سۋرەت: astana-akshamy.kz
بيىلعى V ماۋسىمنىڭ جابىلۋى قازاقتىڭ ۇلى اقىنى, فيلوسوف, سازگەر جانە اعارتۋشىسى اباي قۇنانباي ۇلىنىڭ 180 جىلدىعىنا ارنالدى. ءىس-شارا بارىسىندا تەاتر ديرەكتورى اسحات ماەميروۆ: «كەز كەلگەن تەاتر ءۇشىن ماۋسىمنىڭ اشىلۋى مەن جابىلۋى جۇرەكتى تولقىتاتىن ءسات. ءارى سىزدەرمەن ءبىر ايداي ءۇزىلىس جاساپ, قايتادان كەزدەسەمىز. وسىدان بەس جىل بۇرىن اشىلعاندا دا مۇحتار اۋەزوۆتىڭ «اباي-توعجان» مۋزىكالىق دراماسىمەن شىمىلدىعىن تۇرگەن بولاتىنبىز. بۇل – تەاترىمىزدىڭ تولقۇجاتى ىسپەتتەس قويىلىم. وسى بەسىنشى مەرەيلى ماۋسىمدا بەس قويىلىمنىڭ پرەمەراسىن جاسادىق. سونداي-اق كورەرمەندەرگە 266 مارتە سپەكتاكل ۇسىنىپ, بۇل قويىلىمداردى 61 181 ادام تاماشالادى», دەدى.
وسى ماۋسىمدا تەاتر قورجىنىنا «قىزجىلاعان» دراماسى, «سىلاڭ قىز» كومەدياسى, «امىرە» مونوسپەكتاكلى, «S.O.S» دراماسى, «مانشۇك» مۋزىكالىق دراماسى ەنىپ, 5 جاڭا پرەمەرامەن تولىعىپ, تەاتردىڭ رەپەرتۋارىنداعى قويىلىمدار سانى 28-گە جەتكەن.
«اباي-توعجان» مۋزىكالىق دراماسى – تەاترداعى جاڭا تۋىندى. بالالار مەن جاسوسپىرىمدەر دۇنيەتانىمىنا, تالعامىنا, رۋحاني بولمىسىنىڭ قالىپتاسۋىنا اسەر ەتەتىن قويىلىم – اباي عۇمىرىنىڭ بوزبالا كەزەڭىنەن كورىنىس بەرەدى. قويىلىم رەجيسسەرى تەاتردىڭ ديرەكتورى ءارى كوركەمدىك جەتەكشىسى اسحات ماەميروۆ بولسا, ينستسەنيروۆكا اۆتورى – ميراس ءابىل, مۋزىكالىق كەڭەسشىسى – ديماش قۇدايبەرگەن.
جاس ابايدىڭ جۇرەگىندە ويانعان العاشقى ماحابباتى, كوكىرەگىندە تۋعان تۇڭعىش جىرى اۋەزدى انگە اينالىپ, ىشكى سەزىم تەبىرەنىستەرىن الاساپىران كۇيگە سالادى. توعجانعا دەگەن ىڭكار سەزىم – ومىرگە دەگەن قۇشتارلىققا ۇلاسىپ, ابايدىڭ ادامزاتقا دەگەن اسقاق ماحابباتىنىڭ تەمىرقازىعىنا اينالدى. قۇنانبايداي اكەنىڭ ونەگەسى, ۇلجانداي انانىڭ تاربيەسى, قورشاعان ورتانىڭ تىلسىم سىرى, عاشىقتىقتىڭ عالاماتى, دوس پەن باۋىردىڭ قادىرى جاس كورەرمەننىڭ جانىنا رۋحاني ءلاززات سىيلاپ, ساناسىنا كوركەم كوزقاراس قالىپتاستىرۋعا ىقپال ەتەدى.
