الماتىدا ەكولوگ مەلس ەلەۋسىزوۆتىڭ ءۇيى ورتەنىپ كەتتى

استانا. 7 مامىر. الماتىدا «تابيعات» ەكولوگيالىق وداعىنىڭ توراعاسى مەلس ەلەۋسىزوۆتىڭ ءۇيى ورتەنىپ كەتتى. وتقا ورانعان ءۇي اتالعان وداقتىڭ كەڭسەسى رەتىندە دە پايدالانىلىپ كەلگەن. بۇل تۋرالى كتك تەلەارناسى حابارلادى. قازىرگى تاڭدا كەڭسەلەرىنىڭ ك ۇلى كوككە ۇشقان ەكولوگيالىق وداقتىڭ قىزمەتكەرلەرى جۇمىسسىز قالدى. ءورتتىڭ شىعۋ سەبەپتەرى تۋرالى بىرنەشە نۇسقا ايتىلۋدا. ازىرگە ناقتى سەبەبى بەلگىسىز. كوپشىلىكتىڭ پايىمداۋىنشا, ءتىلسىز جاۋ ەلەكتر سىمدارىنىڭ تۇيىقتالۋىنان پايدا بولۋى مۇمكىن. «ءبىز بالقاش كولىندە ۇيىمداستىرىلعان جەلكەندى قايىقتار جارىسىنان تۇندەلەتىپ ورالدىق. كەلسەك, كەڭسەمىز ورتەنىپ جاتىر. بۇل جەردە بازامىزدىڭ ديرەكتورى تۇراتىن. الايدا, ول بۇل كەزدە ۇيدە بولماعان. اۋرۋحانادا جاتىر», – دەيدى مەلس ەلەۋسىزوۆ. ءورت كەزىندە ۇيدە بازا ديرەكتورىنىڭ ايەلى مەن بالالارى بولعان. ءتۇن ورتاسىندا كەلىنشەك ءتۇتىننىڭ ءيىسى مەن ساتىرلاعان داۋىستان ويانىپ كەتىپ, اجال اۋزىنان امان قالعان. ايەل بالالارىن دالاعا شىعارىپ, قۇجاتتارىن عانا الىپ ۇلگەرگەن ەكەن. قازىرگى تاڭدا زارداپ شەگۋشىلەر ۋاقىتشا تۋعان-تۋىستارىن پانالاۋدا. كومەككە «تابيعات» وداعىنىڭ مۇشەلەرى كەلىپ, كيىم-كەشەك پەن اقشالاي قولداۋ كورسەتتى. ءورت سالدارىنان شاتىرى ورتاسىنا تۇسكەن ۇيدەن قاڭقاسى مەن ىرگەتاسى عانا قالعان. ءۇيدىڭ 70 جىل بۇرىن سالىنعان. بۇل جونىندە ەلەۋسىزوۆ مىرزا: «وتە ەسكى قۇرىلىس. كەڭەس زامانىندا سالىنعان. قاڭقاسى قامىستان جاسالعان. سول سەبەپتى دە لاۋلاپ, تەز ورتەنىپ كەتتى», – دەيدى. كەيبىرەۋلەر ءۇيدىڭ ادەيى ورتەلۋى مۇمكىن ەكەنىن دە جوققا شىعارعان جوق. وعان مەلس ەلەۋسىزوۆتىڭ سوڭعى كەزدەردەگى بەلسەندىلىگى سەبەپ بولۋى مۇمكىن. بۇل رەتتە ەكولوگقا قارسى جاسالعان وتكەن جىلعى قاستاڭدىق ارەكەتى نازارعا الىندى. ايتا كەتەيىك, 2014 جىلى بۇزاقىلار ەلەۋسىزوۆتىڭ الماتىداعى قوقىستاردى سورتتايتىن كەشەنىن قيراتىپ كەتكەن بولاتىن. ەلامان قوڭىر. دەرەك سۋرەت: كتك تەلەارناسى.