پرەمەر-مينيستر «شاردارا» سۋ قويماسى مەن «كوكساراي» سۋ رەتتەگىش نىسانىن بارىپ كوردى. «قازگيدرومەت» رمك-نىڭ مالىمەتىنشە, ەلىمىزدىڭ وڭتۇستىك وڭىرلەرىندەگى بيىلعى ۆەگەتاتسيا ماۋسىمىندا جاۋىن-شاشىن تاپشى بولىپ تۇر. دۇنيەجۇزىلىك مەتەورولوگيالىق ۇيىم مەن سولتۇستىك ەۋرازيالىق كليمات ورتالىعىنىڭ بولجامدارى دا گيدرولوگيالىق قۇرعاقشىلىقتىڭ بولۋى ابدەن مۇمكىن دەيدى. وسى ۇدەرىس اۋىل شارۋاشىلىعىنا قاتەر تۋدىرىپ وتىر, اسىرەسە سىرداريا وزەنى باسسەينى بويىندا قۇرعاق اۋا رايى ۇزاق ۋاقىت ساقتالار بولسا, كەيبىر جەرلەردە ەگىن قۋراپ كەتۋى مۇمكىن.
سۋ بەرۋدى وڭتايلاندىرۋ تۋرالى ىشكى شارالارمەن قاتار, ۇكىمەت سىرداريا وزەنىنىڭ جوعارى جاعىندا ورنالاسقان كورشىلەس مەملەكەتتەرمەن ورتالىق ازيانىڭ مەملەكەتارالىق سۋ شارۋاشىلىعىن ۇيلەستىرۋ كوميسسياسى اياسىندا كەلىسسوزدەر جۇرگىزىپ جاتىر. كەلىسىمدەر سۋدى ۋاقتىلى الۋعا جول اشادى.
شاردارا سۋ قويماسىنىڭ جۇمىسىمەن تانىسۋ كەزىندە پرەمەر-مينيسترگە نىساننىڭ جاعدايى مەن وڭتۇستىك وڭىرلەردەگى سۋارۋ جۇمىستارى تۋرالى باياندالدى. بۇل – تۇركىستان مەن قىزىلوردا وبلىستارىنداعى اۋىل شارۋاشىلىعى القاپتارىن سۋارمالى سۋمەن, سونداي-اق شاردارا قالاسىنىڭ تۇرعىندارىن اۋىزسۋمەن قامتاماسىز ەتەتىن نەگىزگى سۋ نىسانى.
ولجاس بەكتەنوۆ سۋدى ءبولۋ ۇدەرىسىنىڭ اشىق بولۋى ءۇشىن قاداعالاۋدى كۇشەيتۋ قاجەتتىگىن ايتتى.
«اگروونەركاسىپ كەشەنى – ەكونوميكانىڭ نەگىزگى سەكتورلارىنىڭ ءبىرى. قازىرگى جاعدايدا سۋ رەسۋرستارىن قاجەتىنە قاراي ءارى قاتاڭ قاداعالاي وتىرىپ ءبولۋ ەرەكشە ماڭىزعا يە. قاداعالاۋدى بارلىق دەڭگەيدە كۇشەيتىپ, سۋ ءبولۋدى اشىق ەتۋ قاجەت», دەدى پرەمەر-مينيستر.
وسى تۇرعىدا پرەمەر-ءمينيستردىڭ ورىنباسارى قانات بوزىمباەۆقا كورشىلەس ەلدەرمەن سۋ بەرۋ رەجىمدەرىن كەلىسۋ مەن تۋىنداعان ماسەلەلەرگە جەدەل دەن قويۋ, سونىڭ ىشىندە تۇرعىنداردى اۋىزسۋمەن قامتاماسىز ەتۋ بويىنشا جۇمىستاردى ۇيلەستىرۋ تاپسىرىلدى.
«كوكساراي» سۋ رەتتەگىش نىسانىن تەكسەرۋ قورىتىندىسىندا پرەمەر-مينيستر سۋ رەسۋرستارى جانە يرريگاتسيا مينيسترلىگىنە كونتررەتتەگىشتىڭ تولىق قۋاتىندا جۇمىس ىستەۋىن قالپىنا كەلتىرۋ ماقساتىندا رەكونسترۋكتسيالاۋ جۇمىستارىن جەدەلدەتۋدى تاپسىردى. بۇل وزەن اعىنىن قاجەتىنە قاراي رەتتەۋ جانە وڭتۇستىك وڭىرلەردەگى شارۋالاردى تۇراقتى سۋمەن قامتاماسىز ەتۋ ءۇشىن قاجەت.
ولجاس بەكتەنوۆ ترانسشەكارالىق سۋ كوزدەرىنەن كەلەتىن سۋ كولەمىنىڭ ازايۋىنا بايلانىستى ۇكىمەت ىشكى سۋ قورىن دامىتۋعا باسىمدىق بەرىپ وتىرعانىن اتاپ ءوتتى.
«مەملەكەت باسشىسى كوكتەمگى جانە ەرىگەن قار سۋىن جيناپ, ونى ەگىستىككە ءتيىمدى پايدالانۋ ءۇشىن 20 جاڭا بوگەن سالۋ, كەمىندە 15 سۋ قويماسىنا كۇردەلى جوندەۋ جۇرگىزۋ جونىندە تاپسىرما بەرگەن بولاتىن. تاياۋ ۋاقىتتا «بايدىبەك اتا» جانە «بورالداي» سۋ قويمالارى ارقىلى «بوگەن» سۋ قويماسىنا قوسىمشا 113 ملن تەكشە مەتر سۋ بەرىلگەنىنىڭ ارقاسىندا تۇركىستان قالاسى كەپىلدى تۇردە سۋمەن قامتاماسىز ەتىلەدى. ترانسشەكارالىق سۋ كوزدەرىنەن كەلەتىن سۋ كولەمى جىلدان-جىلعا ازايىپ كەلەدى. سوعان بايلانىستى ءبىز ىشكى سۋ قورلارىن بارىنشا پايدالانۋ ءۇشىن قوسىمشا سۋ قويمالارىن سالۋ جولدارىن قاراستىرۋىمىز قاجەت», دەپ اتاپ ءوتتى و.بەكتەنوۆ.
پرەمەر-مينيستر سۋ رەسۋرستارى جانە يرريگاتسيا مينيسترلىگىنە تۇركىستان وبلىسىنىڭ اكىمدىگىمەن بىرلەسىپ, وڭىردەگى سۋ شارۋاشىلىعى جوبالارىن ۋاقتىلى قارجىلاندىرۋدى جانە جۇزەگە اسىرۋدى تاپسىردى.
