فوتو: qostanay.tv
بالاقايدىڭ ءمايىتى 3,5 مەتر تەرەڭدىكتەن, جاعالاۋدان 90 مەتر قاشىقتىقتا تابىلعان.
رۋدنىي قالاسىنىڭ توتەنشە جاعدايلار باسقارماسى باسشىسى ازامات اعاتايدىڭ مالىمەتىنشە, ىزدەستىرۋ جۇمىستارى ءۇش ساعاتتان اسا ۋاقىتقا سوزىلىپ, ناتيجەسىندە 16 جاستاعى بوزبالانىڭ ءمايىتى سۋدان شىعارىلعان. قازىر سوت-مەديتسينالىق ساراپتامانىڭ قورىتىندىسى كۇتىلىپ وتىر.
قالا اكىمى قايعىلى وقيعا بويىنشا پىكىر بىلدىرگەن.
«كۇشىن دۇرىس ەسەپتەمەگەن, ءجۇزىپ وتەمىن دەپ ويلاعان. بوس جەردەن ءبىر بالانى جوعالتىپ الدىق, وتە وكىنىشتى. الدىن الۋ جۇمىستارى قاجەت. شومىلۋعا رۇقسات ەتىلمەگەن جەرلەرگە تىيىم سالاتىن بەلگىلەر ورناتۋ كەرەك, رەيدتەر جۇرگىزۋ قاجەت. بىزدە ەكى جابدىقتالعان جاعاجاي بار, بىراق بۇل جەتكىلىكسىز. بولاشاقتا شىركەۋ ماڭىندا قوسىمشا جاعاجايدىڭ اشىلۋ ماسەلەسىن قاراستىرامىز. الدىن الا سمەتاسىن دايىنداۋ كەرەك», دەدى رۋدنىي اكىمى.
توتەنشە جاعدايلار دەپارتامەنتى كەزەكتى رەت:
- تەك ارنايى جابدىقتالعان جاعاجايلاردا شومىلىڭىز;
- بالالاردى سۋ جانىندا قاراۋسىز قالدىرماڭىز;
- بالالارعا سۋداعى ءتارتىپ ەرەجەلەرىن ءتۇسىندىرىڭىز, تەرەڭدىكتەگى ويىنداردىڭ قاۋىپتىلىگىن ەسكەرتىڭىز;
- ماس كۇيدە سۋعا تۇسپەڭىز;
- بەيتانىس جەرلەرگە سۇڭگىمەڭىز – سۋ تۇبىندە تامىرلار, قۇيىندار, تەرەڭدىك اۋىتقۋلارى بولۋى مۇمكىن ەكەندىگىن ەسكەرتەدى.
