مەملەكەت تاراپىنان تاعدىردىڭ تەپەرىشىنە تاپ بولعان جانداردىڭ تولىققاندى ەمدەلۋىنە, ساپالى ءبىلىم الۋىنا قولايلى جاعداي جاسالىپ وتىر. بيىل اتىراۋدا مۇگەدەكتىگى بار جاسوسپىرىمدەر عانا قىزمەت كورسەتەتىن ينكليۋزيۆتى كوفەحانا اشىلدى. وسىناۋ يگىلىكتى ءىستى قولعا العان «زەيىن-اتىراۋ» ەرەكشە بالالاردى دامىتۋ ورتالىعى جانىنان جۇمىسىن باستاعان العاشقى تاماقتانۋ ورنىنا «BelYes» دەگەن اتاۋ بەرىلدى.
اتالعان ورتالىق جەتەكشىسى ءانۋار بەگىسباەۆتىڭ ايتۋىنشا, كوفەحاناداعى داياشى قىزمەتىنە مۇمكىندىگى شەكتەۋلى جاسوسپىرىمدەردى تارتۋ كوزدەلگەن. باستاپقىدا ەكى ءجاسوسپىرىم جۇمىسقا الىندى. ولار كەلۋشىلەردەن تاپسىرىس الىپ, دايىندالعان كوفەنى, وزگە دە تاعام تۇرلەرىن ۇسىنادى. الداعى ۋاقىتتا مۇندا جۇمىس ىستەيتىن جاسوسپىرىمدەردىڭ قاتارى كوبەيەدى.
«ورتالىقتى اشقان ارايلىم نۇعىمانوۆا ەرەكشە بالالاردىڭ قوعامنان الشاقتاماۋىن, كۇيزەلىسكە تۇسپەۋىن ويلاپ ءجۇرۋشى ەدى. ول اقش-تاعى وسىنداي ورتالىقتاردىڭ جۇمىسىمەن تانىسىپ كەلگەننەن كەيىن مۇمكىندىگى شەكتەۋلى جاسوسپىرىمدەر جۇمىس ىستەيتىن ينكليۋزيۆتى كوفەحانا اشۋدى ارماندادى. بىراق تۇركياداعى جول اپاتىنان قازا تاۋىپ, كوكەيىندە جۇرگەن ءىسىن جۇزەگە اسىرا المادى. ءبىز زامانداسىمىزدىڭ باستاعان يگىلىكتى ءىسىن ودان ءارى جالعاستىرىپ, ارمانىن ىسكە اسىرۋدى ماقسات تۇتتىق», دەدى ءا.بەگىسباەۆ.
ونىڭ ايتۋىنشا, ارنايى جوبا اياسىندا 10 ءجاسوسپىرىم ارنايى وقىتۋ كۋرسىنان وتكەن. ولار تەك داياشى قىزمەتىن اتقارۋمەن شەكتەلمەيدى.
«كوفەحانانى اشۋداعى ماقساتىمىز – تەك تابىس تابۋ ەمەس, مۇمكىندىگى شەكتەلگەن جاسوسپىرىمدەردىڭ قاتارلاستارىنان تىس قالماي, كۇندەلىكتى تىرشىلىككە بەيىمدەلۋىنە اتسالىسۋ, ەڭ باستىسى ەڭبەككە باۋلۋ. ويتكەنى مۇگەدەكتىك ساناتى بەرىلگەن جاسوسپىرىمدەردىڭ اراسىندا تالانتتى, جۇمىس ىستەۋگە قابىلەتتى جاندار از ەمەس. ءبىز جاس ساناتىنا قاراماستان مۇگەدەك جانداردى قوعامنان الشاقتاتاتىن بولساق, مۇنداي كوزقاراس ولارعا مورالدىق ءارى پسيحولوگيالىق تۇرعىدان اۋىر سوققى بولادى. سوندىقتان وسىنداي جاندارعا, اسىرەسە جاسوسپىرىمدەرگە مۇسىركەۋ تۇرعىسىنان ەمەس, ادامدارمەن تولىققاندى قارىم-قاتىناس جاساۋىنا قولداۋ كورسەتۋدى, كەڭەس بەرۋدى كوزدەدىك. ينكليۋزيۆتى كوفەحانادا جۇمىس ىستەيتىن جاسوسپىرىمدەر تاجىريبە جيناقتايدى. ءوزىنىڭ الەۋەتىن اشىپ, قوعام ىسىنە ارالاسۋىنا مۇمكىندىك الادى», دەدى ءا.بەگىسباەۆ.
كوفەحانادا ەرەكشە جاسوسپىرىمدەر ءتۇرلى تاعامدار پىسىرۋگە اتسالىسادى. قازىردىڭ وزىندە ءدامى ءتىل ۇيىرەتىن تاتتىلەردى وزدەرى دايىنداۋعا بەيىمدەلە باستادى. سونداي-اق تاماقتانۋ ورنىندا كوفە مەن تاعام تۇرلەرى, اسىرەسە تاتتىلەر عانا ۇسىنىلمايدى. «زەيىن-اتىراۋ» ەرەكشە بالالاردى دامىتۋ ورتالىعىنىڭ قىزمەتكەرلەرى كوفەحاناعا كەلۋشىلەرگە مۇمكىندىگى شەكتەلگەن بالالاردىڭ وزدەرى جاساعان قولونەر بۇيىمدارىن ۇسىنۋدى قولعا الدى.
«قازىر بۇرىنعىداي ەمەس, شاي مەن ءتاتتى سۋسىنداردى ءىشۋدىڭ ورنىنا كوفەنىڭ ءدامىن تاتىپ كورۋگە سۇرانىس كوبەيدى. كوفەحانانى اشار كەزدە وسىنى ەسكەردىك. ەرەكشە قاجەتتىلىگى بار جاسوسپىرىمدەرگە جۇمىس ورنىن ۇسىنىپ قانا قويماي, ولاردىڭ قوعامعا كىرىگۋىنە ىقپال ەتتىك. بۇل – ماقساتىمىزدىڭ ىسكە اسا باستاعانىنىڭ كورىنىسى. كوفەحانا ءبىر مەزگىلدە 15 ادامنىڭ تاماقتانۋىنا ەسەپتەلگەن. بىراق كەي كۇندەرى كەلۋشىلەر قاتارى بۇدان دا كوپ بولادى. تۇرعىندار تاراپىنان مۇمكىندىگى شەكتەۋلى جاسوسپىرىمدەرمەن اڭگىمەلەسۋشىلەر, ولاردىڭ كورسەتكەن قىزمەتىنە العىسىن بىلدىرۋشىلەر از ەمەس. دەمەك كوفەحاناعا كەلۋشىلەر ەرەكشە جانداردىڭ قىزمەتىنە قولداۋ كورسەتۋدى شىن كوڭىلىمەن قالاپ تۇرادى. مۇنداي قادام مۇمكىندىگى شەكتەلگەن جاسوسپىرىمدەردى جىگەرلەندىرەدى. ولاردىڭ سەرۆيستىك قىزمەت كورسەتۋگە قۇلشىنىسىن, قىزىعۋشىلىعىن وياتادى», دەيدى ورتالىق جەتەكشىسى.
اتىراۋ وبلىسى
