قازاق بەينەلەۋ ونەرىنە ايشىقتى ءىز قالدىرعان داۋلەتيار دارىن يەسى – حح عاسىردا ۇلت ونەرىندەگى جاڭا كوركەمدىك ءداۋىردىڭ باستاۋىندا تۇرعان, ۇلتتىق بەينەلەۋ ونەرىنىڭ نەگىزىن قالاۋشىلاردىڭ ءبىرى. ول وتاندىق سۋرەت الەمىنىڭ قالىپتاسۋىنا جول اشىپ, تۇتاس ءبىر بۋىن سۋرەتشىلەرگە ۇستاز بولا ءبىلدى.
كەنباەۆتىڭ شىعارماشىلىعى تەك كەسكىندەمەمەن شەكتەلمەيدى. 1960–1980 جىلدار ارالىعىندا ول ەلىمىزدە قوعامدىق عيماراتتاردا موزايكا ونەرىنىڭ دامۋىنا ايرىقشا ۇلەس قوستى. ونىڭ مونۋمەنتالدى شىعارمالارى بۇگىنگى كۇنى قازاقستاننىڭ ساۋلەتتىك كەلبەتىنىڭ اجىراماس بولىگىنە اينالعان.
مۋزەي ۇجىمى كورمەنىڭ باستى ماقساتى – ۇلت رۋحانياتىنا سۇبەلى ۇلەس قوسقان كوركەمونەر شەبەرىنىڭ باي مۇراسىن ۇلىقتاپ, كەلەشەك ۇرپاققا ناسيحاتتاۋ ەكەنىن ايتادى. ەكسپوزيتسيادا حالىق سۋرەتشىسىنىڭ 100-گە جۋىق تاڭداۋلى تۋىندىسى ۇسىنىلعان.
ءىس-شاراعا الماتى قالاسى اكىمدىگى, عىلىمي جانە شىعارماشىلىق زيالى قاۋىم وكىلدەرى, مادەنيەت پەن ونەر قايراتكەرلەرى, سونداي-اق مولداحمەت كەنباەۆ شىعارمالارىنا قۇرمەتپەن قارايتىن ونەر جاناشىرلارى قاتىستى.
كورمەنىڭ اشىلۋ سالتاناتىندا ءسوز العان قر مەملەكەتتىك ورتالىق مۋزەيى ديرەكتورىنىڭ مىندەتىن اتقارۋشى سەرجان ساروۆ داڭقتى سۋرەتشىنىڭ مۇراسى ونەرتانۋشىلار ءۇشىن ورەلى قازىنا ەكەنىن ايتىپ, مادەنيەت جانە اقپارات ءمينيسترى ايدا بالاەۆانىڭ قۇتتىقتاۋىن جەتكىزدى. سونداي-اق, كەنباەۆتىڭ ۇلتتىق ونەردەگى ورنى مەن مۋزەي قورىنداعى تۋىندىلارىنىڭ تاريحي ماڭىزىن ەرەكشە اتاپ ءوتتى.
سالتاناتتى كەشتە ونەرتانۋ كانديداتى, دوتسەنت, «ARK» كوركەمونەر گالەرەياسىنىڭ نەگىزىن قالاۋشى ءارى ديرەكتورى, كسرو ساۋلەتشىلەر وداعىنىڭ تەوريا جانە سىن سالاسى بويىنشا لاۋرەاتى ەليزاۆەتا مالينوۆسكايا مەن قازاقستان سۋرەتشىلەر وداعى حاتشىلىعىنىڭ مۇشەسى ءاسيا حايرۋلينا, الماتى قالاسى مادەنيەت باسقارماسىنىڭ ورىنباسارى ارمان حالبەكوۆ سۋرەتشى شىعارماشىلىعى حاقىندا جىلى لەبىزدەرىن جەتكىزدى.
كەش سوڭىندا ءسوز كورمەنىڭ ۇيىمداستىرۋشىسى ءارى اكە ونەرىن جالعاستىرۋشى الپامىس مولداحمەت ۇلى كەنباەۆقا بەرىلدى. ول جينالعان قاۋىمعا شىنايى العىسىن ءبىلدىرىپ, اكەسىنىڭ شىعارماشىلىق جولى مەن رۋحاني مۇراسى تۋرالى ەستەلىكتەرىمەن ءبولىستى.
كورمەنىڭ رەسمي اشىلۋى بارىسىندا م. كەنباەۆتىڭ «تسەلينا» اتتى تۋىندىسى سۋرەتشىنىڭ وتباسى اتىنان قر مەملەكەتتىك ورتالىق مۋزەي قورىنا سىيعا تارتىلدى. بۇل شىعارما مۋزەيدىڭ كەسكىندەمە توپتاماسىن تولىقتىرىپ, ۇلتتىق بەينەلەۋ ونەرىنىڭ التىن قورىن بايىتا تۇسپەك.
سونىمەن قاتار, كەنباەۆتار وتباسى ورتالىق مۋزەيگە م.كەنباەۆتىڭ ۇلتتىق بەينەلەۋ ونەرى سالاسىنداعى جەتىستىكتەرىن دالەلدەيتىن ديپلومدارىن, ماراپاتتارى مەن سەرتيفيكاتتارىن سىيعا تارتتى. بۇل زاتتار شەبەردىڭ جەكە مۋزەيلىك كەشەنىن قالىپتاستىرىپ, كەنباەۆتىڭ كوركەم مۇراسىن ساقتاۋ, قورعاۋ جانە ناسيحاتتاۋ جۇمىستارىنا دا زور سەپتىگىن تيگىزەتىنى انىق.
