استانا. 19 ناۋرىز. اتىراۋ وبلىسىندا كاسپي تەڭىزى ايدىنىندا جوعالعان بالىقشىلاردى ىزدەي شىققان ءتورت قۇتقارۋشىدان حابار بولماي كەتتى. بۇل تۋرالى «مۇنايلى استانا» گازەتى جازادى.
ناۋرىزدىڭ 16-سى كۇنى اتىراۋعا ىرگەلەس ەلدى مەكەننىڭ ەكى تۇرعىنى موتوتسيكلگە ءمىنىپ, كاسپيدىڭ ۇستىنەن ويىق ارقىلى بالىق اۋلاۋعا بارعان جەرلەرىندە اداسىپ كەتەدى.
گازەت رەداكتسياسىنا حابارلانعانداي, بالىقشىلار ءوز جولدارىن اتىراۋ قالاسىنان 170-180 شاقىرىم جەردەگى يساتاي اۋدانىنىڭ زابۋرىن اۋىلىنان باستايدى.
«قاتىپ جاتقان جاعالاۋدا اداسىپ كەتىپ, ءبىر تاۋلىك بويى جۇرگەن ولار كەلەسى كۇنى, 17 ناۋرىزدا كورشىلەس قۇرمانعازى اۋدانىنىڭ بالىقشىلارىمەن جولىعىسادى. موتوتسيكلدەرىن مۇز ۇستىنە قالدىرعان ولار قايىقپەن قۇرمانعازى اۋدانىنىڭ رەسەيمەن اراداعى شەكاراعا جاقىن جەردەگى سافونوۆكا اۋىلىنا دەيىن جەتەدى. سول جاقتان تەك 17-ءسى كۇنى كەشكە قاراي عانا قايتادان زابۋرىن اۋىلىنا ورالادى. سويتسە, سول كۇنى اۋىلدىڭ 4 جىگىتى ولاردى ىزدەپ, «نيۆا» ماشيناسىمەن جولعا شىعىپ كەتىپتى. بىراق ولاردىڭ كولىگى دالادا ءوشىپ, تۇرىپ قالعان», - دەلىنگەن وبلىستىق توتەنشە جاعدايلار دەپارتامەنتىنىڭ حابارلاماسىندا.
بۇدان ءارى ىزدەۋشىلەر JPS ناۆيگاتورىنىڭ كومەگىمەن جاياۋ جۇرۋگە كوشەدى. ءتۇندى ولار تەڭىزدىڭ جاعالاۋىندا وتكىزەدى. ال تاڭەرتەڭ ناۆيگاتور ىستەن شىعىپ قالادى. بۇل اۋىلداعىلاردىڭ ولاردى جوعالدىعا ساناۋلارىنا سەبەپ بولادى. سوسىن, 18 ناۋرىز كۇنى تاڭەرتەڭ ولاردىڭ تۋعان-تۋىستارى پوليتسياعا حابار بەرىپ, شۇعىل ىزدەستىرۋ جۇمىستارى باستالادى. وسىلايشا اۋداندىق توتەنشە جاعدايلار ءبولىمىنىڭ بەس قىزمەتكەرى ءبىر كولىكپەن جانە زابۋرىن اۋىلىنىڭ 57 ازاماتى 13 موتوتسيكلمەن, 5 اۆتوماشينامەن ىزدەۋگە شىعادى. وبلىستىق دەپارتامەنتتە جوعالعان ادامداردى ىزدەۋ جونىندەگى شتاب قۇرىلادى. ىزدەۋشىلەر توبىنا كومەككە اتىراۋدان سەگىز قۇتقارۋشى جىبەرىلەدى. كورشى اۋداننان تاعى 4 قىزمەتكەر قوسىلادى.
جولدا قالعان «نيۆا» شامامەن 13:15 ساعاتتا زابۋرىننان 20 شاقىرىم جەردە, كاسپي باعىتىنان تابىلادى. الايدا, كەتىپ قالعان ادامدارى تابىلا قويمايدى. سوسىن اتىراۋدان «ەۆروكوپتەر» ماركالى تىكۇشاق ۇشىپ كەلەدى. ول تەڭىز جاعالاپ ۇشۋدىڭ ناتيجەسىندە جوعالعانداردى جاعالاۋدان 40 شاقىرىمداي قاشىقتاعى «نوۆينسكيە» ارالىنان تابادى. جيىرما مينۋتتان كەيىن ولار زابۋرىنعا جەتكىزىلدى.
مۇرات ايتقوجا.
دەرەك, سۋرەت: مۇنايلى استانا.
