وسكەمەن. 6 مامىر. قازاقستان رەسپۋبليكاسى پرەزيدەنتى نۇرسۇلتان نازارباەۆتىڭ قاۋلىسىنا سايكەس, مەملەكەتكە سىڭىرگەن ەڭبەگى, بەلسەندى قوعامدىق قىزمەتى ءۇشىن جانە 1941-1945 جىلدارداعى ۇلى وتان سوعىسىنداعى جەڭىستىڭ 70 جىلدىق مەرەيتويىنا وراي شىعىسقازاقستاندىق ارداگەرلەر مەملەكەتتىك ناگرادالارمەن ماراپاتتالدى. بۇل تۋرالى egemen.kz ءتىلشىسى حابارلادى.
شىعىس قازاقستان وبلىسىنىڭ اكىمى دانيال احمەتوۆ ۇلى وتان سوعىسىنىڭ ارداگەرلەرى مەن ولارعا تەڭەستىرىلگەن تۇلعالارعا جانە مايداندا مەرت بولعانداردىڭ رۋحىن جاڭعىرتۋ جۇمىستارىنا ۇلەس قوسقان ارداگەرلىك ۇيىمداردىڭ مۇشەلەرىنە سالتاناتتى تۇردە مەملەكەتتىك ناگرادالاردى تاپسىردى.
اتاپ ايتقاندا, گەورگي گۋدكوۆ, كونستانتين گۋسلەۆ, ساليح سابيليانوۆ, گريگوري سەۆەرۋشەنكوۆ, توكتاعازى تلەۋباەۆ, اناتولي كوروتكوۆ «قۇرمەت» وردەنىمەن ماراپاتتالدى. وردەنگە يە بولعانداردىڭ بەسەۋى لەنينگرادتى, بەلورۋسسيانى, كۋرسك دوعاسىن جانە جاپونيانى ازات ەتۋگە قاتىسقان سوعىس ارداگەرلەرى بولسا, اناتولي كوروتكوۆ لەنينوگورسك كومبيناتىندا 38 جىل ەڭبەك ەتكەن تىل ارداگەرى. سونداي-اق, جاپونيانى ازات ەتۋ ۇرىستارىنا قاتىسقان سوعىس ارداگەرى ەلەۋسىز قينباەۆ جانە تىل ارداگەرلەرى كلاۆديا گاۆريلكو مەن ماريا كولماكوۆا «ەرەن ەڭبەگى ءۇشىن» مەدالدارىمەن ماراپاتتالسا, قازاقستان رەسپۋبليكاسىنىڭ قۇرمەت گراموتاسى تىل ارداگەرلەرى مايرا باعداتوۆا مەن توكەن بۇلقانوۆقا جانە مەملەكەتتىك قىزمەتكە شيرەك عاسىر عۇمىرىن ارناعان تولەۋحان ابىلقاسىموۆقا تابىستالدى.
«ارداگەرلەر – ەلىمىزدىڭ ماقتانىشى. بۇگىنگى بەيبىت زامان سىزدەردىڭ ارقالارىڭىزدا ورنادى. ەرلىكتەرىڭىز بەن ەل ءۇشىن ەتكەن ەڭبەكتەرىڭىز – بولاشاققا قادام باسقان جاس ۇرپاققا شامشىراق ىسپەتتى قىزمەت ەتەرى ءسوزسىز. بارشاڭىزعا زور دەنساۋلىق تىلەيمىن», دەدى د.احمەتوۆ.
ۇلى وتان سوعىسى جىلدارى شىعىس قازاقستاننان مايدان دالاسىنا 170 مىڭ ادام اتتانىپ, ونىڭ 96 مىڭى ورالماعان ەكەن. 109 جاۋىنگەر مەن وفيتسەر كەڭەس وداعىنىڭ باتىرى اتاعىنا يە بولسا, 22 شىعىسقازاقستاندىق ەڭ جوعارعى سارباز ناگراداسى – «قۇرمەت» وردەنىنىڭ تولىق كاۆالەرى اتاعىنا يە بولعان. سونداي-اق, وبلىستىڭ 9 مىڭ تىل ارداگەرى « ۇلى وتان سوعىسىنداعى ەرەن ەڭبەگى ءۇشىن» مەدالىمەن ماراپاتتالعان. بۇگىندە وبلىستا 579 ۇلى وتان سوعىسىنىڭ ارداگەرى مەن 27 468 تىل ارداگەرى بار. شىعىسقازاقستاندىق ارداگەرلەرگە بارلىق بيۋدجەت كوزدەرىنەن 500 مىڭ تەڭگە كولەمىندە ءبىر مەزەتتىك اقشالاي تولەم تابىس ەتىلدى. سونىمەن قاتار, وبلىستىق بيۋدجەت ەسەبىنەن شيپاجايلار مەن دەمالىس ورىندارىنا تەگىن جولداما بەرىلەدى.
دۋمان اناش.
دەرەك: egemen.kz
Cۋرەت: شىعىس قازاقستان وبلىستىق اقپاراتتىق ورتالىعى.
