فوتو: اشىق دەرەككوز
عىلىم جانە جوعارى ءبىلىم مينيسترلىگىنىڭ مالىمەتىنشە, 2025 جىلى ەڭ كوپ سۇرانىسقا يە باعىتتار قاتارىندا – «پەداگوگيكالىق عىلىمدار», «ينجەنەرلىك, وڭدەۋ جانە قۇرىلىس سالالارى», سونداي-اق «بيزنەس, باسقارۋ جانە قۇقىق» سالالارى بار.
ايتا كەتەيىك, تەست تاپسىرۋعا وتىنىشتەر 1 ماۋسىم مەن 8 شىلدە ارالىعىندا app.testcenter.kz سايتىندا قابىلداندى.
عىلىمي-پەداگوگيكالىق ماگيستراتۋراعا تۇسۋشىلەر ءۇشىن تەست ءۇش نەگىزگى بولىمنەن تۇرادى: شەت ءتىلى, وقۋعا دايىندىعىن انىقتاۋ, جانە ءبىلىم بەرۋ باعدارلامالارىنىڭ بەيىنى بويىنشا سۇراقتار. بارلىعى 3 ساعات 55 مينۋت ۋاقىت بەرىلەدى. سىناقتان ءساتتى ءوتۋ ءۇشىن تالاپكەر جالپى كەمىندە 75 بالل جيناۋى ءتيىس. بۇل كورسەتكىشتىڭ ىشىنە: شەت تىلىنەن 25 باللدان, دايىندىق دەڭگەيىنەن 7 باللدان, جانە ەكى بەيىندى ءپاننىڭ ارقايسىسىنان 7 باللدان كەم بولماۋى ءتيىس.
بەيىندى ماگيستراتۋراعا تاپسىرۋشىلار تەك ەكى بەيىندى ءپان بويىنشا تەستىلەۋدەن وتەدى. مۇندا شەكتى بالل 30, ونىڭ ىشىندە ءار پاننەن كەم دەگەندە 7 بالل جيناۋ قاجەت.
تەستىلەۋ ناتيجەسىمەن كەلىسپەيتىن تالاپكەرلەر ەمتيحان اياقتالعان سوڭ 30 مينۋت ىشىندە ونلاين-اپەللياتسياعا ءوتىنىش بەرە الادى. اپەللياتسيالىق كوميسسيا شاعىمدى بەس كۇن ىشىندە قارايدى. قورىتىندى ناتيجە تالاپكەردىڭ جەكە كابينەتىنە جىبەرىلەدى.
2025 وقۋ جىلىنا ماگيستراتۋرا بويىنشا 13 مىڭنان استام مەملەكەتتىك گرانت بولىنگەن. گرانتتار سۇرانىس جوعارى ماماندىقتارعا باعىتتالعان.
گرانت كونكۋرسىنا قۇجات قابىلداۋ كەزەڭى 12–18 تامىز ارالىعىن قامتيدى. ال گرانت يەگەرلەرى 25 تامىزعا دەيىن بەلگىلى بولادى. جوو-لارعا قابىلداۋ ءراسىمى 28 تامىزعا دەيىن اياقتالادى.
