ۆيتسە-ءمينيستردىڭ ايتۋىنشا, قازىرگى تاڭدا ەڭبەك نارىعىندا ءۇش نەگىزگى ءۇردىس بايقالادى.
ءبىرىنشىسى – تسيفرلاندىرۋ مەن اۆتوماتتاندىرۋ ۇدەرىسىنىڭ جەدەلدەۋى. قازىرگى زامان ماماندىقتارىنىڭ باسىم بولىگى تسيفرلىق ساۋاتتىلىقتى تالاپ ەتەدى.
ەكىنشىدەن, پلاتفورمالىق جۇمىسپەن قامتۋ مەن ەلەكتروندى ساۋدانىڭ اۋقىمى كەڭەيىپ كەلەدى. كوپتەگەن ازاماتتار ونلاين-پلاتفورمالار ارقىلى قىزمەت كورسەتىپ, فريلانسپەن اينالىسۋدا نەمەسە ينتەرنەت-دۇكەندەر ارقىلى تابىس تاۋىپ جاتىر.
ۇشىنشىدەن, ەلىمىزدەگى دەموگرافيالىق ءوسىمنىڭ ناتيجەسىندە ەڭبەك نارىعىنا كەلىپ جاتقان جاستار سانى جىل سايىن ارتىپ كەلەدى. ساراپشىلاردىڭ بولجاۋىنشا, 2035 جىلعا دەيىن بۇل كورسەتكىش جىلىنا 360 مىڭ ادامعا دەيىن جەتۋى مۇمكىن.
بۇل رەتتە تسيفرلىق داعدىلاردى مەڭگەرتۋ, كاسىبي قايتا دايارلاۋ باعدارلامالارى مەن جاستاردى ەڭبەككە بەيىمدەۋ الدىڭعى قاتارداعى مىندەت رەتىندە بەلگىلەنگەن.
بۇدان بولەك ۇكىمەت ەلىمىزدىڭ وڭتۇستىك وڭىرلەرىنەن سولتۇستىك وڭىرلەرگە ەڭبەك كوشى-قونىنىنا ىنتالاندىرۋدى ماقسات ەتىپ وتىر. بۇل باستاما اياسىندا قونىس اۋدارۋشىلارعا الەۋمەتتىك قولداۋدىڭ كەڭەيتىلگەن توپتاماسى ۇسىنىلىپ, جاڭا ورتاعا بەيىمدەلۋىنە بارىنشا جاعداي جاسالادى.
سونىمەن قاتار, جاستاردىڭ ءبىلىم الىپ, ەڭبەككە ارالاسۋىن جەڭىلدەتۋ ءۇشىن ءبىلىم بەرۋ جۇيەسىن جاڭعىرتۋعا ايرىقشا كوڭىل بولىنەتىن بولادى. بۇل جەردە باستى ماقسات – جوعارى وقۋ ورىندارى مەن كوللەدج تۇلەكتەرى ەڭبەك نارىعىندا سۇرانىسقا يە, ناقتى داعدىلاردى مەڭگەرگەن مامان بولىپ شىعۋى. ياعني, جاستار ديپلوم ءۇشىن ەمەس, ناقتى كاسىبي باعدار مەن ەڭبەككە تەز ارالاسۋ ءۇشىن وقۋى ءتيىس دەگەن ۇستانىم باسىم.
ەڭبەك نارىعىنداعى اشىقتىق پەن ادىلدىكتى قامتاماسىز ەتۋ دە – باستى نازاردا. وسى ماقساتتا ەلەكتروندىق ەڭبەك شارتتارىن جانە شتاتتىق كەستەلەردى ەنگىزۋ جۇمىستارى جالعاسىپ جاتىر. بۇل شارالار كولەڭكەلى جۇمىسپەن قامتۋدى ازايتىپ, ەڭبەك قاتىناستارىن تسيفرلىق باقىلاۋعا مۇمكىندىك بەرەدى. مەملەكەتتىك ورگاندار ءۇشىن دە, جۇمىس بەرۋشىلەر مەن جۇمىسكەرلەر ءۇشىن دە ءتيىمدى بولماق.
