سۋرەت: ortcom.kz
ۇلتتىق عىلىم اكادەمياسىنىڭ اكادەميگى, گەولوگيا-مينەرالوگيا عىلىمدارىنىڭ دوكتورى ءمالىس ابسامەتوۆتىڭ جەتەكشىلىگىمەن دايىندالعان اۆتورلار ۇجىمىنىڭ «قازاقستان رەسپۋبليكاسىنىڭ گيدروگەولوگيالىق كارتالار اتلاسى» اتتى اۋقىمدى ەڭبەگى – ەلىمىزدىڭ جەراستى سۋلارىن زەرتتەۋگە ارنالعان بىرەگەي عىلىمي جۇمىس. بيىل وسى كەشەندى زەرتتەۋ ءال-فارابي اتىنداعى مەملەكەتتىك سىيلىققا ۇسىنىلىپ وتىر. بۇل – تەك عىلىمي جاڭالىق ەمەس, ۇلتتىق قاۋىپسىزدىك پەن الەۋمەتتىك-ەكونوميكالىق دامۋعا تىكەلەي ۇلەس قوساتىن جوبا.
زەرتتەۋ ناتيجەسىندە عالىمدار دالامىزدىڭ جەراستى گيدروسفەراسىن تۇتاس قامتيتىن تۇڭعىش گيدروگەولوگيالىق كارتالار اتلاسىن جاساپ شىعاردى. بۇل – 28 مامانداندىرىلعان كارتا, 12 سحەما, 47 گيدروگەولوگيالىق قيما مەن 33 جيىنتىق باعانا سەكىلدى ماڭىزدى اقپاراتتى ءبىر جۇيەگە بىرىكتىرگەن, بۇرىن-سوڭدى بولماعان عىلىمي جەتىستىك. باسقاشا ايتقاندا, ەلىمىزدىڭ جەر قويناۋىنداعى سۋ قورىنىڭ تولىق كارتاسى العاش رەت كەشەندى تۇردە ۇسىنىلىپ وتىر.
كارتالار اتلاسى قازىرگى زامانعى تسيفرلىق تەحنولوگيالار ارقىلى جاسالىپ, ەلىمىزدىڭ ءار وڭىرىندەگى جەراستى سۋلارىنىڭ ناقتى جاي-كۇيىن كورسەتەدى. بۇل دەرەكتەر ەلدەگى سۋ قاۋىپسىزدىگىن قامتاماسىز ەتۋگە, اۋىل شارۋاشىلىعىن دامىتۋعا, ءوندىرىس ورىندارىن سۋمەن قامتۋعا, سونداي-اق ەكولوگيالىق تۇراقتىلىقتى ساقتاۋعا ۇلكەن سەپتىگىن تيگىزەدى. قازىردىڭ وزىندە اتلاس سۋ تاپشىلىعىنا بايلانىستى تۋىندايتىن قاۋىپ-قاتەرلەردى ازايتۋعا ارنالعان ناقتى شەشىمدەردىڭ نەگىزىنە اينالىپ وتىر.
جۇمىس بارىسىندا اۆتورلار قازىرگى گيدروگەولوگيا عىلىمىنىڭ ەڭ زاماناۋي ادىستەرىن قولدانىپ, جەراستى سۋلارىنىڭ سارقىلۋى مەن لاستانۋىنا قارسى قورعانىس شارالارىن دا ۇسىندى. ماسەلەن, جەراستى سۋلارى مەن تەحنوگەندىك فاكتورلاردىڭ بايلانىسىن زەرتتەۋ, وڭىرلەردى گەوەكولوگيالىق جانە گيدروگەولوگيالىق تۇرعىدا اۋدانداستىرۋ سىندى ناقتى مىندەتتەر كەشەندى تۇردە شەشىمىن تاپقان.
عىلىمي جاڭالىق قانا ەمەس, قولدانبالى تاجىريبە تۇرعىسىنان دا قۇندى بۇل ەڭبەك ەلىمىزدىڭ سۋ رەسۋرستارىن باسقارۋ ىسىندە جاڭا پاراق اشتى. ونىڭ اۆتورلارى – م.ابسامەتوۆ, ر.ايازباەۆ, ە.كولدەەۆ, ە.مۋرتازين, ۆ.سموليار سىندى عالىمدار وتاندىق عىلىمنىڭ دامۋىنا قوسقان ۇلەسى ءۇشىن مەملەكەتتىك سىيلىق الۋعا ابدەن لايىقتى.
باقىتجان جۇماعۇلوۆ,
ۇلتتىق ينجەنەرلىك اكادەميانىڭ پرەزيدەنتى, مەملەكەتتىك سىيلىقتىڭ لاۋرەاتى, اكادەميك
