فوتو: Shutterstock.com
وندىرىستىك ايماقتاردا جاراقات الۋدىڭ ەڭ جوعارى دەڭگەي قاراعاندى وبلىسىندا تىركەلگەن. بۇل وبلىستا جارتىجىلدىقتا 61 ادام جۇمىستا جاراقات العان. شقو-دا – 50 ادام, پاۆلودار وبلىسىندا – 44 ادام, اتىراۋ وبلىسىندا – 40 ادام, اقتوبە وبلىسىندا – 39 ادام زارداپ شەككەن. سونداي-اق, الماتى قالاسىندا 51 ادام زارداپ شەككەن.
ەكونوميكانىڭ سالالارى بويىنشا ەڭ كوپ زارداپ شەككەندەر تاۋ-كەن مەتاللۋرگيا كەشەنىنىڭ ونەركاسىپتەرىندە – 18,1 % جانە قۇرىلىس سالاسىندا – 9,2% انىقتالىپ وتىر.
جازاتايىم وقيعاعا كىم جازىقتى؟
مينيسترلىك قايعىلى وقيعاعا سوقتىراتىن باستى سەبەپتى وندىرىستەگى جۇمىستىڭ ءتيىستى دەڭگەيدە ۇيىمداستىرىلماۋى (34,6%) دەپ اتادى. سونداي-اق, جابىرلەنۋشى ءوزىنىڭ ورەسكەل ابايسىزدىعىنان بولعان وقيعالار كورسەتكىشى - 32,9%, جول قوزعالىسى ەرەجەلەرىن بۇزۋ - 8,6%, ەڭبەك قاۋىپسىزدىگى جانە ەڭبەكتى قورعاۋ ەرەجەلەرىن بۇزۋ - 7,1 پايىزعا جەتكەن.
ەڭبەكتى قورعاۋ فاكتىلەرىنىڭ بۇزىلۋشىلىقتارى بويىنشا قۇقىق قورعاۋ ورگاندارىنا جازاتايىم وقيعالاردى تەرگەۋدىڭ 439 ماتەريالى جىبەرىلگەن. سونىڭ نەگىزىندە 139 قىلمىستىق ءىس قوزعالعان.
جاراقات الماۋدىڭ جولى قايسى؟
ۇكىمەت پەن جاۋاپتى ۆەدوموستۆو وندىرىستەگى جازاتايىم وقيعالاردىڭ الدىن الۋ جولىندا كەشەندى جۇمىستاردى قولعا العان.
پروفيلاكتيكا مەن بۇزۋشىلىقتىڭ الدىن الۋ ماقساتىندا ەلىمىزدىڭ 3262 كاسىپورنى قاۋىپسىزدىك پەن ەڭبەكتى قورعاۋ ستاندارتتارىن ەنگىزگەن.
2019 جىلدان باستاپ مينيسترلىك تاراپىنان «نولدىك جاراقات - Vision Zero» تۇجىرىمداماسىن جەتىلدىرۋ بويىنشا بەلسەندى جۇمىس اتقارىلىپ جاتىر. وعان بۇگىندە 605 كاسىپورىن قوسىلعان.
قۇرىلىس وبەكتىلەرىندە باس مەردىگەردىڭ وبەكتىدەگى ەڭبەك قاۋىپسىزدىگى ماسەلەلەرى بويىنشا بارلىق قوسالقى مەردىگەرلەرگە جاۋاپكەرشىلىگى, قاداعالاۋىن كوزدەيتىن باقىلاۋدىڭ تىكەلەي مودەلىن ەنگىزۋ بويىنشا جۇمىس جالعاسىپ جاتىر. بۇل باقىلاۋ مودەلىن رەسپۋبليكانىڭ 318 كاسىپورنى ەنگىزگەن.
سونىمەن قاتار, «ونلاين ەڭبەك كونسۋلتانتى» ەلەكتروندى سەرۆيسى ىسكە قوسىلعان. ول جۇمىسكەر مەن جۇمىس بەرۋشىنىڭ اراسىندا قاشىقتىقتان ءوزارا ارەكەتتەسۋدى قامتاماسىز ەتۋ ءۇشىن ەڭبەك زاڭناماسى ساقتالۋىنىڭ تيىمدىلىگىن ارتتىرۋعا مۇمكىندىك بەرەدى. سەرۆيس جۇمىس بەرۋشىنىڭ ەڭبەكتى قورعاۋ تالاپتارىنىڭ ساقتالۋىن وزىندىك تەكسەرۋدەن ءوتۋىن قاراستىرادى. سەرۆيس ىسكە قوسىلعالى بەرى 42 977 جۇمىس بەرۋشى ونى پايدالانعان.
