الەمگە ايگىلى كورپوراتسيا ءوز تاريحىندا وڭتۇستىك كورەيادان تىس ەلدە كاسىپورىن سالۋ ءۇشىن العاش رەت اۋقىمدى قاراجات ءبولىپ وتىر. جالپى قۇنى 131,5 ملرد تەڭگە بولاتىن ينۆەستيتسيالىق جوبانىڭ 117 ملرد تەڭگەسى – كىا-نىڭ وزىنىكى. تاياۋدا «KIA Corporation»-نىڭ اتقارۋشى ۆيتسە-پرەزيدەنتى, كومپانيانىڭ بۇكىل الەمدەگى وندىرىسىنە جەتەكشىلىك ەتەتىن رەسمي وكىلى دجونگ دجۋنچحول قوستانايعا ارنايى كەلىپ, زاۋىت قۇرىلىسىمەن تانىستى.
ء«بىز ورتالىق ازياداعى قاي ەلگە ينۆەستيتسيا سالۋعا بولادى دەگەن ماسەلە توڭىرەگىندە ۇزاق ويلاستىق. ناتيجەسىندە, ەۋرازيا كىندىگىندە ورنالاسقان قازاقستاندى تاڭدادىق. بۇل – ءبىز ءۇشىن اسا ءىرى ءارى ماڭىزدى جوبا. ءبارىن تەكسەردىك, ەسكەردىك, ەندى, كورىپ وتىرعانىمىزداي, قازان ايىندا جاپپاي وندىرىسكە بارلىعى دايىن بولادى. سىزدەردىڭ قۇرىلىسقا جان-جاقتى قولداۋ كورسەتۋلەرىڭىزدىڭ ارقاسىندا جوبانى مەرزىمىنەن كەشىكتىرمەي ىسكە اسىرماقپىز. سونداي-اق لوكاليزاتسيانى دامىتۋدى دا جوسپارلاپ وتىرمىز: كومپونەنتتەردى وسىندا, تۇرعىلىقتى جەردە وندىرۋگە مۇمكىندىك بەرۋ ءۇشىن اۆتوبولشەكتەردى جەتكىزۋشىلەر اراسىندا ىرىكتەۋ جۇرگىزەمىز», دەدى دجونگ دجۋنچحول.
ءوڭىر باسشىسىنىڭ ايتۋىنشا, كىا زاۋىتى – قوستاناي وبلىسىنىڭ دامۋ تاريحىنداعى ەڭ ءىرى شەتەلدىك ءوندىرىس ورنى.
«مەملەكەت باسشىسىنىڭ تىكەلەي قولداۋى مەن ءتيىستى قۇرىلىمداردىڭ تىڭعىلىقتى جۇمىسىنىڭ ناتيجەسىندە, اتالعان قۇرىلىس رەكوردتىق مەرزىمدە – 1,5 جىلدا اياقتالعالى تۇر», دەدى قۇمار اقساقالوۆ.
زاۋىت ەلدەگى ەڭ زاماناۋي كاسىپورىنعا اينالىپ, جىلىنا 70 مىڭ اۆتوكولىك شىعارماق. جەلىلەر وسى باستان «Sorento» جانە «Sportage» مودەلدەرىن شىعارۋعا بەيىمدەلگەن. 2026 جىلدىڭ سوڭىنا قاراي قاتارعا جاڭارتىلعان «Cerato» مودەلى قوسىلادى. كەلەشەكتە كاسىپورىندا كىا-نىڭ 13 ءتۇرلى مودەلى قۇراستىرىلادى. ءوندىرىس ورنىندا دانەكەرلەۋ, شاناق سىرلاۋ, پلاستيك بولشەكتەردى بوياۋ, جيناقتاۋ جانە قويما بولىمدەرى ءتارىزدى 5 تەحنولوگيالىق ۋچاسكە بار. وندىرىستىك تسەحتاردا 67 روبوت جۇمىس ىستەيدى. لوگيستيكا ء«ۇزىلىسسىز لەك قاعيداتىمەن» جۇمىس ىستەپ, ساپا 3D-سكانەرمەن باقىلانادى.
ۇجىمدا وڭىردەگى كوللەدجدەر مەن ۋنيۆەرسيتەتتەردە, سونداي-اق وڭتۇستىككورەيالىق «Dong-Eui» ۋنيۆەرسيتەتىندە دايارلىقتان وتكەن جەرگىلىكتى ماماندار جۇمىس ىستەيدى. قازىردىڭ وزىندە كاسىپورىندا قوستانايلىق كوللەدجدەردىڭ 40 تۇلەگى جۇمىس ىستەپ جاتىر. تاياۋدا تاعى 34 جاس مامان جۇمىسقا قابىلدانباق. تاجىريبە الماسۋ باعدارلاماسى اياسىندا احمەت بايتۇرسىن ۇلى اتىنداعى قوستاناي وڭىرلىك ۋنيۆەرسيتەتىنىڭ 12 تۇلەگى وڭتۇستىك كورەيادا وقىپ كەلدى.
«ەكى جىل ىشىندە وڭىردە 939 مامان دايارلاندى. زاۋىتتىڭ كادرلىق ستراتەگياسى جەرگىلىكتى ماماندارعا, ولاردىڭ بىلىكتىلىگىن ارتتىرۋعا باعدارلانادى. جۇمىسشىلاردى جاتىن ورىنمەن قامتاماسىز ەتۋ ماسەلەسى دە شەشىمىن تاپتى», دەيدى وبلىس اكىمى.
بۇگىندە كىا زاۋىتىنىڭ ىرگەسىندە اۋماعى 30 مىڭ شارشى مەتر بولاتىن لوكاليزاتسيا ورتالىعى سالىنىپ جاتىر. مۇندا جىلىنا كولىك ورىندىقتارى, پايدالانىلعان گازدى شىعارۋ جۇيەسى, پلاستيك پانەلدەر سياقتى سان الۋان اۆتوكومپونەنت وندىرىلمەك. كاسىپورىن جىلىنا 60 مىڭ اۆتوبولشەك دايىندايدى.
جول قۇرىلىسىنا, كىرمە جولدار مەن ينجەنەرلىك جەلىلەرگە رەسپۋبليكالىق بيۋدجەتتەن 11 ملرد تەڭگە بولىنگەن. ۇزىندىعى 5,2 شاقىرىمدىق تەمىرجول تارماعى جۇمىس ىستەپ تۇر. ماماندار اتالعان 2 ءىرى ءوندىرىس ورنى ىسكە قوسىلعان سوڭ, ءوڭىردىڭ وڭدەۋ ونەركاسىبىنىڭ ءوسىمى 46%-دان اسىپ تۇسەدى دەگەندى ايتادى.
قوستاناي وبلىسى
