فوتو: gov.kz
ارحەولوگيالىق قازبا اتىراۋ قالاسى ماڭىنداعى «اقتوبە-لاەتي» قالاشىعىنا جۇرگىزىلگەن.
كونە تيىن جوشى ۇلىسىندا قۇرىلعان التىن وردا مەملەكەتىنىڭ بيلەۋشىسى مەڭگۋ-تەمىر حان تۇسىندا قۇيىلعان اقشالار توبىنا جاتادى.
«بۇل تيىندار بەلگىلى نۋميزماتيك عالىم پاۆەل نيكولاەۆيچ پەتروۆتىڭ پايىمداۋىنشا ءحىىى عاسىردىڭ ەكىنشى جارتىسىنا سايكەس كەلەدى. قۇيما اقشانىڭ ءبىر بەتىندە مەڭگۋ-تەمىر حاننىڭ تاڭبالارى, ەكىنشى جاعىندا قىتاي يەروگليفتەرى بەينەلەنگەن. ونىڭ سەبەبى شىڭعىسحاننان تاراعان قۇبىلاي ۇرپاقتارى مەن شاعاتاي ۇلىسى اراسىندا قاقتىعىستاردا قولعا تۇسكەن ساياسي تۇتقىن نومۋحانمەن بايلانىستىرادى», دەيدى ارحەولوگ امانگەلدى مۇعاۋ ۇلى.
سونىمەن قاتار ارحەولوگ قازبادان تاعى كورنەكتى ارتەفاكت «تاعارا» ىدىسى دا ءبۇتىن كۇيىندە تابىلعانىن ايتتى.
بيىل تاريحي قالاشىقتى قازۋعا اتىراۋ وبلىستىق تاريحي-مادەني مۇرالاردى زەرتتەۋ ورتالىعى تاپسىرىس بەرگەن. «سوڭعى ەكى-ءۇش جىلدىقتا بۇل جەرگە ەرەكشە كوڭىل ءبولىپ جاتىرمىز. قالاشىقتىڭ 53 گەكتار اۋماعى تولىقتاي قورشالدى. بولاشاقتا اشىق اسپان استىنداعى مۋزەيگە اينالدىرۋدى جوسپارلاپ وتىرمىز», دەيدى وبلىستىق تاريحي-مادەني مۇرالاردى زەرتتەۋ ورتالىعىنىڭ باسشىسى تولىباي دوستىباەۆ.
ارحەولوگيالىق زەرتتەۋگە اتىراۋ ۋنيۆەرسيتەتىنىڭ تاريحشى ماماندىعىندا وقيتىن ستۋدەنتتەر دە قاتىسقان. بۇگىندە كونە قالاشىقتىڭ 500 شارشى مەتر اۋماعىنان ارشىپ العان ارتەفاكتىلەر وقۋ ورداسىنىڭ زەرتحاناسىندا ارى قاراي زەرتتەلەدى.
ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ ارحەولوگتارى ورتا عاسىرلىق سيرەك كەزدەسەتىن كونە كۇمىس تيىنداردى تاپتى. بۇل تۋرالى عىلىم جانە جوعارى ءبىلىم مينيسترلىگى حابارلادى.
