فوتو: madeniportal.kz
ءمينيستردىڭ ايتۋىنشا, جالپى, مادەني نىسانداردى جاڭارتۋ, قالپىنا كەلتىرۋ, زامانعا سايكەس قايتا بەيىمدەۋ جۇمىستارى مەملەكەت باسشىسىنىڭ تىكەلەي تاپسىرماسىمەن جۇزەگە اسىپ جاتىر. پرەزيدەنتتىڭ ونەر سالاسىن قولداۋعا قاتىستى ۇندەۋىنە كاسىپكەرلەر, دەمۋشىلەر قولداۋ ءبىلدىرىپ, اتسالىسىپ كەلەدى. ونىڭ ىشىندە مۋزەيلەردىڭ دە ورنى ەرەكشە.
«ماسەلەن, ورتالىق مەملەكەتتىك مۋزەيدىڭ جەلدەتۋ جۇيەسىن جوندەۋ ماقساتىندا «بولات وتەمۇراتوۆ» قورىمەن كەلىسسوزدەر جۇرگىزىلىپ جاتىر. وسى ورايدا مادەنيەت ۇيىمدارىنىڭ جۇمىسىنا دەمەۋشىلىك كورسەتىپ جۇرگەن Samruk-Kazyna Trust كورپوراتيۆتىك قورىنا, Senim Qogamy قورىنا جانە باسقا دا وتاندىق كاسىپكەرلەرگە العىسىمدى بىلدىرەمىن.
ال ءا.قاستەەۆ اتىنداعى مەملەكەتتىك ونەر مۋزەيىنىڭ شاتىرى جاڭارتىلىپ, ەكسپوزيتسيالىق زالدارى جوندەلىپ جاتىر. سونىمەن قاتار مۋزەيدىڭ سالقىنداتقىش جۇيەسى – «چيللەر» تولىقتاي اۋىستىرىلادى. بۇل جۇمىستار رەسپۋبليكالىق بيۋدجەتتەن تىس, دەمەۋشىلىك قاراجات ەسەبىنەن اتقارىلىپ جاتىر», دەدى ايدا بالاەۆا.
سالا ءمينيسترى قاستەەۆ مۋزەيىندە جۋىردا بولعان جاعدايعا دا قىسقاشا تۇسىنىكتەمە بەردى.
«شىلدە ايىندا مۋزەي EfesArt Space جوباسىمەن بىرلەسىپ, بىرنەشە ماڭىزدى كورمە ۇيىمداستىردى. بۇل سەرىكتەستىك زاماناۋي ونەر مەن الەۋمەتتىك ماڭىزدى تاقىرىپتاردى قولداۋعا باعىتتالعان. «ايەل ەڭبەگى» اتتى قايىرىمدىلىق كورمەسىنىڭ اشىلۋى مۋزەي جۇمىسىنان كەيىن الدىن الا شاقىرىلعان, جاسى 21-دەن اسقان قوناقتاردىڭ قاتىسۋىمەن ءوتتى. كەلىسىم بويىنشا مۋزەيدە الكوگولسىز سۋسىندار ۇسىنىلاتىن فۋرشەت وتكىزۋگە رۇقسات بەرىلگەن. الايدا كەيتەرينگ قىزمەتىن كورسەتكەن كومپانيا بۇل تالاپتى بۇزىپ, قۇرامىندا الكوگول بار سۋسىنداردى دا ۇسىنعان. وسى وقيعا بويىنشا جاۋاپتى تۇلعالار انىقتالىپ, «ەفەس قازاقستان» كومپانياسىنا اكىمشىلىك حاتتاما تولتىرىلىپ, ايىپپۇل سالىندى. مۋزەي باسشىلىعىنا دا رەسمي ەسكەرتۋ بەرىلدى. الداعى ۋاقىتتا مۇنداي جاعدايلاردىڭ الدىن الۋ ءۇشىن باقىلاۋ كۇشەيتىلەدى», دەدى مينيستر ايدا بالاەۆا.
ايدا عالىمقىزىنىڭ ايتۋىنشا, كەز كەلگەن وركەنيەتتى ەلدىڭ رۋحاني بەينەسى – ونىڭ مادەني مەكەمەلەرىنىڭ جاعدايىنان كورىنەدى. «ەگەر ءبىز ءوز تاريحىمىزدى قۇرمەتتەسەك, ونەرگە دەگەن قۇرمەتىمىزدى ناقتى ىسپەن كورسەتۋىمىز كەرەك», دەدى مينيستر.
