نىساندى ىسكە قوسۋ راسىمىنە پرەمەر-ءمينيستردىڭ ورىنباسارى ەرمەك كوشەرباەۆ, قوستاناي وبلىسىنىڭ اكىمى قۇمار اقساقالوۆ, «كەدەنترانسسەرۆيس» اق باس ديرەكتورى ەلنار جۇماتاەۆ جانە «Allur» كومپانيالارى ديرەكتورلار كەڭەسىنىڭ توراعاسى اندرەي لاۆرەنتەۆ قاتىستى. اتالعان جوبانى «ونەركاسىپتى دامىتۋ قورىنىڭ» قولداۋىمەن «كەدەنترانسسەرۆيس» اق جۇزەگە اسىرادى. جالپى قۇنى 64 ملرد تەڭگە بولاتىن لوگيستيكالىق كەشەن قوستاناي ىرگەسىندەگى 133,6 گەكتار اۋماقتى الىپ جاتىر. «توبىل» كلك ىسكە قوسىلعان سوڭ جىلىنا كولەمى جيىرما فۋتتىق 400 مىڭ كونتەينەر نەمەسە 11 ملن توننادان استام جۇك تاسىمالدانباق.
كەشەن 500-دەن استام لوگيستەردى, وپەراتورلاردى, IT جانە قىزمەت كورسەتۋشى مامانداردى جۇمىسپەن قامتاماسىز ەتەدى. پرەمەر-ءمينيستردىڭ ورىنباسارى ەرمەك كوشەرباەۆ ىسكە قوسۋ راسىمىندە سويلەگەن سوزىندە جوبانىڭ ماڭىزىنا توقتالدى.
ء«بىز جاي عانا لوگيستيكالىق حاب سالىپ جاتقان جوقپىز, ەلدىڭ جاڭا ەكونوميكالىق گەوگرافياسىنىڭ بەرىك نەگىزىن قالاپ جاتىرمىز. «توبىل» كەلەشەكتە لوگيستيكا, تسيفرلاندىرۋ, ءبىلىم جانە يندۋستريا توعىسقان زياتكەرلىك الاڭعا اينالادى. مۇندا جاستارعا كوپتەگەن جاڭا ماماندىق, جاڭا جۇمىس ورىندارى قۇرىلماق. بۇل – ايماقتىق ەمەس, ۇلتتىق جوبا, بۇكىل ەلدىڭ وركەندەۋىنىڭ كاتاليزاتورى. كەشەن ەلىمىزدىڭ جاھاندىق جەتكىزۋ تىزبەگىندەگى پوزيتسياسىن نىعايتىپ, بيزنەس پەن ينۆەستورلار ءۇشىن جانە وسىندا, ءوز وتانىندا ءوسىپ, دامىعىسى كەلەتىن ادامدار ءۇشىن جاڭا مۇمكىندىك اشادى», دەدى پرەمەر-ءمينيستردىڭ ورىنباسارى.
2025 جىلدىڭ ءبىرىنشى جارتىجىلدىعىندا ەل ارقىلى ترانزيتتىك تاسىمالداۋ 16,8 ملن توننانى قۇراعان. بۇل وتكەن جىلدىڭ وسى كەزەڭىمەن سالىستىرعاندا 4%-عا ارتىق. ماماندار «توبىل» كلك ىسكە قوسىلعان سوڭ كورسەتكىش ەداۋىر ۇلعايادى دەپ وتىر.
«جاڭا كەشەن كاسىپورىندار ءۇشىن لوگيستيكالىق شىعىنداردى تومەندەتۋگە, ەكسپورتقا باعدارلانعان وندىرىستەردى دامىتۋعا جانە وڭدەۋ سەكتورىنا جاڭا ينۆەستيتسيالار تارتۋعا جانە جاڭا ونەركاسىپتىك كاسىپورىنداردىڭ پايدا بولۋىنا جاعداي جاسايدى. ءبىز «توبىل» كولىك-لوگيستيكالىق كەشەنى ينۆەستيتسيا الەۋەتىن ارتتىرىپ, ءوڭىر ونەركاسىبىنىڭ ودان ءارى دامۋىنا سەرپىن بەرەتىنىنە سەنەمىز», دەيدى «توبىل» كولىك-لوگيستيكالىق كەشەنىنىڭ ديرەكتورى ايدىن ءالىموۆ.
كەشەن قىتاي, ورتالىق ازيا, تۇركيا, يران, اۋعانستان جانە ەۋروپانى بايلانىستىراتىن حالىقارالىق كولىك دالىزدەرىنە تىكەلەي قوسىلادى. قازاقستاننىڭ سولتۇستىگىنەن رەسەيدىڭ ورال ايماعىنا, قىتايعا جونەلتىلەتىن جۇك كولەمى دە ارتادى. كەشەن اۋماعىندا ء«بارى ءبىر جەردە» قاعيداتى بويىنشا تەرمينالدار, قويمالار, كەدەندىك راسىمدەۋ, IT جانە سەرۆيستىك ايماقتار ورنالاسادى. جۇكتەردى باقىلاۋدىڭ تسيفرلىق جۇيەسى دە قامتاماسىز ەتىلگەن. قۇرىلىس 2027 جىلى اياقتالادى دەپ جوسپارلانىپ وتىر.
بۇگىندە قوستاناي وبلىسى – ەلىمىزدىڭ ءىرى يندۋستريالىق ورتالىقتارىنىڭ ءبىرى. مۇنىڭ سىرتىندا, بيىل وڭىردە جىلىنا 70 مىڭ اۆتوكولىك شىعاراتىن «KIA» زاۋىتى, 220 مىڭنان استام اۆتوكومپونەنت وندىرەتىن جاڭا كاسىپورىن ىسكە قوسىلماق. ال لوگيستيكا دامىماي, مۇنداي ءىرى كاسىپورىنداردىڭ ومىرشەڭ بولۋى مۇمكىن ەمەس. دەمەك, «توبىل» كولىك-لوگيستيكالىق كەشەنى ايماقتا وندىرىلەتىن ونىمدەردىڭ تۇراقتى ەكسپورتىن قامتاماسىز ەتەتىن بىردەن-ءبىر ينفراقۇرىلىمدىق تىرەك بولماق.
قوستاناي وبلىسى
