«ادەمى قارتايۋدىڭ نەگىزى – مادەنيەتتە» دەپ بىلەتىن قانىمجان شوتبايقىزىنىڭ الماتى وبلىسىنىڭ مادەنيەت سالاسىنا سىڭىرگەن ەڭبەگى وراسان. تاۋەلسىز ەل اتانعان العاشقى جىلداردىڭ قيىن-قىستاۋ شاعىندا بويىنداعى ءبىلىم-بىلىگىن, كۇش-قايراتىن ءوڭىر رۋحانياتىنىڭ جاندانۋىنا سارپ ەتتى. ەڭبەك جولىن تالعار اۋدانىندا ۇستازدىقتان باستاعان ق.سۇلتانقۇلوۆا وقۋ ءىسىنىڭ ىلگەرىلەۋىنە ىزدەنىمپازدىقپەن اتسالىستى. مىڭداعان بالالاردىڭ كەۋدەسىنە ءبىلىم-ءىلىمنىڭ ساۋلەسىن قۇيدى. ۇستازدىق ەتە ءجۇرىپ, وشاعىنىڭ ءتۇتىنىن تۇتەتتى, بەسىگىن تەربەتتى. ۇرپاق تاربيەسىندەگى ەلەۋلى ەڭبەگى ەسكەرىلىپ, «قازاقستان رەسپۋبليكاسى ءبىلىم بەرۋ ءىسىنىڭ ۇزدىگى» اتاندى, مينيسترلىكتىڭ قۇرمەت گراموتاسىمەن ماراپاتتالدى.
ۇرپاق ساباقتاستىعى مەن تاربيەسىنە قامقور بولا بىلگەن بىلىكتى پەداگوگتىڭ ىسكەرلىك, ۇيىمداستىرۋشىلىق قارىم-قابىلەتى ەسكەرىلىپ, مەملەكەتتىك قىزمەتكە تارتىلدى. 1994–1998 جىلدار ارالىعىندا تالعار اۋدانى, ودان كەيىندە ەڭبەكشىقازاق اۋدانى اكىمىنىڭ ورىنباسارى بولىپ, ءوڭىردىڭ دامۋىنا لايىقتى ۇلەس قوستى. جاۋاپتى قىزمەتتەردى ابىرويمەن اتقارىپ, قوس اۋداننىڭ الەۋمەتتىك-ەكونوميكالىق دامۋىنا ەسەلەپ ەڭبەك ءسىڭىردى. ەلدىڭ ەڭسەسىن تىكتەپ, ەتەك-جەڭىن جيۋىنا انالىق جۇرەگىمەن, ىزگى تىلەگىمەن قامقورشى بولا ءبىلدى.
سانالى عۇمىرىنىڭ بەس جىلىندا, ياعني 1999–2004 جىلدار ارالىعىندا الماتى وبلىسىنىڭ مادەنيەت باسقارماسىنىڭ باستىعى بولىپ تاعايىندالىپ, نارىق تۇسىنداعى قارجى تاپشىلىعىنان تۇساۋلانعان حالىقتىق ونەردىڭ ءون بويىنا قان جۇگىرتىپ, بارىن قۇراپ, جوعىن تۇگەندەپ, مادەنيەتتىڭ جانداۋىنا اتسالىستى. ۇلتتىق قۇندىلىقتارىمىزدىڭ جاناشىرى بولا بىلگەن اياۋلى جان سول ءبىر ءولىارا شاقتا مادەنيەتىمىز بەن ونەرىمىزدى, رۋحىمىزدى كوتەرۋ جولىندا تىنىم تاپپادى. ەڭبەگى ەلەۋسىز قالماي, 2021 جىلى الماتى وبلىسىنىڭ قۇرمەتتى ازاماتى اتاندى.
«ادەمى قارتايۋ – اللانىڭ ادامعا بەرگەن سىيى. وكىنىشكە قاراي, كارىلىككە جەتە الماي قالاتىندار دا بار. وسى جاسقا دەيىنگى ءومىر جولىمىزدا تالاي قيلى كەزەڭدەردەن وتتىك. ەل الدىنا تۇسپەسەك تە, قاتاردان قالمادىق. تاۋەلسىز ەلىمىزدىڭ گۇلدەنۋىنە, حالىقتىق مۇرالارىمىزدىڭ جارقىراپ, جاندانۋىنا شاما-شارقىمىزشا قىزمەت ەتتىك. مەملەكەتتىك قىزمەتكە بىرگە جەگىلگەن زامانداستارىمنىڭ, ارىپتەستەرىمنىڭ كوكەيىندە ەلدىك مۇددەگە قىزمەت ەتۋ قاشاندا جانباعىستان جوعارى تۇردى», دەيدى قانىمجان شوتبايقىزى.
تەرەڭ ءبىلىم-بىلىك, كەڭ پاراسات-پايىم يەسى زەينەتكە شىققالى بەرى دە قوعامنان شەت قالماي, بۇگىندە ادىلەتتى قازاقستاننىڭ دامۋىنا ءۇن قوسىپ كەلەدى.
«مەملەكەت باسشىسى قاسىم-جومارت توقاەۆتىڭ قازاقستان حالقىنا ارناعان بىلتىرعى جولداۋىندا ەڭبەك ەتكەن ادامنىڭ قادىرلى بولاتىنى باسا ايتىلدى. اركىم ءوز ىسىنە جاۋاپكەرشىلىكپەن قاراۋ كەرەكتىگىن ەسكە سالدى. «جۇمىستىڭ كوزىن تاپقان بايلىقتىڭ ءوزىن تابادى» دەگەن دانالىقتى العا تارتتى پرەزيدەنت. كەز كەلگەن ادام ءوزىنىڭ مىندەتىن دۇرىس, ادال اتقارىپ, ادامگەرشىلىكپەن جۇمىس ىستەيتىن بولسا ابىروي بيىگىنەن كورىنەدى. سونىمەن قاتار ەتكەن ەڭبەگى وسكەلەڭ ۇرپاققا ۇلگى-ونەگە بولادى», دەپ تولعانادى ەڭبەك ارداگەرى.
«ۇرشىعىن ءيىرىپ, نەمەرە-شوبەرەلەرىنىڭ ورتاسىندا جايقالىپ وتىراتىن انالاردىڭ ءون بويىنان باقىتتىڭ, قۋانىشتىڭ لەبى ەسىپ تۇرادى. ومىرگە قۇشتار ادام ەشۋاقىتتا قارتايىپ كەلەمىن دەپ ويلامايدى, تۇلا بويىنا سىڭگەن وتانشىل قاسيەتىمەن ەل مەن جەرگە قىزمەت ەتكەننەن, بالا-شاعانىڭ كۇيىن كۇيتتەگەننەن تالمايدى, شارشامايدى», دەيدى ۇلىن ۇياعا قوندىرىپ, قىزىن قياعا ۇشىرىپ, ءتىلى ءتاتتى نەمەرەلەرىن تاربيەلەپ وتىرعان ارداقتى اجە قانىمجان شوتبايقىزى.
الماتى وبلىسى
