فوتو: yandex.kz
ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اسقاربەك ەرتاەۆتىڭ ايتۋىنشا مەملەكەتتىك قولداۋلاردى تسيفرلاندىرۋداعى باستى ماقسات – كومەكتىڭ ناقتى مۇقتاج وتباسىلارعا بەرىلۋىن قاداعالاۋ.
«مۇندا 6 كلاستەر بەلگىلەنگەن. ماسەلەن, توتەنشە قاجەتتىلىك, ءجاي قاجەتتىلىك, سالىستىرمالى تۇراقتىلىق دەپ كەتە بەرەدى. ەڭ سوڭعى 6-كلاستەر مۇنداي كومەككە مۇقتاج ەمەس وتباسىلار ساناتىن بىلدىرەدى, ياعني, جوعارى ءال-اۋقاتتى دەپ ايقىندالادى دا, ولار مەملەكەتتىك قولداۋدى المايدى. سوندىقتان مۇنداعى وزگەرىستەر تەك مەملەكەتتىك قوسىمشا قولداۋعا قاتىستى جاسالىپ جاتىر», دەپ جاۋاپ بەردى ول.
ونى پرەمەر-ءمينيستردىڭ ورىنباسارى ەرمەك كوشەرباەۆ تولىقتىردى. ول مۇنداعى ماقسات – ەڭ ءبىرىنشى الەۋمەتتىك ادىلدىكتى ورناتۋ, ەكىنشى الەۋمەتتىك الاياقتىقتى توقتاتۋ ەكەنىن اتاپ ءوتتى.
ء«وزىڭىز بىلەسىز, بىزدە مەملەكەتتىك ورگاندار بار, ورتالىق نەمەسە جەرگىلىكتى ورگاندار بولسىن تسيفرلاندىرۋ اياعىنا دەيىن جەتكىزىلمەگەن. كىمنىڭ نە ىستەپ جاتقانىن بازاسى ارقىلى تەكسەرە المايمىز. كوپ نارسەنى قاعازبەن الىپ كەلەدى. ونى جوبا بويىنشا تەكسەرگەندە بىرقاتار ماسەلەلەر انىقتالىپ جاتادى. مىسالى, ءبىر وتباسى جاعدايى قيىن دەپ سانالىپ, جەرگىلىكتى بيۋدجەتتەن, ورتالىق بيۋدجەتتەن جانە ساقتاندىرۋ قورىنان دا اقشا الىپ وتىرعان. ال ونى قالاي ىستەگەن؟ اۋەلدە ونى بىرەۋ ء«ۇيى جوق, ماشيناسى جوق, كوپ بالالى وتباسى» دەپ جازىپ بەرگەن. ونى اپارىپ حقكو ارقىلى تىركەگەن. ال تسيفرلاندىرۋ ءجۇرىپ بىرتە-بىرتە دەرەكتەر بازاسى ءبىر بىرىنە قوسىلعاندا ولاردىڭ ەكى قاباتتى ءۇيى بار, ەكى ماشيناسى بار ەكەنى انىقتالعان. كوپتەگەن تۇرمىستىق تەحنيكا العان نەسيەلەرى بولعان. مىنە, مۇنداعى ماقسات وسىنداي جاعدايلارعا جول بەرمەۋ, تسيفرلاندىرۋ جانە سول اقىلى وڭتايلاندىرا وتىرىپ, الاياقتىققا بول بەرمەۋ», دەدى ۆيتسە-پرەمەر.
