ىزدەستىرۋ جۇمىستارىنا شامامەن 400 ادام, 70-تەن استام جەرۇستى تەحنيكاسى, 21 ءجۇزۋ قۇرالى, 10 ۇشقىشسىز ۇشۋ اپپاراتى, ەحولوتتار, سۋاستى بارلاۋ قۇرالدارى جانە كينولوگيالىق ەسەپتوپتار جۇمىلدىرىلعان.
وپەراتسيا ورنىنا باسشىلىق جاساۋدى قازاقستان قارۋلى كۇشتەرى اۋە قورعانىسى كۇشتەرىنىڭ قولباسشىسى اۆياتسيا گەنەرال-مايورى اسقار عادىلش ۇلى ءىزباسوۆ جۇزەگە اسىرۋدا. ول بارلىق قاتىسۋشى بولىمشەلەر مەن قىزمەتتەردىڭ جۇمىسىن ۇيلەستىرىپ وتىر.
جۇمىلدىرىلعان كۇشتەر مەن قۇرالدار:
قورعانىس مينيسترلىگى: 193 اسكەري قىزمەتشى, 4 ۇشقىشسىز ۇشۋ اپپاراتى, 25 بىرلىك تەحنيكا, 8 ءجۇزۋ قۇرالى. قوسىمشا اۋەدەن بارلاۋ ۇيىمداستىرىلعان.
توتەنشە جاعدايلار مينيسترلىگى: 87 ادام, 22 تەحنيكا, 10 ءجۇزۋ قۇرالى, 7 ۇشقىشسىز ۇشۋ اپپاراتى, 2 ەحولوت, قۇتقارۋشى سۇڭگۋىرلەر جانە 2 كينولوگيالىق ەسەپتوپ.
ىشكى ىستەر مينيسترلىگى: 102 قىزمەتكەر, 30 تەحنيكا. جەرگىلىكتى اتقارۋشى ورگان (اكىمدىك): 2 اۆتوكولىك, 3 ءجۇزۋ قۇرالى.
سۋ قويماسىنىڭ اكۆاتورياسى مەن جاعالاۋ ايماعى, سونىڭ ىشىندە قيىن جەتەتىن جانە تەرەڭ ۋچاسكەلەر كەشەندى تۇردە زەرتتەلۋدە. ىزدەستىرۋ-قۇتقارۋ جۇمىستارى كۇندىز-ءتۇنى توقتاۋسىز جۇرگىزىلۋدە.
جوعالعانداردىڭ تۋىستارىمەن تۇراقتى جانە نىسانالى جۇمىس ۇيىمداستىرىلعان. ولار ىزدەستىرۋ بارىسى تۋرالى ۋاقتىلى حاباردار ەتىلىپ وتىر.
ايتا كەتەيىك, سوربۇلاق – تمد اۋماعىنداعى ەڭ ءىرى جانە الەمدەگى ەڭ ءىرى تەحنوگەندى سۋ قويمالارىنىڭ ءبىرى. ول الماتى وبلىسىنىڭ سولتۇستىك-باتىسىنداعى تابيعي تۇيىق ويىستا ورنالاسقان.
سۋ قويماسىنىڭ ەرەكشەلىكتەرى:سۋاستى بەدەرىنىڭ كۇردەلىلىگى جانە ءتۇبىنىڭ لايلانۋى; تەرەڭدىكتىڭ 22 مەترگە دەيىن جەتۋى; سۋ الماسۋدىڭ باياۋلىعى; سۋدىڭ كورىنبەۋى, تۇبىندە لاي مەن بالدىرلاردىڭ مول بولۋى.
- اتالعان تابيعي جانە تەحنوگەندىك جاعدايلار ىزدەستىرۋ جۇمىستارى مەن سۇڭگۋىرلەردىڭ قىزمەتىن ەداۋىر قيىنداتادى. بۇل جوعارى دالدىكتى, ۇيلەسىمدى ارەكەتتى جانە زاماناۋي تەحنيكالىق جابدىقتاردى قاجەت ەتەدى. ىزدەستىرۋ-قۇتقارۋ وپەراتسياسى ناقتى ناتيجە الىنعانعا دەيىن جالعاسادى. ونىڭ بارىسى مەن قورىتىندىلارى تۋرالى قوسىمشا حابارلانادى, - دەلىنگەن اقپاراتتا.
