اباي كوشەسىنىڭ بويىنداعى جاڭادان سالىنعان كوپقاباتتى تۇرعىن ۇيدە 13 ءبىر بولمەلى, 13 ەكى بولمەلى جانە ءۇش بولمەلى التى پاتەر بار. مەردىگەر «سامعا» جشس ءۇيدى ءوز قاراجاتىنا سالدى. اكىمدىك قۇرىلىس ءبولىمى ارقىلى ساتىپ الىپ, الدىمەن كەزەكتە تۇرعان الەۋمەتتىك وسال توپ, كوپبالالى انا جانە جەتىم ساناتىنا ەنەتىن تۇرعىندارعا بەردى.
باسپاناعا جىلۋ ورتالىقتان كەلەدى. جارىق بار. ىستىق سۋ تيتانمەن قامتاماسىز ەتىلەدى. كارىز جۇيەسى ىسكە قوسىلعان. ازىرگە 12 وتباسى جاڭا قونىسقا كوشتى. بۇعان دەيىن اۋدان باسىنداعى تايجان كوشەسىندە ەكى قاباتتى ءتورت ءۇي قولدانىسقا بەرىلگەن. جامبىل اتىنداعى كوشەدە سالىنعان ءۇي دە الەۋمەتتىك وسال توپقا ارناپ ساتىپ الىندى.
اۋداندىق تۇرعىن ءۇي-كوممۋنالدىق شارۋاشىلىعى جولاۋشىلار كولىگى اۆتوموبيل جولدارى جانە تۇرعىن ءۇي ينسپەكتسياسى ءبولىمىنىڭ باسشىسى سابدەن بورانباي ۇلىنىڭ سوزىنشە, 2021 جىلى – 24 پاتەر, 2022 جىلى – 48 پاتەر, بيىل 32 پاتەر بەرىلدى. كوپقاباتتى تۇرعىن ءۇيدىڭ ءبىرىنشى قاباتىنداعى 10 پاتەردى سالا قىزمەتكەرلەرىنە بەرىلەتىن «قىزمەتتىك جاتاقحانا» رەتىندە مەردىگەردەن ساتىپ الۋ جوسپاردا بار.
«باسپاناسى اپاتتى جاعدايدا دەپ شەشىم شىققان 11 تۇرعىنعا اۋداندا بوساپ قالعان ۇيلەردەن بەرەمىز. سالىنعان جاڭا پاتەردەن بەرە المايمىز. بۇل ءۇي زاڭمەن بەكىتىلگەن الەۋمەتتىك وسال توپتارعا ارنالعان. تاياۋدا كوميسسيا وتىرىسى بولدى, 11 ادامنىڭ ۇشەۋىنە بوساعان ءۇيدى جالعا ۇسىنىپ وتىر. جالعا بەرىلگەن ۇيلەردى كەلەشەكتە جەكەشەلەندىرە الادى. بىزدە اپاتتى جاعدايدا تۇرعان ەسكى جەر ۇيلەر. بۇدان باسقا بيىل وبليگاتسيالىق قارىزدار ەسەبىنەن ۇلىتاۋ اۋدانىندا 164 ملن تەڭگەگە 10 پاتەر ساتىپ الۋ جوسپارلانعان», دەيدى.
اۋدان ورتالىعىندا سالىنىپ جاتقان كوممەرتسيالىق 2 پاتەرلى 5 تۇرعىن ءۇيدىڭ قۇرىلىسى قارقىندى ءجۇرىپ جاتىر. ەكى ءۇيدىڭ قابىرعاسى كوتەرىلىپ, توبەسى جابىلىپ, شاتىرى ورناتىلعان. ال ءۇشىنشى ءۇيدىڭ قابىرعاسىن كوتەرۋ جالعاسىپ جاتىر.
«قاراعاندىداعى «تۇرعىن ءۇي قورى» كومپانياسىنىڭ قۇرىلىسشىلارى جۇمىس ىستەپ جاتىر. ازىرگە 12 قۇرىلىسشى بار. ودان كەيىن ىشكى جۇمىسى باستالعاندا وزگە مامانداردى تارتامىز. قۇرىلىسقا قاجەتتى ماتەريالدار قولجەتىمدى, ءبارى دە وتاندىق ءونىم. گازبلوك تاستار – تەمىرتاۋدان, تسەمەنت – جەزقازعاننان, شيكى ماتەريالدار ءوزىمىزدىڭ وڭىردەن اكەلىنەدى. جىل سوڭىنا دەيىن قولدانىسقا بەرۋدى جوسپارلاپ وتىرمىز», دەيدى قۇرىلىس ۋچاسكەسىنىڭ باسشىسى ءالتايىر رىسقۇل.
مەردىگەر وسى اۋىلدىڭ تەحنيكالارىن جالعا الىپ وتىر. ءبىر جاعىنان جاستارعا دا جۇمىس تابىلدى. ءبىر تەحنيكانى جالعا الۋ قۇنى – ايىنا 600–700 مىڭ تەڭگە شاماسىندا. ءبىر ءۇيدىڭ قۇنى 25 ملن 200 مىڭ تەڭگەنى قۇرايدى. بۇل – قالاداعىداي ىشىندە سانۋزەل بار ءۇش بولمەلى ءۇيدىڭ باعاسى. سىرتىن قورشاپ, بۇكىل جاعدايىن جاساعان سوڭ كىلتىن بەرەدى.
وسى جىلى اۋدانعا قاراستى جەزدى كەنتىندە 2 پاتەرلى 2 ءۇي, قارساقباي كەنتىندە 2 پاتەرلى 1 ءۇيدىڭ قۇرىلىسى باستالادى. قازىر جەر تاڭدالىپ, زاڭداستىرۋ جۇمىستارى ءجۇرىپ جاتىر.
ۇلىتاۋ وبلىسى
