دۇنيەجۇزىلىك دەڭگەيدەگى ءدۇلدۇل 2023 جىلى «قازاقستاننىڭ حالىق ءارتىسى» اتانعان. داڭقى جەر-جاھانعا جەتكەن ديماش اتاققا كەندە ەمەس قوي, سويتسە دە الاتاۋدىڭ بەرگى جاعىندا تۋعان ۇلدىڭ داڭقى ارعى بەتىندە دە رەسمي بەكىتىلىپ جاتقانى ءسۇيىنىش, ارينە. بۇل باۋىرلاس ەكى ەل اراسىنداعى جاراستىقتى بىلدىرگەندەي. قىرعىز رەسپۋبليكاسىنىڭ پرەزيدەنتى سادىر جاپاروۆتىڭ جارلىعىنا سايكەس ماراپاتتى ديماشقا سول ەلدىڭ مەملەكەتتىك حاتشىسى مارات يمانقۇلوۆ تابىستادى.
«مەيكين ازيا» حالىقارالىق مۋزىكا فەستيۆالى 20–22 شىلدەدە ىستىقكولدە وتكەن. وعان ازيا مەن ەۋروپانىڭ جيىرمادان استام ەلىنەن ونەرپازدار قاتىسسا كەرەك. 2013 جىلدان بەرى ۇيىمداستىرىلىپ جۇرگەن فەستيۆالدىڭ تۇڭعىش باس بايگەسىن ديماش قۇدايبەرگەننىڭ ءوزى قانجىعاسىنا بوكتەرىپتى. وسى جولى فەستيۆالدىڭ جابىلۋ سالتاناتىندا ونەر كورسەتكەن ءانشى الگىندەي ماراپاتتان سوڭ: «بۇل ماراپات بولاشاقتا ەكى ەل اراسىندا مىزعىماس بىرلىك ءۇشىن جاسالاتىن قىزمەتكە اۆانس رەتىندە بەرىلدى دەپ قابىلدايمىن. قازاق پەن قىرعىز حالقى دوستىعىنىڭ سيمۆولى دەپ بىلەمىن. قازاق حالقىنا كورسەتىلگەن قۇرمەت دەپ تۇسىنەمىن», دەپتى.
ديماشتىڭ اكەسى قانات ايتباەۆ جەكە پاراقشاسىنا: «قىرعىزستاننىڭ شولپان-اتا قالاسىندا وتكەن حالىقارالىق ەسترادالىق انشىلەر فەستيۆالىندە قىرعىزستان پرەزيدەنتى سادىر جاپاروۆتىڭ جارلىعىمەن قازاقستاننىڭ حالىق ءارتىسى ديماش قۇدايبەرگەنگە ەكى ەل اراسىنداعى دوستىق قۇرمەتىنە قىرعىزستاننىڭ حالىق ءارتىسى اتاعى بەرىلدى», دەپ جازدى.
داڭقتى ءانشىمىزدىڭ تۇركى دۇنيەسىندەگى ابىرويى جاقسىلىققا, بىرلىككە جولباسشى بولعاي!
