فوتو: اشىق دەرەككوز
ۆيتسە-پرەمەردىڭ ايتۋىنشا, الەۋمەتتىك ساياسات – بۇل تەك مەملەكەتتىك شىعىنداردى ارتتىرۋ عانا ەمەس, سونىمەن قاتار حالىقتىڭ دەنساۋلىعىنا, جاستاردىڭ ءبىلىم الۋىنا جانە قوعامنىڭ تۇراقتىلىعىن قامتاماسىز ەتۋگە باعىتتالعان ۇزاق مەرزىمدى ينۆەستيتسيا.
«مەملەكەت باسشىسى ۇكىمەت الدىنا ءومىر ساپاسىن جاقسارتۋ, حالىقتىڭ ءالجۋاز توپتارىن قورعاۋ جانە الەۋمەتتىك ينفراقۇرىلىمدى قالىپتاستىرۋ جونىندە تاپسىرمالار بەرگەن بولاتىن. بۇل باعىتتا كەشەندى جۇمىس اتقارىلۋدا. بۇگىنگى تاڭدا مەملەكەت ءوزىنىڭ الەۋمەتتىك مىندەتتەمەلەرىن تولىق ورىنداۋدا. بيۋدجەتتىڭ جارتىسىنان كوبى وسى سالاعا جۇمسالادى», دەدى ەرمەك كوشەرباەۆ.
كوشەرباەۆ اتاپ وتكەندەي, 2024 جىلدىڭ باسىنان بەرى 1,2 ميلليون بالالى وتباسىعا بەرىلەتىن جاردەماقى 6,5%-كە وسكەن, بۇل ماقساتقا 870 ميلليارد تەڭگە بولىنگەن. بۇل وتكەن جىلمەن سالىستىرعاندا 17%-كە كوپ.
سونىمەن بىرگە, اتاۋلى الەۋمەتتىك كومەك 245 مىڭ ادامعا تاعايىندالعان, ولارعا جالپى سوماسى 16,2 ملرد تەڭگە تولەنىپ وتىر. كوشەرباەۆتىڭ ايتۋىنشا, پرەزيدەنت مۇمكىندىگى شەكتەۋلى ازاماتتار مەن زەينەتكەرلەردى قولداۋ ماسەلەسىنە ەرەكشە كوڭىل ءبولۋدى تاپسىرعان.
«بيىلعى جىلدىڭ باسىنان بەرى زەينەتاقى تولەمدەرى 8,5%-كە ارتتى. قازىرگى تاڭدا زەينەتاقىنىڭ ورتاشا كولەمى 180 مىڭ تەڭگەنى قۇرايدى. بۇل باعىتتا 4 تريلليون تەڭگە كولەمىندە قاراجات ءبولىنىپ جاتىر», دەدى ول.
جالاقىعا قاتىستى دا جاعىمدى وزگەرىستەر بار. ۆيتسە-پرەمەردىڭ ايتۋىنشا, ەلدەگى ورتاشا جالاقى مولشەرى 423 مىڭ تەڭگەگە جەتكەن. ەڭ تومەنگى جالاقىنىڭ ءوسۋى شامامەن 600 مىڭ ازاماتتىق قىزمەتكەردىڭ تابىسىنىڭ ارتۋىنا سەبەپ بولدى.
«جارتى جىلدىڭ قورىتىندىسى بويىنشا 250 مىڭ ازامات جۇمىسپەن قامتىلدى. بۇل پروتسەستەر تسيفرلىق پلاتفورمالار ارقىلى جۇزەگە اسىرىلىپ جاتىر. نەگىزگى ماقسات – كومەككە شىن مۇقتاج وتباسىلارعا ناقتى قولداۋ كورسەتۋ. بۇل – پرەزيدەنت تاپسىرماسىنىڭ ءبىر باعىتى», دەدى ەرمەك كوشەرباەۆ.
