جاڭا تەمىرجول جەلىلەرى, زاماناۋي لوگيستيكالىق حابتار مەن اۋەجايلار سالىنىپ جاتىر. 2029 جىلعا قاراي ەل اۋماعى ارقىلى وتەتىن ترانزيتتىك جۇكتەردىڭ كولەمىن 100 ملن تونناعا دەيىن ارتتىرۋ جوسپارلانىپ وتىر.
ترانسكاسپي حالىقارالىق كولىك ءدالىزىن قوسا العاندا, مۋلتيمودالدى مارشرۋتتاردى دامىتۋعا ەرەكشە نازار اۋدارىلماق. بل جوبانى جۇزەگە اسىرۋ ءۇشىن اقتاۋ جانە قۇرىق پورتتارى جاڭعىرتىلماق. سونداي-اق پرەزيدەنتتىڭ تاپسىرماسى بويىنشا بيىل ناۋرىز ايىندا ۇلتتىق قۇرىلتاي وتىرىسىندا استانا – ارقالىق – تورعاي – ىرعىز باعىتى بويىنشا تحكب-عا شىعاتىن «ورتالىق – باتىس» ماگيسترالىنىڭ قۇرىلىسى باستالدى, بۇل ەلدىڭ ورتالىق جانە باتىس وڭىرلەرى اراسىنداعى مارشرۋتتى 560 شاقىرىمعا قىسقارتۋعا مۇمكىندىك بەرەدى.
سونىمەن قاتار اۆياتسيا سالاسىنىڭ دامۋى دا اتاپ ءوتىلدى. ەلىمىزدىڭ تۇگەلدەي دەرلىك اۋەجايىندا «اۋە ەركىندىگىنىڭ» بەسىنشى دارەجەسى بار. ءتۋريزمدى دامىتۋ ماقساتىندا كاتونقاراعاي, زايسان جانە كەندىرلى كۋرورتتىق ايماقتارىندا جاڭا اۋەجايلار سالىنۋدا. الماتى, قىزىلوردا جانە شىمكەنت قالالارىندا جاڭا جولاۋشىلار تەرمينالدارى اشىلدى. ارقالىق اۋەجايىن قالپىنا كەلتىرۋ جۇمىستارى جۇرگىزىلىپ جاتىر.
پرەمەر-مينيستر قازاقستاننىڭ كولىك سالاسى تۇتاستاي العاندا جاڭا تسيفرلىق شەشىمدەردى, ونىڭ ىشىندە باسقارۋدىڭ اۆتوماتتاندىرىلعان جۇيەلەرىن, تسيفرلىق ديسپەتچەرلەندىرۋدى ەنگىزۋ ناتيجەسىندە بارعان سايىن تەحنولوگيالىق جانە كليەنتكە باعدارلانعان سيپاتقا يە بوپ كەلە جاتقانىن اتاپ ءوتتى.
ولجاس بەكتەنوۆ پرەزيدەنت اتىنان ەڭبەگىمەن كوزگە تۇسكەن قىزمەتكەرلەرگە كولىك سالاسىن دامىتۋعا قوسقان ۇلەسى ءۇشىن مەملەكەتتىك ناگرادالار مەن قۇرمەتتى اتاقتار تابىس ەتتى.
«بيىل جۇمىسشى ماماندىقتارى جىلى اياسىندا مەملەكەتتىك ماراپاتتار جۇيەسىنە العاش رەت «قازاقستاننىڭ كولىك سالاسىنىڭ ەڭبەك سىڭىرگەن قايراتكەرى» دەگەن قۇرمەتتى اتاعى ەنگىزىلدى. مۇنى مەملەكەت باسشىسىنىڭ جانە بۇكىل قازاق ەلىنىڭ وزدەرىڭىز سياقتى ناعىز ەڭبەك ادامدارىنا دەگەن شىنايى قۇرمەتى دەپ قابىلداڭىزدار. بۇگىن ەلىمىزدىڭ باسقا دا وڭىرلەرىندە كولىك سالاسىنىڭ ءوندىرىس وزاتتارى مەن ەڭبەك ارداگەرلەرىن ۇلىقتاۋ ءراسىمى ءوتىپ جاتىر. رەسپۋبليكا بويىنشا 200-گە جۋىق ادامعا مەملەكەتتىك ناگرادالار مەن قۇرمەتتى اتاقتار تابىستالادى. بۇل – ەل يگىلىگى جولىندا ەسەلى ەڭبەك ەتىپ جاتقان وتاندىق كولىك سالاسى قىزمەتكەرلەرىن قولداۋدىڭ ايقىن كورىنىسى», دەپ اتاپ ءوتتى و.بەكتەنوۆ.
ماراپاتتالعاندار اتىنان قانات شايمين مەن انۋاربەك شۇلعاۋوۆ ءسوز سويلەدى. كولىك سالاسىنىڭ قىزمەتكەرلەرى پرەزيدەنتكە ريزاشىلىقتارىن ءبىلدىرىپ, ولاردىڭ ەڭبەگىنە بەرىلگەن جوعارى باعا قازاقستان يگىلىگى ءۇشىن ءارى قاراي دا ادال جۇمىس ىستەۋگە ىنتالاندىراتىنىن اتاپ ءوتتى.
