وسكەمەن. 6 مامىر. وسكەمەندە ۇلى جەڭىستىڭ 70 جىلدىق مەرەيتويى قارساڭىندا بىرقاتار ارداگەرلەر باسپانالى بولدى. بۇل تۋرالى egemen.kz ءتىلشىسى حابارلادى.
ۇلى وتان سوعىسىندا ەتىگىمەن قان كەشىپ, قار جاستانعان يۆان پوپوۆ, يۆان فەدوروۆ, ماكار حارين, ميحايل تەرۋنوۆ ەسىمدى قارت مايدانگەرلەرگە پاتەر كىلتىن وسكەمەن قالاسىنىڭ اكىمى تەمىربەك قاسىمجانوۆ تاپسىردى. اتالعان پاتەرلەر شاھاردىڭ وركەندەپ كەلە جاتقان كوركەم اۋدانى سانالاتىن ەرتىس وزەنىنىڭ سول جاعالاۋىندا ورنالاسقان.
«ەلباسىمىز نۇرسۇلتان نازارباەۆ وتان ءۇشىن وت كەشكەن ارداگەرلەردى ەشقاشان ۇمىت قالدىرعان ەمەس. مەملەكەت باسشىسىنىڭ تىكەلەي تاپسىرماسىمەن ەلىمىزدە ارداگەرلەرگە زور قولداۋ كورسەتىلىپ كەلەدى. بۇگىنگى ۇرپاقتىڭ سىزدەرگە دەگەن العىسى شەكسىز», دەدى تەمىربەك قاسىمجانوۆ.
قالا باسشىسىنىڭ ايتۋىنشا, قازىرگى كەزدە وبلىس ورتالىعىندا باسپانا كەزەگىندە تۇرعان سوعىس ارداگەرلەرى جوق. سوڭعى جىلدارى بارلىق ارداگەرلەر باسپانامەن قامتاماسىز ەتىلدى.
95 جاسقا كەلگەن ميحايل تەرۋنوۆ شىعىس قازاقستان وبلىسىنىڭ سامار اۋىلىندا دۇنيەگە كەلگەن ەكەن. ول 1939 جىلى اسكەر قاتارىنا شاقىرىلادى. ماسكەۋدە, ودان كەيىن لەنينگراد وبلىسىنىڭ ۆىبورگ قالاسىندا اسكەري بورىشىن وتەپ جۇرگەنىندە سوعىس باستالىپ, مايدانعا كىرگەن جاس جاۋىنگەر گەرمانياعا دەيىن جەتىپ, جەڭىستى ەلبا قالاسىندا قارسى الادى. اسكەري قىزمەتتەن 1947 جىلى بوسايدى. ۇزاق جىلدار سامار اۋىلىندا تۇرعان مايدانگەر وسىدان ءۇش جىل بۇرىن وسكەمەن قالاسىنا كوشىپ كەلىپتى. قارت مايدانگەر سۇراپىل جىلداردا باستان وتكەرگەن قيىندىقتى ەسكە الا وتىرىپ, ارداگەرلەرگە زور قولداۋ كورسەتىپ وتىرعان مەملەكەت باسشىسىنا ايرىقشا العىسىن جەتكىزدى.
دۋمان اناش.
دەرەك, سۋرەت: egemen.kz
